ឆ្នាំនេះទឹកកាច! ទន្លេទាំង៣ របស់កម្ពុជាបន្តបុកឡើងខ្លាំង រហូតហួសកម្រិតប្រុងប្រយ័ត្ន

របាយការណ៍បច្ចុប្បន្នភាពបានបង្ហាញថា ទន្លេមេគង្គ ទន្លេសាប និងទន្លេបាសាក់ កំពុងហក់ឡើងយ៉ាងគំហុក ធ្វើឱ្យខេត្តចំនួន៤ (ស្ទឹងត្រែង ក្រចេះ ត្បូងឃ្មុំ កំពង់ចាម) ត្រូវប្រកាសអាសន្ន និងត្រៀមអន្តរាគមន៍បន្ទាន់។
______________

កុំមើលស្រាលស្ថានការណ៍ឱ្យសោះ! របាយការណ៍ពីក្រសួងធនធានទឹក បានបង្ហាញថា ទន្លេធំៗទាំង៣ រួមមានទន្លេមេគង្គ ទន្លេសាប និងទន្លេបាសាក់ កំពុងហក់ឡើងយ៉ាងគំហុក និងឈានដល់កម្រិតប្រកាសអាសន្ន ដែលជំរុញឱ្យខេត្តចំនួន៤ រួមមាន ស្ទឹងត្រែង ក្រចេះ ត្បូងឃ្មុំ និងកំពង់ចាម ត្រូវស្ថិតក្នុងស្ថានភាពប្រុងជើងការខ្ពស់ និងត្រៀមលក្ខណៈជម្លៀសប្រជាពលរដ្ឋជាបន្ទាន់។ ឥទ្ធិពលទឹកភ្លៀងជោកជាំពីភាគខាងលើ បានធ្វើឱ្យរបបទឹកមានសន្ទុះខ្លាំង និងមានល្បឿនរំហូរលឿនគួរឱ្យកត់សម្គាល់ គិតត្រឹមថ្ងៃទី ២៥ ខែសីហា ឆ្នាំ ២០២៦ នេះ។

យោងតាមទិន្នន័យជាក់ស្តែង ស្ថានីយជលសាស្ត្រសំខាន់ៗមួយចំនួនបានហក់ឡើងហួសកម្រិតប្រុងប្រយ័ត្នរួចទៅហើយ ដោយក្នុងនោះ ស្ថានីយស្ទឹងត្រែងឡើងដល់ ១១,១៨ ម៉ែត្រ (លើសកម្រិតប្រុងប្រយ័ត្ន ០,៤៨ ម៉ែត្រ) និងស្ថានីយក្រចេះឡើងដល់ ២២,៦០ ម៉ែត្រ (លើសកម្រិតប្រុងប្រយ័ត្ន ០,៦០ ម៉ែត្រ)។ ស្របពេលជាមួយគ្នានេះ ទឹកទន្លេមេគង្គបាននិងកំពុងហូរច្រកចូលទៅក្នុងបឹងទន្លេសាបយ៉ាងខ្លាំងក្លា ដែលធ្វើឱ្យស្ថានីយព្រែកក្តាមឡើងដល់ ៧,៨២ ម៉ែត្រ ខណៈស្ថានីយទន្លេបាសាក់ភ្នំពេញឡើងដល់ ៨,៤៥ ម៉ែត្រ។ ការព្យាករណ៍បានបង្ហាញថា របបទឹកទន្លេនឹងនៅតែបន្តហក់ឡើងខ្ពស់បន្ថែមទៀតក្នុងរយៈពេល ៣ ទៅ ៤ ថ្ងៃខាងមុខ ដែលអាចបង្កហានិភ័យខ្ពស់ដល់ការបាក់ស្រុតច្រាំងទន្លេ និងបង្កការជន់លិចតំបន់វាលទំនាបកាន់តែខ្លាំង។

គួរជម្រាបថា ស្ថានភាពទឹកទន្លេដែលបន្តហក់ឡើងយ៉ាងគំហុកនៅពេលនេះ ត្រូវបានគេមើលឃើញថា បណ្តាលមកពីការធ្លាក់ភ្លៀងយ៉ាងជោកជាំខ្លាំងជាប់ៗគ្នានៅក្នុងអាងទន្លេមេគង្គ នៃប្រទេសភាគខាងលើ (រួមមានប្រទេសថៃ និងឡាវ) ក្រោមការជះឥទ្ធិពលផ្ទួនៗពីសម្ពាធទាប និងឥទ្ធិពលនៃកន្ទុយព្យុះទី ១៨ ឈ្មោះ ស៊ូដេល (Saudel)។ បរិមាណទឹកភ្លៀងដ៏ជោកជាំទាំងនោះ បានបង្កើតជាជំនន់ទឹកហូរយ៉ាងគំហុកធ្លាក់ចូលមកក្នុងផ្ទៃទន្លេមេគង្គកម្ពុជា ដែលជាហេតុធ្វើឱ្យរបបទឹកមានការប្រែប្រួល និងហក់ឡើងខ្លាំងលឿនជាងសព្វដង

ចំពោះមុខគ្រោះធម្មជាតិនេះ គណៈកម្មាធិការជាតិគ្រប់គ្រងគ្រោះមហន្តរាយ បានដាក់បញ្ជាឱ្យអាជ្ញាធរខេត្តទាំង ៤ ប្រមូលកម្លាំងចម្រុះ និងត្រៀមមធ្យោបាយសង្គ្រោះដើម្បីអន្តរាគមន៍ជួយប្រជាពលរដ្ឋ ២៤ ម៉ោងលើ ២៤ ម៉ោង។ ជាមួយគ្នានេះ អាជ្ញាធរក៏បានជម្រុញ និងក្រើនរំលឹកយ៉ាងម៉ឺងម៉ាត់ដល់មាតាបិតា និងអាណាព្យាបាលទាំងអស់ ដាច់ខាតត្រូវមើលថែទាំកុមារតូចៗឱ្យបានតឹងរ៉ឹងបំផុត ដោយហាមឃាត់មិនឱ្យចុះលេងទឹកជំនន់ឡើយ ដើម្បីបង្ការគ្រោះថ្នាក់លង់ទឹកជាយថាហេតុ។ ជាងនេះទៅទៀត ប្រជាពលរដ្ឋត្រូវបង្កើនការប្រុងប្រយ័ត្នខ្ពស់ចំពោះការឆ្លងចរន្តអគ្គិសនី និងសត្វអសិរពិសផ្សេងៗ (ដូចជា ពស់ ឬខ្យាដំរី) ដែលរត់គេចពីទឹកជំនន់ឡើងមកសម្ងំនៅលើផ្ទះសម្បែង៕