ធ្លាប់មានបំណងចង់បានកូនជាច្រើននាក់ពេលនេះ ជា សុជាតិ និងភរិយា ត្រៀមទទួលសមាជិកទី២ ក្នុងឆ្នាំ២០២៧។ ដំណឹងល្អនេះទទួលបានការជូនពរនិងអបអរសាទរយ៉ាងច្រើនពីអ្នកគាំទ្រ។ មានសមាជិកម្នាក់ទៀតនៅក្នុងរង្វង់គ្រួសារតារាចម្រៀងរូបនេះបានសារភាពថាចង់បានកូនស្រីប៉ុន្តែបើបានកូនប្រុសក៏ល្អដែរ។
នៅយប់ថ្ងៃទី២៦ ខែសីហា អ្នកនាង រឹម លក្ម្សី និងតារាចម្រៀង ជា សុជាតិ បានបង្ហាញពីការពរពោះកូនទី២របស់ពួកគេដែលធ្វើឱ្យអ្នកទាំងពីរភ្ញាក់ផ្អើលទាំងយប់បន្ទាប់ពីទទួលបានកូនប្រុសច្បងឆ្លាតវៃ ខ្យូតគួរឱ្យស្រលាញ់បានជាង១ឆ្នាំ។ នេះក៏ជាអ្វីដែលពួកគេប្រាថ្នាចង់បានសមាជិកបន្ថែមផងដែរ ខណៈ ជា សុជាតិ ចង់បានកូនរហូតដល់៥ទៅ៦នាក់ឯណោះ។
នៅថ្ងៃទី២៧ ខែសីហា តារាចម្រៀង ជា សុជាតិ បានបង្ហាញថាភរិយារបស់លោកពរពោះកូនទី២បានចំនួន៥សប្តាហ៍៥ថ្ងៃហើយ ហើយរយៈពេល៣ខែទៀតពួកគេនឹងដឹងថាជាកូនប្រុសឬស្រី។ លោកក៏បានបង្ហាញថាសម្រាប់លោកចង់បានកូនស្រី តែបើជាកូនប្រុសក៏នៅតែល្អដូចគ្នា។ ជា សុជាតិ និងភរិយា រឹម លក្ម្សី បានស្វាគមន៍កូនដំបូងរបស់ពួកគេនៅថ្ងៃទី៧ ខែកុម្ភៈ ឆ្នាំ២០២៥ ដោយដាក់ឈ្មោះថា ជា កម្ពុមុនិរាជ។
ជា សុជាតិ និងភរិយា បានរៀបអាពាហ៍ពិពាហ៍នៅឆ្នាំ២០២៤ ហើយអ្នកទាំងពីរតែងតែបង្ហាញភាពស្និទ្ធស្នាល ភាពផ្អែមល្ហែមស្រលាញ់យល់ចិត្តគ្នាជានិច្ចនិងពោរពេញដោយសុភមង្គល។ ការមានកូនទី២នេះ កាន់តែបន្ថែមសុភមង្គលដល់គ្រួសាររបស់សិល្បកររូបនេះ បន្ទាប់ពីលោកបានឆ្លងកាត់ដំណាក់កាលជាឪពុកកូនដំបូងអស់រយៈពេលជាងមួយឆ្នាំ៕
