កូនពៅសំណព្វចិត្តលោក ត្រាំ ក្លាយជាគោលដៅតាមធ្វើឃា.តថ្មីរបស់អ៊ីរ៉ង់

ទូរទស្សន៍រដ្ឋអ៊ីរ៉ង់បញ្ចេញវីដេអូគំរាមកំហែង និងប្រកាសប្រាក់រង្វាន់ចំនួន ១០ លានដុល្លារសហរដ្ឋអាមេរិក ក្នុងការតាមប្រក្កួតធ្វើឃាតលើលោក Barron Trump ដែលជាកូនប្រុសពៅរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។
_______________

ប្រាក់រង្វាន់រហូតដល់ ១០លានដុល្លារ ប្រសិនបើអាចធ្វើបាន! ពេលនេះសង្គ្រាមចិត្តសាស្ត្ររវាងអាមេរិកនិងអ៊ីរ៉ង់កាន់តែកាច ដោយទូរទស្សន៍រដ្ឋអ៊ីរ៉ង់បញ្ចេញវីដេអូគំរាមកំហែង និងប្រកាសប្រាក់រង្វាន់ចំនួន ១០ លានដុល្លារសហរដ្ឋអាមេរិក ដល់ជនណាដែលអាចធ្វើឃាត Barron Trump កូនប្រុសពៅរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានសម្រេច។ ព្រឹត្តិការណ៍សន្តិសុខសកលដ៏ក្តៅគគុកនេះ ត្រូវបានចុះផ្សាយជាបន្តបន្ទាប់ដោយសារព័ត៌មានអន្តរជាតិ កាលពីថ្ងៃទី ២៥ ខែសីហា ឆ្នាំ ២០២៦ ថ្មីៗនេះ។

យោងតាមវីដេអូដែលមានរយៈពេលប្រហែលបីនាទី ចាក់ផ្សាយដោយប៉ុស្តិ៍ទូរទស្សន៍រដ្ឋអ៊ីរ៉ង់ Channel 3 ដែលមានទំនាក់ទំនងជិតស្និទ្ធជាមួយកងកម្លាំងឆ្មាំបដិវត្តន៍អ៊ីរ៉ង់ (IRGC) បានបង្ហាញពីខ្លឹមសាររៀបរាប់ចំឈ្មោះថា «តើត្រូវសម្លាប់ Barron Trump នៅទីណា និងដោយរបៀបណា?»។ នៅក្នុងវីដេអូនោះ ភាគីអ៊ីរ៉ង់បានប្រើប្រាស់ក្រាហ្វិកបែបប្រព័ន្ធស៊ើបការណ៍សម្ងាត់ ដើម្បីបង្ហាញពីភូមិសាស្ត្រ និងទីតាំងសាកលវិទ្យាល័យដែលលោក Barron Trump កំពុងសិក្សានៅទីក្រុងញូវយ៉ក ខ្សែការពារឡានអមដំណើរ ព្រមទាំងចំណុចយាមកាមរបស់ភ្នាក់ងារសម្ងាត់អាមេរិក ដោយពួកគេអះអាងថា សកម្មភាពរបស់កូនប្រុសប្រធានាធិបតីរូបនេះត្រូវបានក្រុមការងាររបស់ពួកគេធ្វើការ «តាមដានជាប់ជានិច្ច»។

លើសពីនេះ វីដេអូឃោសនារបស់អ៊ីរ៉ង់ក៏បានលើកឡើងនូវព័ត៌មានអះអាងមួយចំនួនទៀត ដូចជាមានស្ត្រីម្នាក់បានរកឃើញវិធីសាស្ត្រជ្រៀតចូលឆ្លងកាត់ខ្សែការពាររបស់ភ្នាក់ងារសម្ងាត់អាមេរិក ដើម្បីចូលទៅអង្គុយជជែកក្នុងជំនួបឯកជនជាមួយលោក Barron Trump និងបានលួចយកព័ត៌មានសម្ងាត់មកឱ្យពួកគេ។ ពួកគេថែមទាំងបាននិយាយថា លោក Barron Trump តែងតែលួចប្រើប្រាស់ប្រព័ន្ធសំឡេង និងផ្ញើសារនៅលើម៉ាស៊ីនហ្គេម Xbox ជាលក្ខណៈឯកជន ដើម្បីគេចចេញពីការតាមដានត្រួតពិនិត្យរបស់ក្រុមសន្តិសុខការពារខ្លួន។ ទោះជាយ៉ាងណា សារព័ត៌មានល្បីឈ្មោះ Iran International និង Euronews បានបញ្ជាក់ថា ពួកគេមិនអាចផ្ទៀងផ្ទាត់ ឬរកឃើញភស្តុតាងណាមួយដែលបញ្ជាក់ថាការអះអាងរបស់អ៊ីរ៉ង់ទាំងនេះជាការពិតឡើយ ដោយវាអាចគ្រាន់តែជាការបំផ្លើសក្នុងគោលបំណងបំភ័យតែប៉ុណ្ណោះ។

ការប្រកាសដាក់តម្លៃខ្លួនកូនប្រុសពៅរបស់លោក ដូណាល់ ត្រាំ រហូតដល់ ១០ លានដុល្លារនេះ ត្រូវបានអ្នកវិភាគមើលឃើញថា គឺជាផ្នែកមួយនៃសង្គ្រាមចិត្តសាស្ត្រដ៏តានតឹង និងជាការគំរាមកំហែងនយោបាយជាបន្តបន្ទាប់ពីសំណាក់ប្រទេសអ៊ីរ៉ង់ ទៅលើសមាជិកគ្រួសារប្រធានាធិបតីអាមេរិក បន្ទាប់ពីពួកគេធ្លាប់បានបញ្ចេញវីដេអូស្រដៀងគ្នានេះដើម្បីគំរាមកំហែងដល់លោកស្រី Melania Trump កាលពីខែកក្កដាកន្លងទៅ៕