រស់នៅមិនចុះសម្រុង សួស វីសា និង ថមមី សម្រេចចិត្តលែងលះគ្នា

តារាចម្រៀស សួស វីសា បានប្រកាសជាសាធារណៈដោយបញ្ជាក់ថារូបនាងនិងលោក ថមមី បានសម្រេចចិត្តលែងលះគ្នាតាមផ្លូវច្បាប់លែងមានទំនាក់ទំនងក្នុងនាមជាប្តីប្រពន្ធទៀតហើយ។ ដំណឹងនេះបានធ្វើឱ្យអ្នកក្នុងចង្កោមសិល្បៈ មហាជនមានការភ្ញាក់ផ្អើលនិងសោកស្តាយយ៉ាងខ្លាំងចំពោះគូស្នេហ៍អ្នកសិល្បៈមួយគូនេះ។

នៅល្ងាចថ្ងៃទី១៨ ខែសីហា ឆ្នាំ២០២៦ តារាចម្រៀង សួស វីសា បានបង្ហោះរូប៣សន្លឹកជាមួយនឹងមេធាវីតំណាងក្តីរបស់ខ្លួនដោយបានបញ្ជាក់ថា «នៅថ្ងៃទី ១៨ ខែសីហា ឆ្នាំ២០២៦ នេះ នាងខ្ញុំ និងអតីតស្វាមី លោក ប៊ុនថុល ប៊ុនថង ហៅ (ថមមី) បានសម្រេចលែងលះគ្នាជាស្ថាពរតាមការព្រមព្រៀងតាមផ្លូវច្បាប់នៅសាលាដំបូងរាជធានីភ្នំពេញ។

ចាប់ពីថ្ងៃនេះតទៅយើងទាំងពីរមិនមានទំនាក់ទំនងក្នុងនាមជាប្តីប្រពន្ធតទៅទៀតឡើយ មូលហេតុរស់នៅមិនចុះសម្រុងនិងគ្នាហើយយើងសម្រេចដើរតាមផ្លូវរៀងៗខ្លួនដោយសន្តិភាព ដោយការគោរព និងមិនមានការចងគំនុំនិងគ្នាទេ»។ ជាមួយនឹងការប្រកាសនេះ តារាចម្រៀង សួស វីសា បានជំរុញឱ្យសាធារណជនគោរពតាមការសម្រេចចិត្តរបស់អ្នកទាំងពីរ។

មុននឹងឈានដល់ការប្រកាសលែងលះគ្នាជាផ្លូវការកាលពីខែឧសភា កន្លងមកនេះ សួស វីសា ធ្លាប់បានបង្ហាញពីបញ្ហារកាំរកូសនៅក្នុងរង្វង់គ្រួសារដោយឱ្យតម្រុយថានឹងក្លាយជាស្រ្តីមេម៉ាយឆាប់ៗដោយសារតែមានប្តីដូចអត់ប្តី។ ក្រោយមកអ្នកទាំងពីរក៏បានផ្សះផ្សាវិលមកជានាគ្នាវិញ។ ប៉ុន្តែយ៉ាងណាចំណងស្នេហានិងអាពាហ៍ពិពាហ៍នេះនៅតែមិនអាចថែរក្សាបាន។
អតីតគូស្នេហ៍សិល្បៈមួយគូនេះក្រៅពីអាជីពសិល្បៈគឺក្តោបក្តាប់ជំនួញជាច្រើននៅក្នុងដៃទាំងវិស័យអនឡាញ មានរោងចក្រទឹកកក វិស័យអចលនទ្រព្យ បង្កើតកម្មវិធីកម្សាន្តនិងមុខរបរជាច្រើនទៀត។

គូសបញ្ជាក់ថា សួស វីសា និង លោក ថមមី បានចំណាយទឹកប្រាក់ជាង ២០ម៉ឺនដុល្លារ សម្រាប់អាពាហ៍ពិពាហ៍របស់ពួកគេកាលពីថ្ងៃទី ២៩ ខែវិច្ឆិកា ឆ្នាំ២០១៩។ ក្នុងចំណងអាពាហ៍ពិពាហ៍រយៈពេលជិត៧ឆ្នាំមកនេះអ្នកទាំងពីរទទួលបានចំណងដៃមានកូនស្រីម្នាក់និងកូនប្រុសម្នាក់៕