ដើរមុនពិភពលោកមួយជំហាន! ចិនដាក់ចេញ AI ជំនាន់ថ្មី អាចបង្កើតវីដេអូក្នុងពេលតែ ១វិនាទី

ក្រុមហ៊ុនចិន AiSphere បញ្ចេញបច្ចេកវិទ្យា “AI World Model” (R-series) អាចបង្កើតវីដេអូ Real-time ក្នុងពេល ១វិនាទី ដើម្បីធ្វើបដិវត្តន៍វិស័យ E-commerce ស្របពេលបច្ចុប្បន្នមានអ្នកប្រើប្រាស់កើនដល់ ១៥០លាននាក់ ក្នុង ១៧០ប្រទេស និងធ្វើឱ្យចំណូលក្រុមហ៊ុនហក់ឡើង ១១៥.៣ភាគរយ។

ពិភពលោកកំពុងបើកទំព័រថ្មី! ក្រុមហ៊ុនចិនលេងធម៌ក្តៅបញ្ចេញ AI ជំនាន់ថ្មី “AI World Model” ដំបូងគេបង្អស់នៅលើពិភពលោក ដែលមានសមត្ថភាពអាចបង្កើតវីដេអូ និងចលនារស់រវើកបានភ្លាមៗក្នុងពេលជាក់ស្តែង (Real-time) ត្រឹមតែមួយប៉ព្រិចភ្នែក ដោយគ្រាន់តែបញ្ចូលរូបថត អត្ថបទ ឬសំឡេងប៉ុណ្ណោះ។
 
យោងតាមការចុះផ្សាយរបស់ប្រព័ន្ធផ្សព្វផ្សាយចិន បច្ចេកវិទ្យា “R-series” នេះ មិនត្រឹមតែបង្កើតរូបភាពចលនាធម្មតានោះទេ ប៉ុន្តែវាមានសមត្ថភាពវិភាគទិន្នន័យចលនា និងយល់ដឹងពីទិដ្ឋភាពពិភពលោក ដើម្បីរៀបចំក្រាហ្វិកវីដេអូឱ្យមានលក្ខណៈរូបសាស្ត្រធម្មជាតិដូចពិភពពិតៗ មិនថាតែរូបភាពបែប Fantasy ដូចជាតួអង្គ ស៊ុន អ៊ូខុង ឬទិដ្ឋភាពហ្គេមឡានប្រណាំងនោះឡើយ។ របកគំហើញនេះត្រូវបានគេរំពឹងថានឹងមកធ្វើបដិវត្តន៍ និងផ្លាស់ប្តូរមុខមាត់ថ្មីនៃវិស័យពាណិជ្ជកម្មអេឡិចត្រូនិក (E-commerce) ទាំងស្រុង ព្រោះអ្នកលក់ដូរអនឡាញគ្រាន់តែបញ្ចូលរូបថតផលិតផល និងការពិពណ៌នា នោះ AI នឹងបង្កើតជាវីដេអូផ្សព្វផ្សាយពាណិជ្ជកម្មដ៏ទាក់ទាញបានភ្លាមៗ ដោយមិនបាច់ចំណាយពេល និងកាត់បន្ថយថ្លៃដើមយ៉ាងច្រើនសន្ធឹកសន្ធាប់បើធៀបនឹងវិធីសាស្ត្រថតបែបបុរាណ។
 
ជុំវិញភាពជោគជ័យដ៏ហក់លោតនេះ លោក Jin Hanmin អនុប្រធានក្រុមហ៊ុន AiSphere បានទម្លាយទិន្នន័យថា គិតត្រឹមឆមាសទី១ ឆ្នាំ២០២៦ នេះ ផលិតផល AI របស់ខ្លួនត្រូវបានដាក់ឱ្យដំណើរការរហូតដល់ទៅ ១៧០ ប្រទេស និងមានអ្នកចុះឈ្មោះប្រើប្រាស់កើនឡើងដល់ជាង ១៥០ លាននាក់នៅទូទាំងពិភពលោក។ ប្រភពដដែលបានបន្តថា គិតត្រឹមរយៈពេលដូចគ្នានេះ ចំណូលសរុបរបស់ក្រុមហ៊ុនបានហក់ឡើងរហូតដល់ ១១៥.៣ ភាគរយ បើធៀបនឹងឆមាសទី១ ឆ្នាំមុន ខណៈដែលចំនួនអ្នកប្រើប្រាស់សរុបបានកើនឡើងប្រចាំឆ្នាំរហូតដល់ ៩៧.៧ ភាគរយ ដែលជាតួលេខដ៏មហិមាមួយបង្ហាញពីការគាំទ្រយ៉ាងខ្លាំងពីសំណាក់វិនិយោគិន និងអ្នកបង្កើតមាតិកាអន្តរជាតិ។
 
ជារួមមក របកគំហើញបច្ចេកវិទ្យា “AI World Model” របស់ក្រុមហ៊ុន AiSphere នៅពេលនេះ គឺជាសញ្ញាណឆ្លុះបញ្ចាំងថា បច្ចេកវិទ្យាបញ្ញាសិប្បនិម្មិតកំពុងដើរលឿនជាងការគិតរបស់មនុស្ស។ សមត្ថភាពបង្កើតវីដេអូកម្រិត Real-time នេះ មិនត្រឹមតែជួយសម្រួលដល់ការធ្វើអាជីវកម្មអនឡាញ និងការបង្កើតហ្គេមប៉ុណ្ណោះទេ ប៉ុន្តែវាក៏បានបើកផ្លូវឱ្យមនុស្សជាតិអាចឈានទៅបង្កើតពិភពនិម្មិតមួយដ៏រស់រវើក និងប្រកបដោយភាពច្នៃប្រឌិតខ្ពស់បំផុតនាពេលអនាគត៕