គួរឲ្យសោកស្ដាយ! មហាជនស្នើសុំឱ្យមានការជួសជុលបន្ទាន់ ក្រោយឃើញទិដ្ឋភាពក្បាច់ចម្លាក់បាក់បែកពេញដី នៃទីអារាមប្រវត្តិសាស្ត្រអាយុកាល ១០២ ឆ្នាំមួយនេះ ដែលជាតំបន់ទេសចរណ៍ដ៏អស្ចារ្យទាក់ទាញភ្ញៀវទេសចររាប់លាននាក់ឱ្យចង់មកទស្សនាអារាមប៉ះផ្ទាល់ជាមួយពពក និងអ័ព្ទវិលវល់។
______________
មហាជនស្នើសុំឱ្យមានការជួសជុលបន្ទាន់! ក្រោយឃើញទិដ្ឋភាពនៃការប្រេះស្រាំ និងជ្រុះធ្លាក់ក្បាច់ចម្លាក់មួយចំនួនពីតួចេតិយបុរាណ បានបង្កជាក្តីបារម្ភយ៉ាងខ្លាំងដល់សាធារណជនជុំវិញការបាត់បង់កេរដំណែលប្រវត្តិសាស្ត្រដ៏មានតម្លៃមួយនេះ។ វត្តសំពៅប្រាំ មិនត្រឹមតែជាទីអារាមដ៏សក្ការៈប៉ុណ្ណោះទេ ប៉ុន្តែជាស្ថាបត្យកម្មដ៏អស្ចារ្យតែមួយគត់ ដែលបានសាងសង់ឡើងនៅលើកំពូលភ្នំដាច់ស្រយាលកម្ពស់ជាង ១,១០០ ម៉ែត្រ ហ៊ុមព័ទ្ធដោយសមុទ្រអ័ព្ទ និងពពកវិលវល់ស្ទើរពេញមួយឆ្នាំ។.jpg)
យោងតាមការបង្ហោះនៅលើផេកផ្លូវការរបស់វត្តសំពៅប្រាំផ្ទាល់ កាលពីថ្ងៃទី២៣ ខែសីហា បានបង្ហាញពីទិដ្ឋភាពជាក់ស្តែងនៃបំណែកក្បាច់ចម្លាក់បុរាណជាច្រើន ដែលបានរបេះធ្លាក់មកបាក់បែកនៅលើដី។ ប្រភពដដែលបានបញ្ជាក់ថា មូលហេតុចម្បងដែលបណ្តាលឱ្យចេតិយបុរាណនេះរងការខូចខាត គឺដោយសារតែអាយុកាលកាលវេលាដ៏យូរលង់ រួមផ្សំជាមួយនឹងឥទ្ធិពលអាកាសធាតុនៅលើកំពូលភ្នំបូកគោ ដែលមានកំហាប់សំណើមខ្ពស់ ខ្យល់បោកបក់ខ្លាំង និងការប៉ះទង្គិចផ្ទាល់ជាមួយពពក និងអ័ព្ទជោកជាំជារៀងរាល់ថ្ងៃ។.jpg)
សូមបញ្ជាក់ថា ទីអារាមដ៏ស័ក្តិសិទ្ធិមួយនេះត្រូវបានកសាងឡើងតាំងពីឆ្នាំ ១៩២៤ ក្នុងរជ្ជកាលព្រះបាទស៊ីសុវត្ថិ ដែលគិតមកទល់ពេលនេះ មានអាយុកាលរហូតដល់ទៅ ១០២ ឆ្នាំហើយ។ ចំពោះវិស័យទេសចរណ៍ ទីអារាមបុរាណមួយនេះគឺជាផ្ទាំងទស្សនីយភាពដ៏ទាក់ទាញ និងជាម៉ាញេទិកឆក់យកបេះដូងភ្ញៀវទេសចរជាតិ និងអន្តរជាតិរាប់លាននាក់ឱ្យមកកម្សាន្តនៅខេត្តកំពត។ ភាពអស្ចារ្យនៃផ្ទាំងថ្មធម្មជាតិរាងដូចសំពៅប្រាំ បូករួមនឹងសំណង់ព្រះវិហារចាស់បុរាណដែលឈរជើងយ៉ាងរឹងមាំចំកណ្តាលជំនោរខ្យល់ត្រជាក់ និងផ្សែងអ័ព្ទបក់កាត់ដូចឋានសួគ៌ក្រោមមេឃ បានធ្វើឱ្យទីនេះក្លាយជាទីតាំងថតរូបដ៏ពេញនិយម និងជាកន្លែងទេសចរណ៍បែបវប្បធម៌ សាសនា និងធម្មជាតិដែលមិនអាចរំលងបាន។
ចំពោះមុខស្ថានភាពទ្រុឌទ្រោមនេះ បច្ចុប្បន្នមហាជន និងអ្នកស្នេហាវិស័យវប្បធម៌ បាននិងកំពុងគោរពស្នើសុំយ៉ាងទទូចដល់ក្រសួងវប្បធម៌ និងវិចិត្រសិល្បៈ ព្រមទាំងអាជ្ញាធរពាក់ព័ន្ធ មេត្តាជួយចុះពិនិត្យ វាយតម្លៃ និងធ្វើការជួសជុលអភិរក្សឡើងវិញឱ្យបានទាន់ពេលវេលា ដើម្បីថែរក្សាដួងព្រលឹងវប្បធម៌ និងអារាមប៉ះពពកដ៏អស្ចារ្យមួយនេះឱ្យនៅគង់វង្សតទៅ៕
