ពិភពលោកមានការភ្ញាក់ផ្អើលយ៉ាងខ្លាំង ក្រោយពីស្ថាប័ន MustShareNews បានទម្លាយថា រដ្ឋាភិបាលសិង្ហបុរីទើបតែបានអនុម័តការដំឡើងប្រាក់បៀវត្សរ៍ ៩% ជូនគណៈរដ្ឋមន្ត្រីជាលើកដំបូងក្នុងរយៈពេល ១៥ឆ្នាំ។ ការកែសម្រួលនេះធ្វើឱ្យនាយករដ្ឋមន្ត្រី លោក Lawrence Wong ទទួលបានប្រាក់ខែថ្មីរហូតដល់ទៅ SGD $3,924,000 ក្នុងមួយឆ្នាំ (ប្រមាណជាង $327,000 ក្នុងមួយខែ។
__________
វ៉ាដាច់លោក ដូណាល់ត្រាំ និងមេដឹកនាំពិភពលោកដទៃទៀត! នាយករដ្ឋមន្ត្រីសិង្ហបុរី Lawrence Wong ត្រៀមខ្លួនទទួលកញ្ចប់ប្រាក់បៀវត្សរ៍ថ្មីដ៏មហិមាខ្ពស់ដាច់គេលើលោក រហូតដល់ទៅជាង ៣២ ម៉ឺនដុល្លារសិង្ហបុរីក្នុងមួយខែ បន្ទាប់ពីរដ្ឋាភិបាលសិង្ហបុរីបានសម្រេចអនុម័តជាផ្លូវការនូវការដំឡើងប្រាក់ខែគណៈរដ្ឋមន្ត្រី ចាប់ពីពាក់កណ្តាលខែតុលា ឆ្នាំ២០២៦ ខាងមុខនេះតទៅ ដែលនេះជាការកែប្រែប្រាក់វាយតម្លៃទ្រង់ទ្រាយធំលើកដំបូងបំផុតក្នុងរយៈពេល ១៥ ឆ្នាំមកនេះ។
យោងតាមការចុះផ្សាយជាផ្លូវការរបស់សារព័ត៌មាន MustShareNews បានឱ្យដឹងថា រដ្ឋសភានៃប្រទេសសិង្ហបុរីទើបតែបានអនុម័តកញ្ចប់ការដំឡើងប្រាក់បៀវត្សរ៍ជូនដល់គណៈរដ្ឋមន្ត្រី និងសមាជិកសភាជាតិក្នុងអត្រា ៩% ដោយចាប់ផ្តើមអនុវត្តចាប់ពីថ្ងៃទី១៥ ខែតុលា ឆ្នាំ២០២៦ ខាងមុខនេះតទៅ។ តាមរយៈការកែសម្រួលអត្រាថ្មីនេះ ប្រាក់បៀវត្សរ៍ប្រចាំឆ្នាំរបស់នាយករដ្ឋមន្ត្រី លោក Lawrence Wong នឹងត្រូវហក់ឡើងពី SGD $3,600,000 ទៅដល់ SGD $3,924,000 ក្នុងមួយឆ្នាំ (ស្មើនឹងប្រមាណ $327,000 អាមេរិកក្នុងមួយខែ)។ តួលេខដ៏ច្រើនសន្ធឹកសន្ធាប់នេះ បានធ្វើឱ្យប្រាក់ខែរបស់ប្រមុខរដ្ឋសិង្ហបុរី វ៉ាដាច់មេដឹកនាំតំបន់រដ្ឋបាលពិសេសហុងកុង លោក John Lee ដែលទទួលបានប្រមាណ ~SGD $907,000 ក្នុងមួយឆ្នាំ និងវ៉ាដាច់ប្រធានាធិបតីសហរដ្ឋអាមេរិក លោក Donald Trump ដែលទទួលបានប្រចាំឆ្នាំប្រមាណ ~SGD $505,000 ជិតដល់ទៅ ៨ ដងឯណោះ។
មូលហេតុយុទ្ធសាស្ត្រដែលធ្វើឱ្យរដ្ឋាភិបាលសិង្ហបុរីសម្រេចចិត្តដំឡើងប្រាក់ខែគណៈរដ្ឋមន្ត្រីឱ្យខ្ពស់កប់ពពកបែបនេះ គឺដើម្បីអនុវត្តស្របតាមគោលនយោបាយ «ប្រាក់បៀវត្សរ៍ខ្ពស់ដើម្បីទប់ស្កាត់អំពើពុករលួយ» និងដើម្បីដោះស្រាយសម្ពាធនៃអត្រាអតិផរណាសកល។ យុទ្ធសាស្ត្រនេះធានាថាកម្រិតប្រាក់ចំណូលរបស់មន្ត្រីរដ្ឋាភិបាលគឺមានតុល្យភាពប្រកួតប្រជែងជាមួយប្រាក់ខែរបស់នាយកប្រតិបត្តិ (CEOs) ជាន់ខ្ពស់នៅក្នុងវិស័យឯកជន ក្នុងគោលបំណងទាក់ទាញ «ខួរក្បាល និងធនធានមនុស្សកំពូលៗ» ឱ្យចូលមកដឹកនាំ និងបម្រើជាតិដោយភាពស្មោះត្រង់ ១០០%។
សរុបមក របត់នៃការដំឡើងប្រាក់ខែ ៩% របស់រដ្ឋាភិបាលសិង្ហបុរីនាពេលនេះ បានពង្រឹងជំហររបស់ខ្លួនកាន់តែខ្លាំងក្នុងនាមជាប្រទេសដែលមានការគ្រប់គ្រងរដ្ឋបាលស្អាតស្អំ និងផ្តល់តម្លៃខ្ពស់បំផុតដល់មេដឹកនាំជាតិ។ បើទោះជាកញ្ចប់បៀវត្សរ៍ថ្មីរបស់លោក Lawrence Wong ហាក់មើលទៅច្រើនលើសលប់ធៀបនឹងពលរដ្ឋទូទៅ ប៉ុន្តែវាគឺជាវិធានការការទូត និងវិស្វកម្មសង្គមដ៏ជោគជ័យមួយ ដែលសិង្ហបុរីបានប្រើប្រាស់ជាខែលការពារសេដ្ឋកិច្ច និងសន្តិសុខជាតិឱ្យមានការអភិវឌ្ឍប្រកបដោយស្ថិរភាពយូរអង្វែងនៅលើឆាកអន្តរជាតិ៕
