ថៃរួមដៃជាមួយអ៊ីស្រាអែល យកដ្រូនយោធាគ្មាន GPS មកសាកល្បងដល់ព្រំដែនកម្ពុជា

ថៃ និងអ៊ីស្រាអែល បានចាប់ដៃសហការគ្នាដោយយកដ្រូនយោធា Aero Sentinel ដែលមានសមត្ថភាពហោះហើរគ្មាន GPS មកសាកល្បងនៅកៀកព្រំដែនកម្ពុជា ចំពេលបទឈប់បា.ញ់ជាមួយកម្ពុជាកំពុងស្ថិតក្នុងភាពផុយស្រួយ និងមិនទាន់មានស្ថិរភាព ដែលទង្វើនេះរងការរិះគ.ន់យ៉ាងខ្លាំងថាជាការបង្កហេតុ និងបំផ្លា.ញស្មារតីសន្តិភាពព្រំដែន។

ដើរផ្ទុយពីស្មារតីសន្តិភាព! ខណៈបទឈប់បាញ់រវាងកម្ពុជា-ថៃកំពុងស្ថិតនៅក្នុងភាពផុយស្រួយ និងមិនទាន់មានស្ថិរភាពច្បាស់លាស់ ភាគីថៃបានបង្កការភ្ញាក់ផ្អើលយ៉ាងខ្លាំង ដោយរួមដៃជាមួយក្រុមហ៊ុនបច្ចេកវិទ្យាយោធាអ៊ីស្រាអែល នាំយកដ្រូនស៊ើបការណ៍កម្រិតខ្ពស់មកហោះហើរសាកល្បងសមត្ថភាពនៅកៀកខ្សែបន្ទាត់ព្រំដែនកម្ពុជា ដែលទង្វើនេះរងការរិះគន់ថាជាការបង្កហេតុ និងបំផ្លាញសន្តិភាពព្រំដែន។
 
យោងតាមការចុះផ្សាយរបស់ទស្សនាវដ្តីយោធាអន្តរជាតិ The Defence Blog កងនគរបាលល្បាតព្រំដែនថៃ បានសហការជាមួយក្រុមហ៊ុន Aero-Sentinel ដែលមានទីស្នាក់ការកណ្តាលនៅទីក្រុង Petah Tikva ប្រទេសអ៊ីស្រាអែល ដើម្បីរៀបចំប្រតិបត្តិការសាកល្បងយានដ្រូនយុទ្ធសាស្ត្រឃ្លាំមើលប្រភេទ Sentinel នៅតាមភូមិសាស្ត្រព្រំដែនជាប់ប្រទេសកម្ពុជា។ យានដ្រូនស៊ើបការណ៍ទំនើបប្រភេទនេះ ត្រូវបានរចនាឡើងយ៉ាងពិសេសឱ្យមានសំឡេងម៉ាស៊ីនស្ងាត់ និងមានសមត្ថភាពអាចធ្វើប្រតិបត្តិការស៊ើបការណ៍ ព្រមទាំងកំណត់គោលដៅវាយប្រហារបានយ៉ាងត្រឹមត្រូវបំផុត ទោះបីជាស្ថិតក្នុងស្ថានភាពដែលត្រូវរងការវាយប្រហារ ស្ទាក់ចាប់ ឬបំប្លែងប្រព័ន្ធសញ្ញាអេឡិចត្រូនិច និងផ្ដាច់ប្រព័ន្ធ GPS ផ្កាយរណបក៏ដោយ ដោយសារវាប្រើប្រាស់ប្រព័ន្ធបច្ចេកវិទ្យាតម្រង់ទិសដៅផ្អែកលើរូបភាព (Visual Navigation) ជំនួសវិញ។
 
ការនាំយកបច្ចេកវិទ្យាយោធាទំនើបប្រឆាំងការស្ទាក់ចាប់ (Anti-Jamming) របស់អ៊ីស្រាអែលមកហោះហើរសាកល្បងដល់សមរភូមិជួរមុខនៅពេលនេះ បានធ្វើឡើងចំពេលដែលបទឈប់បាញ់ និងស្ថានភាពព្រំដែនកម្ពុជា-ថៃ បានបន្តស្ថិតក្នុងភាពតានតឹងជាងមួយឆ្នាំមកហើយ (តាំងពីពាក់កណ្តាលឆ្នាំ២០២៥) ក្រោយការប៉ះទង្គិចគ្នា និងការចោទប្រកាន់រឿងដ្រូនមិនស្គាល់អត្តសញ្ញាណ។ ក្រុមអ្នកវិភាគភូមិសាស្ត្រនយោបាយបានរិះគន់យ៉ាងចាស់ដៃថា សកម្មភាពសម្ញាញអាវុធនិងបច្ចេកវិទ្យាដែលបានមកពីការរួមដៃជាមួយបរទេសរបស់យោធាថៃនៅពេលនេះ គឺជាទង្វើបង្កហេតុការទូតដ៏គួរឱ្យព្រួយបារម្ភ និងពិបាកនឹងទទួលយកបានណាស់សម្រាប់ភាគីកម្ពុជា ព្រោះវាបានដើរផ្ទុយទាំងស្រុង និងបំផ្លាញស្មារតីនៃកិច្ចព្រមព្រៀងសន្តិភាព ព្រមទាំងកិច្ចចរចាព្រំដែនដោយសន្តិវិធីរវាងប្រទេសជិតខាងទាំងពីរ។
 
ជារួមមក សកម្មភាពសាកល្បងដ្រូនយោធារបស់ថៃ និងអ៊ីស្រាអែលនៅតាមបណ្តោយព្រំដែនកម្ពុជានៅពេលនេះ បានឆ្លុះបញ្ចាំងឱ្យឃើញថា យោធាថៃហាក់កំពុងលួចលាក់ត្រៀមលក្ខណៈសម្រាប់សង្គ្រាមអេឡិចត្រូនិច និងដាក់សម្ពាធផ្លូវចិត្តមកលើកងទ័ពជួរមុខ។ ការណ៍នេះទាមទារឱ្យមានការតាមដានយ៉ាងយកចិត្តទុកដាក់ពីភាគីកម្ពុជា ដើម្បីការពារអធិបតេយ្យភាពជាតិ និងធានាថាបទឈប់បាញ់ព្រំដែនគោក នឹងមិនត្រូវរងការរំលោភបំពាន ឬបំផ្លិចបំផ្លាញដោយសារតែល្បិចកលយោធារបស់ភាគីម្ខាងទៀតនោះឡើយ៕