ទិដ្ឋភាពពិត ស្ថានភាពពិតឃើញផ្ទាល់នឹងភ្នែក! លោក Wang Wenbin ឯកអគ្គរដ្ឋទូតចិនប្រចាំនៅកម្ពុជា បានចុះទៅផ្ទាល់ដល់ទីតាំងជំរុំស្នាក់នៅរបស់បងប្អូនភៀសសឹកកម្ពុជា និងបានផ្ដិតយករូបភាពនៃទុក្ខលំបាកជាក់ស្ដែង បង្ហាញប្រាប់ជាសាធារណៈថា ពលរដ្ឋខ្មែរស្លូតត្រង់ច្រើនណាស់ត្រូវរងទុក្ខវេទនាបាត់បង់ផ្ទះសម្បែងដោយសារសង្រ្គាមព្រំដែន។ វត្តមានរបស់អគ្គរដ្ឋទូតមហាអំណាចសកលនៅសមរភូមិជួរមុខនាពេលនេះ គឺជាសក្ខីភាពការទូតដ៏រឹងមាំមួយ ក្នុងការនាំយកការពិតមិនអាចប្រកែកបានទៅលាតត្រដាងនៅលើឆាកអន្តរជាតិ។
យោងតាមការចុះផ្សាយផ្លូវការរបស់ទំព័រផេក ឯកឧត្តម វ៉ាង វិនប៊ិន (Wang Wenbin) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា បានឲ្យដឹងថា នៅថ្ងៃទី៣ ខែសីហា ឆ្នាំ២០២៦ ឯកឧត្តមបានអញ្ជើញចុះជួបប្រជាពលរដ្ឋភៀសសឹកខ្មែរ ដែលកំពុងស្នាក់នៅបណ្តោះអាសន្ន ក្នុងមណ្ឌលសុវត្ថិភាពចក្កពោធិ៍អន្ទ្រាម (ហៅវត្តបាក់កាំ) ស្ថិតក្នុងភូមិបាក់កាំ ឃុំណាមទូក ស្រុកត្រាំងមានជ័យ ខេត្តព្រះវិហារ។ នៅក្នុងឱកាសនោះ ឯកឧត្តម Wang Wenbin បានសម្តែងនូវក្តីអាណិតអាសូរ និងការព្រួយបារម្ភយ៉ាងជ្រាលជ្រៅបំផុត ចំពោះសុខទុក្ខ និងជីវភាពរស់នៅដ៏លំបាកលំបិនរបស់ប្រជាពលរដ្ឋស្លូតត្រង់ទាំងអស់ ដែលមិនទាន់អាចវិលត្រឡប់ទៅកាន់លំនៅឋានវិញបាន ដោយសារតែផលប៉ះពាល់ដ៏ធ្ងន់ធ្ងរនៃជម្លោះប្រដាប់អាវុធនៅតាមខ្សែបន្ទាត់ព្រំដែន។
ដើម្បីចូលរួមចំណែកសម្រាលទុក្ខលំបាក និងការលំបាកចំពោះមុខរបស់បងប្អូនប្រជាពលរដ្ឋ ឯកអគ្គរដ្ឋទូតចិន បានអញ្ជើញនាំយកអំណោយសង្គ្រោះបន្ទាន់ និងស្បៀងអាហារមនុស្សធម៌ជាច្រើន ចែកជូនដល់ដៃប្រជាពលរដ្ឋភៀសសឹកគ្រប់ៗគ្នា។ ឯកឧត្តម Wang Wenbin បានមានប្រសាសន៍សង្កត់ធ្ងន់ថា អំណោយមនុស្សធម៌ទាំងអស់នេះ គឺស្តែងចេញពីបេះដូង និងមនោសញ្ចេតនាស្រឡាញ់រាប់អានដ៏ស្មោះស្ម័គ្ររបស់ប្រជាជន និងរដ្ឋាភិបាលចិន ស្របតាមស្មារតីនៃកិច្ចសហប្រតិបត្តិការ «មិត្តភាពដែកថែប» រវាងប្រទេសទាំងពីរ កម្ពុជា-ចិន ក្នុងគោលបំណងចាត់ចែងជួយសម្រាលការលំបាកក្នុងឆាកជីវិតរបស់បងប្អូនក្នុងគ្រាមានអាសន្ន។
ជាការឆ្លើយតប លោក គីម រិទ្ធី អភិបាលនៃគណៈអភិបាលខេត្តព្រះវិហារ ព្រមទាំងថ្នាក់ដឹកនាំ អាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ បានសម្តែងនូវការដឹងគុណ និងអំណរគុណយ៉ាងជ្រាលជ្រៅបំផុត ចំពោះទឹកចិត្ត សមានចិត្ត និងកាយវិការប្រកបដោយធម៌មេត្តាដ៏ថ្លៃថ្លារបស់រដ្ឋាភិបាល និងប្រជាជនចិន តាមរយៈឯកឧត្តម Wang Wenbin និងសហការីទាំងអស់។ សកម្មភាពមនុស្សធម៌របស់ស្ថានទូតចិននៅពេលនេះ មិនត្រឹមតែជាការផ្តល់ស្បៀងអាហារ និងសម្ភារប្រើប្រាស់ប៉ុណ្ណោះទេ ប៉ុន្តែវាគឺជាការផ្តល់នូវកម្លាំងចិត្ត ភាពកក់ក្តៅ និងជាសក្ខីភាពបង្ហាញពីសាមគ្គីភាពដ៏រឹងមាំរវាងប្រជាជាតិទាំងពីរ ដែលមិនធ្លាប់បោះបង់គ្នាចោលនៅក្នុងកាលៈទេសៈដ៏លំបាកឡើយ។
ដំណើរទស្សនកិច្ចរបស់ឯកអគ្គរដ្ឋទូតចិន លោក Wang Wenbin ទៅកាន់ជំរុំជនភៀសសឹកនៅក្នុងខេត្តព្រះវិហារនាពេលនេះ បានក្លាយជាកញ្ចក់ឆ្លុះបញ្ចាំងការពិតដ៏មានឥទ្ធិពលបំផុតទៅកាន់ឆាកអន្តរជាតិ។ វត្តមានរបស់មហាមិត្តចិននៅក្បែរកម្ពុជាក្នុងគ្រាមានអាសន្ន មិនត្រឹមតែជួយសម្រាលទុក្ខលំបាកផ្នែកស្បៀងអាហារប៉ុណ្ណោះទេ ប៉ុន្តែវាគឺជាសក្ខីភាពរស់លាតត្រដាងការពិតជាក់ស្តែងនៅលើដី ជុំវិញទុក្ខវេទនារបស់ជនភៀសសឹកខ្មែរ ដើម្បីឱ្យសហគមន៍អន្តរជាតិបានឃើញច្បាស់ និងរួមគ្នាស្វែងរកយុត្តិធម៌ពិតប្រាកដជូនដល់ប្រជាពលរដ្ឋរងគ្រោះសឹកសង្គ្រាមនៅតាមព្រំដែន៕
