តារារ៉េប King Chi ទើបតែទម្លាក់បទថ្មីមួយដែលមានលក្ខណៈពិសេសលើកស្ទូយវិស័យ គុនខ្មែរ តាមរយៈវិស័យហ៊ីបហប។ នៅក្នុងបទថ្មីរបស់តារាចម្រៀងរូបនេះក៏បានបង្ហាញពីកីឡាករល្បីៗដូចជា ធឿន ធារ៉ា ម៉ឺន មេឃា និង អេអាំម៉ារីន។ ទស្សនិកជនបានសរសើរថាមួយបទនេះអេមខ្លាំងជាពិសេសគឺបានបង្ហាញពីក្បាច់គុនបុរាណខ្មែរ។
នៅយប់ថ្ងៃទី២២ ខែសីហា តារារ៉េប King Chi បានទម្លាក់បទថ្មីមួយមានចំណងជើ
ងថា «គុនខ្មែរ»។ ដើមដំបូងនៃបទនេះគេបានឮតារារ៉េបរូបនេះ ពោលពីសិល្បៈគុនខ្មែរដែលមានចារនៅលើសិលាដែលមរតកពីដូនតាបន្សល់ទុកឱ្យ និងបានបង្ហាញពីខ្មាំងសត្រូវខ្លាចអំណាចរបស់ខ្មែរពីគ្រប់ទិសទី ជាពិសេសបានបង្ហាញពីភាពអស្ចារ្យនៅលើឆាកអន្តរជាតិ។
បទនេះក៏បង្ហាញពីក្បាច់ជង្គង់ហោះ កែង ក្បាច់នីមួយៗរបស់គុនខ្មែរគឺមានភាពរហ័សរហួនដែលជាកេរតំណែលរបស់គុនខ្មែរហើយយើងត្រូវតែថែរក្សា ព្រមទាំងរៀបរាប់ស្នៀតមួយចំនួនពីគុនខ្មែរផងដែរ។ បទចម្រៀងដែលផ្សារភ្ជាប់ទៅនឹងគុនខ្មែរជាមួយនឹងចង្វាក់ហ៊ីបហបរបស់ King Chi ដែលមាន ប្រុសឡា (BROSSLA) ជា Producer ទទួលបានមតិឆ្លើយតបជាវិជ្ជមាន។ ទស្សនិកជនជាច្រើនបានសរសើរទៅលើបទចម្រៀងនេះថា អេមខ្លាំង ជាពិសេសគឺបានចូលរួមផ្សព្វផ្សាយពីគុនខ្មែរមរតកវប្បធម៌ដ៏ចំណាស់របស់ខ្មែរផងដែរ។
MV មួយបទនេះក៏បាននាំយកកីឡាករល្បីឈ្មោះ ធឿន ធារ៉ា ដែលធ្លាប់ប្រកួតឈ្នះខ្សែក្រវ៉ាត់នៅលើឆាកអន្តរជាតិ រួមទាំងកីឡាករពីរនាក់ដែលជាកូនប្រុសលោក អេភូថង គឺ ម៉ឺន មេឃា និង អេអាំម៉ារីន ដែលសុទ្ធសឹងតែជាកីឡាករល្បីឈ្មោះធ្លាប់ប្រកួតទាំងក្នុងស្រុកនិងក្រៅស្រុកដែលមានការទទួលស្គាល់យ៉ាងទូលំទូលាយ។
លើសពីការចាប់អារម្មណ៍ទៅលើបទចម្រៀង អ្នកគាំទ្រក៏សប្បាយចិត្តនៅពេលដែលឃើញ CG ចាប់ផ្តើមមានសកម្មភាពឡើងវិញហើយស្នាដៃរបស់ផលិតកម្មនេះមានប្រជាប្រិយភាពគួរឱ្យកត់សម្គាល់នៅលើទីផ្សារ៕
