អ្នកវិទ្យាសាស្ត្ររកឃើញផ្សិតចម្លែក ដែលធ្វើឱ្យអ្នកញ៉ាំស្រមើស្រម៉ៃមើលឃើញ «មនុស្សតូចៗ» ដើរពេញផ្ទះ

 តើវាជាផ្សិតអ្វីឲ្យប្រាកដ? រឿងរ៉ាវដ៏ចម្លែក និងហាក់បីដូចជាស្ថិតនៅក្នុងពិភពវេទមន្ត បានក្លាយជាប្រធានបទក្តៅគគុកនៅក្នុងពិភពវិទ្យាសាស្ត្រ បន្ទាប់ពីក្រុមអ្នកស្រាវជ្រាវនៃសាកលវិទ្យាល័យ Utah សហរដ្ឋអាមេរិក បានលាតត្រដាងអាថ៌កំបាំងដែលមានអាយុកាលរាប់រយឆ្នាំ ពាក់ព័ន្ធនឹងប្រភេទផ្សិតព្រៃម្យ៉ាង ដែលមានសមត្ថភាពធ្វើឱ្យមនុស្សមើលឃើញរូបភាពស្រមើស្រម៉ៃជា «មនុស្សតូចៗ» រាប់សិបនាក់ដើររញ៉េរញ៉ៃនៅក្នុងពិភពពិត។
 
 ផ្សិតព្រៃមួយប្រភេទនេះមានឈ្មោះវិទ្យាសាស្ត្រថា Lanmaoa asiatica។ វាសម្បូរនៅភាគខាងត្បូងប្រទេសចិន ជាពិសេសនៅក្នុងខេត្តយូនណាន អ្នកស្រុកស្គាល់ផ្សិតនេះយ៉ាងច្បាស់ក្រោមឈ្មោះថា Jian shou qing ដែលមានន័យថា «ប្រែជាពណ៌ខៀវពេលប៉ះពាល់» ដោយសារតែសាច់របស់វានឹងប្រែជាពណ៌ខៀវភ្លាមៗនៅពេលគេកាត់ ឬកាន់។ វាជាប្រភេទផ្សិតដែលមានឱជារសឆ្ងាញ់ពិសា និងមានតម្លៃថ្លៃខ្លាំងនៅលើទីផ្សារ ដោយសារតែវាផ្តល់នូវរសជាតិឆ្ងាញ់ប្លែនមិនដូចជាផ្សិតទូទៅ។
 
 ប៉ុន្តែអ្វីដែលជាគ្រោះថ្នាក់នោះគឺនៅត្រង់បច្ចេកទេសនៃការចំអិន។ ប្រសិនបើគេយកផ្សិតនេះទៅស្លរ ឬឆាឱ្យឆ្អិនល្អ វាគឺជាអាហារដ៏មានសុវត្ថិភាព 100% និងគ្មានបញ្ហាអ្វីទាំងអស់។ ប៉ុន្តែប្រសិនបើចម្អិនមិនទាន់ឆ្អិនល្អ ឬនៅឆៅនោះ បន្ទាប់ពីញ៉ាំរួចពី ១២ ទៅ ២៤ ម៉ោង វានឹងចាប់ផ្តើមធ្វើទុក្ខ បង្កើតជាបាតុភូតប្រសាទភ័ន្តភាំងយ៉ាងចម្លែកបំផុតមួយ។
 
លក្ខណៈពិសេសនៃការស្រវឹងផ្សិតប្រភេទនេះ គឺខុសប្លែកទាំងស្រុងពីសារធាតុញៀន ឬផ្សិតពុលទូទៅ។ មនុស្សប្រហែល ៩០% ដែលពុលផ្សិតនេះ បានរៀបរាប់បទពិសោធន៍ដូចៗគ្នាថា ពួកគេបានមើលឃើញរូបភាពមនុស្សតូចៗ រាប់សិប ឬរាប់រយនាក់ ដែលមានកម្ពស់ត្រឹមតែ ២ ទៅ ៣០ សង់ទីម៉ែត្រ ស្លៀកពាក់ខោអាវមានពណ៌ឆើតឆាយ ដើរឆ្លងកាត់មុខពួកគេ។
 អ្វីដែលរឹតតែគួរឱ្យភ្ញាក់ផ្អើលនោះគឺ មនុស្សតូចៗទាំងនោះមិនមែនគ្រាន់តែជាពន្លឺ ឬអណ្តែតលើអាកាសដូចការយល់សប្តិនោះទេ ប៉ុន្តែពួកគេដើរលើតុ ឡើងលើកៅអី តោងគ្រឿងសង្ហារិម តោងជញ្ជាំង ដូចជាមនុស្សពិតៗអញ្ចឹងដែរ។ ក្នុងអំឡុងពេលកើតហេតុ អ្នកដែលពុលផ្សិតនៅតែមានស្មារតីដឹងខ្លួនច្បាស់ថា អ្វីដែលពួកគេកំពុងឃើញគឺជារូបភាពភ័ន្តភាំងប៉ុណ្ណោះ ហើយឥទ្ធិពលនេះអាចអូសបន្លាយចាប់ពី ១ ថ្ងៃ រហូតដល់ទៅមួយសប្តាហ៍ឯណោះ។
អ្វីដែលធ្វើឱ្យក្រុមអ្នកវិទ្យាសាស្ត្រងឿងឆ្ងល់បំផុតនោះគឺ នៅពេលគេយក DNA និងហ្សែននៃផ្សិត Lanmaoa asiatica ទៅធ្វើកោសល្យវិច័យ គេបែរជាមិនបានរកឃើញសារធាតុញៀន Psilocybin ឬសារធាតុធ្វើឱ្យភ័ន្តភាំងដែលវិទ្យាសាស្ត្រធ្លាប់ស្គាល់ពីមុនមកទាល់តែសោះ។
 
 ការរកឃើញនេះបានបញ្ជាក់ថា នៅក្នុងផ្សិត Lanmaoa asiatica គឺមានសារធាតុគីមី ឬប្រូតេអ៊ីនប្លែកថ្មីស្រឡាងមួយទៀត ដែលវិទ្យាសាស្ត្រមិនទាន់ស្គាល់នៅឡើយ។ ក្រុមអ្នកស្រាវជ្រាវជឿជាក់ថា ការស្វែងយល់ និងទាញយកសារធាតុប្លែកថ្មីនេះមកសិក្សា អាចនឹងក្លាយជាកូនសោដ៏សំខាន់ក្នុងការជួយឱ្យវិទ្យាសាស្ត្រវេជ្ជសាស្ត្រយល់កាន់តែស៊ីជម្រៅ អំពីរបៀបដែលខួរក្បាលមនុស្សបង្កើតរូបភាព និងដំណើរការប្រព័ន្ធប្រាសាទមើលឃើញនៅក្នុងជីវិតពិត៕