បន្ទាប់ពីតារាសម្តែងវ័យក្មេង អាង សុជាតា និងម្តាយ បង្ហាញថាឡានរបស់ខ្លួនត្រូវបានគេលួចតាមដានដាក់ GPS ធ្វើឱ្យមហាជនភ្ញាក់ផ្អើលយ៉ាងខ្លាំងព្រោះកន្លងមកធ្លាប់តែឃើញក្នុងរឿងភាគប៉ុណ្ណោះ។ ជុំវិញហេតុការណ៍នេះម្តាយរបស់ អាង សុជាតា បានបង្ហើបថាមូលហេតុនៃការដាក់ GPS កើតចេញពីការតាមស្រលាញ់គេម្នាក់ឯង។
នៅរសៀលថ្ងៃទី៣០ ខែសីហា កញ្ញា អាង សុជាតា បានបង្ហោះជាសាធារណៈដើម្បីការពារខ្លួនបន្ទាប់ពីបានដឹងថាមានអ្នកលួចដាក់ GPS (ប្រភេទដុំឆក់ ) លើឡានរបស់នាងហើយថែមទាំងដឹងថានរណាជាអ្នកដាក់ទៀតខណៈនាកំពុងរៀបចំតាមផ្លូវច្បាប់ដូចគ្នា។ 
តារាសម្តែងវ័យក្មេងរូបនេះបន្តរៀបរាប់ថា «បងប្អូនប្រហែលជាឆ្ងល់ហេតុអ្វីលួចដាក់បាន?? ខ្ញុំបើកហាងញាំអី ហើយបុគ្គលម្នាក់នោះជាភ្ញៀវ បុគ្គលម្នាក់នោះមកជាញឹកញាប់ ខ្ញុំក៏មិនចាប់អារម្មណ៍ តែក្រោយមកគ្រប់ពេលខ្ញុំនៅកន្លែងណាខ្ញុំឃើញបុគ្គលម្នាក់ហ្នឹងតាមខ្ញុំរហូត ខ្ញុំនិងម៉ាក់កើតការសង្ស័យយក៏ដូរឡានគ្នាជិះ ( ខ្ញុំជិះឡានម៉ាក់វិញ ) ហើយស្អែកឡើងពិតជាឃើញបុគ្គលម្នាក់នោះទៅតាមឡានខ្ញុំមែន តែជាម៉ាក់ខ្ញុំអ្នកជិះ ពេលវេលាដូចរាល់ដង គ្រប់ពេលដែលខ្ញុំទៅដល់កន្លែងនោះប្រហែលជិតមួយម៉ោងគឺឃើញមុខបុគ្គលម្នាក់ហ្នឹងដូចគ្នា។ ខ្ញុំផុសនេះដើម្បីការពារខ្លួនខ្ញុំហ្នឹងក្រុមគ្រួសារខ្ញុំ ខ្ញុំមានរូបភាព ភ័ស្តុតាងទាំងអស់»។
បន្ទាប់ពី អាង សុជាតា លាតត្រដាងរឿងនេះហើយបានធ្វើឱ្យអ្នកគាំទ្រនិងអ្នកក្នុងចង្កោមសិល្បៈមានការភ្ញាក់ផ្អើលយ៉ាងខ្លាំងនិងជំរុញឱ្យនាងថែរក្សាសុវត្ថិភាពផ្ទាល់ខ្លួន។
ជាមួយគ្នានេះដែរតារាសម្តែង សឿន ផាភួង ដែលជាម្តាយរបស់ អាង សុជាតា ក៏បានបញ្ជាក់ហេតុការណ៍នេះនៅលើបណ្តាញសង្គមដូចគ្នា។ តារាសម្តែង សឿន ផាភួង បានហៅបុគ្គលដែលលួចដាក់ GPS នេះជាមនុស្សរោគចិត្ត ដែលតាមដានជីវិតម្តាយកូនរបស់អ្នកទាំងពីរ។ អ្នកស្រីក៏បានបញ្ជាក់ពីមូលហេតុដែលជននេះលួចដាក់ GPS ដោយសារតែលួចស្រលាញ់គេម្នាក់ឯង។ នេះមានន័យថាជនដែលដាក់នោះគឺតាមស្រលាញ់ អាង សុជាតា៕
