គ្រួសារខំប្រកាសស្វែងរក តាមពិតលោក ថូ សំណាង ត្រូវបាន ACU ឃាត់ខ្លួនព្រោះពាក់ព័ន្ធនឹងអំពើពុលរលួ.យ

រាជធានីភ្នំពេញ៖ មន្រ្តីក្រសួងការបរទេស លោក ថូ សំណាង ដែលគ្រួសារកំពុងប្រកាសស្វែងរកថាបាត់ខ្លួនទាំងព្រលឹងចុងសក់ ស្រាប់តែពេលនេះបែកធ្លាយការពិតដ៏រន្ធត់ ក្រោយព្រះមហាក្សត្របានចេញព្រះរាជក្រឹត្យត្រាស់បង្គាប់បញ្ចប់មុខតំណែងជាបន្ទាន់ ក្រោយរកឃើញថាមានជាប់ពាក់ព័ន្ធនឹងបទល្មើសពុករលួ.យជាមួយបណ្ដាញឧក្រិដ្ឋជនអនឡាញស្កេម។
___________________

ពីព័ត៌មានបាត់ខ្លួន មកជាដំណឹងនៃការជាប់ខ្នោះ ធ្វើឲ្យផ្អើលពេញបណ្ដាញសង្គម! មន្រ្តីក្រសួងការបរទេស លោក ថូ សំណាង ដែលគ្រួសារកំពុងប្រកាសស្វែងរកថាបាត់ខ្លួន ព្រមទាំងបានដាក់ពាក្យបណ្តឹងនៅប៉ុស្តិ៍នគរបាលទាំងក្តីបារម្ភនោះ តាមពិតទៅត្រូវបានអង្គភាពប្រឆាំងអំពើពុករលួយ (ACU) នាំខ្លួនយកទៅសាកសួរ និងឃាត់ខ្លួនជាផ្លូវការ ជុំវិញការជាប់ពាក់ព័ន្ធយ៉ាងជ្រៅនៅក្នុងបណ្តាញឧក្រិដ្ឋកម្មបោកប្រាស់តាមប្រព័ន្ធអនឡាញ (Online Scams)។

យោងតាមការលាតត្រដាងនៅលើបណ្តាញសង្គម មុនពេលបែកធ្លាយដំណឹងចាប់ខ្លួន ក្រុមគ្រួសាររបស់លោក ថូ សំណាង បានបង្ហោះសារយ៉ាងតក់ក្រហល់រាយការណ៍ថា លោកបានបាត់ខ្លួនមិនដឹងដំណឹងតាំងពីថ្ងៃទី១៩ ខែសីហា ឆ្នាំ២០២៦ ព្រមទាំងបានបន្សល់ទុកនូវរថយន្តទំនើបម៉ាក ហុងឈី (Hongqi) ពណ៌ស ពាក់ស្លាកលេខរដ្ឋ ចតចោលនៅក្បែរក្រសួង។ ប៉ុន្តែបន្ទាប់ពីការប្រកាសបាត់ខ្លួនមិនបានប៉ុន្មានផង ស្រាប់តែមានការធ្លាក់មកនូវព្រះរាជក្រឹត្យផ្លូវការ ត្រាស់បង្គាប់បញ្ចប់មុខតំណែងរបស់លោក ថូ សំណាង ពីអគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ និងបញ្ចប់តំណែងជាទីប្រឹក្សាក្រសួង ដែលនេះជាសញ្ញាចាប់ផ្តើមនៃចំណាត់ការច្បាប់ដ៏ក្តៅគគុក។

ភ្លាមៗបន្ទាប់ពីការដកហូតតំណែង លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានប្រកាសប្រាប់បណ្តាញព័ត៌មានក្នុងស្រុកច្បាស់ៗថា លោក ថូ សំណាង ត្រូវបានកម្លាំងជំនាញរបស់ ACU ឃាត់ខ្លួនជាផ្លូវការ។ នៅក្នុងដំណាក់កាលសាកសួរ អតីតមន្ត្រីជាន់ខ្ពស់រូបនេះបានដេកដួលសារភាពកំហុសទាំងស្រុងថា ខ្លួនពិតជាបានលួចយកសន្លឹកទិដ្ឋាការ (Visa) ប្រភេទ C និង Cex ទៅប្រើប្រាស់ និងលក់ដូរដោយខុសច្បាប់សរុបជាង ៦,០០០សន្លឹក ដើម្បីផ្តល់ឱ្យក្រុមជនបរទេសដែលដំណើរការបណ្តាញ Online Scams នៅក្នុងប្រទេសកម្ពុជា។ ប្រធានអង្គភាព ACU បានបញ្ជាក់បន្ថែមថា បច្ចុប្បន្នកម្លាំងសមត្ថកិច្ចបានដកហូតសន្លឹកទិដ្ឋាការដែលនៅសេសសល់ចំនួន ៤,០០០សន្លឹកមកវិញ ហើយកំពុងបន្តកសាងសំណុំរឿងដើម្បីបញ្ជូនជនសង្ស័យទៅកាន់តុលាការចាត់ការតាមនីតិវិធីច្បាប់យ៉ាងម៉ឺងម៉ាត់បំផុត។

ជារួមមក ករណីពីការប្រកាសបាត់ខ្លួនប្រែជាការដកតំណែង និងឃាត់ខ្លួនអតីតមន្ត្រីជាន់ខ្ពស់ក្រសួងការបរទេសរូបនេះ គឺជាសក្ខីកម្មមួយស្តែងឱ្យឃើញពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការកម្ចាត់មន្ត្រីខូចពុករលួយដែលហ៊ានលក់ឧត្តុង្គឧត្តមជាតិ។ ចំណាត់ការច្បាប់ដ៏ក្តៅគគុក និងម៉ឺងម៉ាត់របស់ ACU និងការចេញព្រះរាជក្រឹត្យដកតំណែងភ្លាមៗនៅពេលនេះ មិនត្រឹមតែជាការវះកាត់សាច់ស្អុយនៅក្នុងជួររដ្ឋាភិបាលប៉ុណ្ណោះទេ ប៉ុន្តែវាក៏ជាសារព្រមានដ៏មានឥទ្ធិពលទៅដល់មន្ត្រីដទៃទៀត មិនឱ្យយកតួនាទីរដ្ឋទៅបម្រើផលប្រយោជន៍ខុសច្បាប់ដែលបំផ្លាញកិត្យានុភាពជាតិលើឆាកអន្តរជាតិឡើយ៕