អ្នកនាង ចំប៉ារ័ត្ន ដែលទស្សនិកជនស្គាល់ថាជាអ្នក Reviews ម្ហូបអាហារបានរងនូវមតិរិះគន់ជាច្រើនពីអ្នកលេងបណ្តាញសង្គមបន្ទាប់ពីអ្នកនាងបាននិយាយនៅក្នុងកម្មវិធីផតខាស់ថាការថតវីដេអូរបស់ខ្លួនមួយចំនួនគឺពុំបានសុំការអនុញ្ញាតជាមុននោះទេ។ ជាមួយនឹងពាក្យរិះគន់អ្នកលេងបណ្តាញសង្គមជំរុញឱ្យអ្នក Reviews រូបនេះគួរតែសុំគេជាមុនសិនមុននឹងថត។
ថ្មីៗនេះអ្នកនាង ចំប៉ារ័ត្ន និងស្វាមី បានចូលរួមក្នុងកម្មវិធីផតខាស់របស់ ខេ ដោយបានលើករឿងរ៉ាវមួយចំនួនទាំងការងារនិងជីវិតឯកជនហើយនេះគឺជាសកម្មភាពដ៏កម្រសម្រាប់អ្នក Reviews ម្ហូបអាហាររូបនេះដែលចូលរួមក្នុងកិច្ចសម្ភាស។ ឆ្លងកាត់ធ្វើជាអ្នកធ្វើមាតិកាខាងម្ហូបអាហារច្រើនឆ្នាំអ្នកនាង ចំប៉ារ័ត្ន បានទទួលស្គាល់ថាពេលខ្លះគឺត្រូវរងនូវពាក្យសម្តីរិះគន់ពីអ្នកទស្សនាជាច្រើន។
នៅក្នុងវីដេអូនោះអ្នកនាង ចំប៉ារ័ត្ន បាននិយាយថាការថតរបស់ខ្លួនគឺឆៅៗមិនបានសុំការអនុញ្ញាត។ ត្រង់ចំណុចនេះអ្នក Reviews រូបនេះបាននិយាយថានៅពេលមានការសុំមិនប្រាកដថាគេឱ្យថតនោះទេព្រមទាំងបញ្ជាក់ថាការងារពីដើមរបស់ខ្លួនគឺបែបនេះ។ ទោះយ៉ាងណាអ្នកនាង ចំប៉ារ័ត្ន ថាមានការសុំអនុញ្ញាតលុះត្រាតែជាហាងដោយសារតែដំបូងៗគឺមិនមានថវិកាដោយប្រាប់ទៅកាន់ហាងមុនដើម្បីអាចនឹងមានការផ្តល់ជាអាហារឱ្យខ្លួនប្រសិនជាចង់ថតអាហារថ្លៃៗ។
អ្នកនាង ចំប៉ារ័ត្ន ថាប្រសិនជាទៅតាមខេត្ត ឬអាហារតាមផ្លូវគឺមិនបានសុំនោះទេដោយសារតែថតកាម៉េរាធំមិនមែនទូរសព្ទ ដូច្នេះមានពេលខ្លះគេចង់ជេរ ចង់វាយ ថែមទៀត។ អ្នក Reviews រូបនេះបន្តទៀតថាប្រសិនបើថតជាមួយនឹងក្រុមការងារគឺខ្លួនបានឱ្យក្រុមការងារជាអ្នកសុំប៉ុន្តែបើរូបនាងជាអ្នកថតវិញគឺមិនដែលសុំឡើយ។
ពាក្យសម្តីខាងលើនេះបានជំរុញឱ្យអ្នកលេងបណ្តាញសង្គមបញ្ចេញមតិប្រតិកម្មយ៉ាងខ្លាំងមកកាន់អ្នកនាង ចំប៉ារ័ត្ន។
អ្នកលេងបណ្តាញសង្គមបានលើកឡើងថា«សំណូមពរដល់ អ្នកធ្វើមាតិកាទាំងឡាយថា ប្រសិនបងប្អូនចង់ ថតមាតិកា សូមមេត្តាសុំ ការអនុញ្ញាតពីម្ចាស់ទីតាំង ឬម្ចាស់សមីខ្លួនសិន ព្រោះការ ថតដោយមិនសុំការអនុញាត្តវាជាទង្វើ គ្មានសុជីវធម៌ និងរំលោភសិទ្ធឯកជន។ , ទោះមិនថតដោយមុខក៏ត្រូវសុំការអនុញ្ញាតពីសាមីខ្លួនគេជាមុនដែរ។ សីលធម៌ គឺសំខាន់ មិនថា អ្នកមានគោលបំណងជួយលើកតម្កើនការលក់ របស់ពួកគាត់ក៏ដោយ»។ អ្នកផ្សេងទៀតបានលើកឡើងថា «សុំគ្មានខុសអី ហេតុអីមិនសុំពួកគាត់ពាក្យគួរសម, អត់សីលធម៌សោះ ថតអត់ចេះសុំគេមុនចឹង»។
នៅក្នុងការរៀបរាប់នេះអ្នកនាង ចំប៉ារ័ត្ន បានពន្យល់ដែរថាការថតឆៅៗទាំងនេះដោយសារតែចង់បានទិដ្ឋភាពស្តែងៗដោយមិនមានការរៀបចំទុកជាមុនឡើយ៕
