ថ្មីៗនេះ ឡូរីន បានបង្ហោះវីដេអូនៅលើ Story ក្នុងសកម្មភាពបើកបរដោយលើជើងម្ខាង។ ជុំវិញសកម្មភាពនេះបានបញ្ជាក់ថានាងមិនបានបើកបរដោយខ្លួនឯងញឹកញាប់នោះទេ ខណៈដែលនាងលើកជើងម្ខាងដោយសារតែមានអារម្មណ៍ស្រួលខ្លួននិងចង់សម្រាកជាមួយតន្រ្តី។ ការចេញមកបញ្ជាក់នេះដោយសារតែអ្នកលេងបណ្តាញសង្គមមួយចំនួនបញ្ចេញមតិរិះគន់។
ប្រិយមិត្តមួយចំនួនដែលតាមដានវិស័យសិល្បៈកម្សាន្តជ្រាបមកហើយថា ឡូរីន បានបង្ហាញពីការទិញឡានទំនើបកើតចេញពីកម្លាំងញើសឈាមរបស់ខ្លួនកាលពីថ្ងៃទី២ ខែកក្កដា ឆ្នាំ២០២៦ ព្រមទាំងបញ្ជាក់ថានាងមិនទាន់ចេះបើកឡាននោះទេ ហើយការទិញឡាននេះគឺដើម្បីរៀនបើក។ 
យ៉ាងណាមិញ ថ្មីៗនេះគេបានឃើញ ឡូរីន បង្ហោះវីដេអូនៅលើ Story ដោយរូបនាងគឺជាអ្នកបើកបរដោយផ្ទាល់ព្រមទាំងបញ្ចេញសកម្មភាពយ៉ាងរីករាយជាមួយនឹងតន្រ្តី។ នៅក្នុងនោះសកម្មភាពដែលបង្កឱ្យមានមតិវែកញែកនិងរិះគន់ពីអ្នកលេងបណ្តាញសង្គមទៅកាន់ ឡូរីន គឺនៅពេលនាងបើកបរដោយបានលើកជើងម្ខាង។
ក្នុងសកម្មភាពដែលបង្កឱ្យមានរឿងចម្រូងចម្រាសនេះនៅថ្ងៃទី២០ ខែសីហា ឡូរីន បានចេញមកបញ្ជាក់លើសកម្មភាពរបស់នាង។ តាមការបង្ហោះរបស់ស្រីស្អាតរូបនេះក្នុងសំណេរជាភាសាអង់គ្លេសដែលមានន័យជាភាសាខ្មែរថា «សួស្តីអ្នកទាំងអស់គ្នា ខ្ញុំគ្រាន់តែចង់និយាយថា ខ្ញុំមិនបើកបរដោយខ្លួនឯងរាល់ថ្ងៃទេខ្ញុំមានអ្នកបើកបរ។ ខ្ញុំលើកជើងម្ខាងឡើង ព្រោះខ្ញុំមានអារម្មណ៍ស្រួល គ្រាន់តែសម្រាកជាមួយតន្ត្រី គ្មានចរាចរណ៍ និងក្នុងល្បឿនយឺត។ ដូច្នេះខ្ញុំសង្ឃឹមថា អ្នកទាំងអស់គ្នាមិនប្រកាន់ ឬបារម្ភអំពីរឿងនេះទេ»។
គួរបញ្ជាក់ផងដែរថាដោយសារតែ ឡូរីន គឺជាមនុស្សម្នាក់ដែលមានប្រជាប្រិយភាពនៅលើបណ្តាញសង្គមដូច្នេះមិនថារាល់សកម្មភាពតូចឬធំតែងតែត្រូវបានសាធារណជនយកចិត្តទុកដាក់លើនាងជានិច្ច។ ជាពិសេសសកម្មភាពមួយចំនួនដែលអាចមានហានិភ័យគឺជាអ្វីដែលមានការជជែកវែកញែកច្រើន៕
