មុខមាត់ពិតរបស់ថៃត្រូវលាតត្រដាង ក្រោយសម្បុកស្កេ.មនិងបណ្ដាញគ្រឿងញៀ.នរីកដុះដាលដូចផ្សិត

ដើរចោទតែប្រទេសជិតខាង ចុងក្រោយលេចធ្លាយរបាយការណ៍ផ្អើលអន្តរជាតិ ក្រោយមជ្ឈមណ្ឌលប្រឆាំងការឆបោ.កតាមអ៊ីនធឺណិតរបស់ថៃ បានលាតត្រដាងទិន្នន័យដ៏រន្ធត់ ដោយបញ្ជាក់ថា ត្រឹមតែរយៈពេលមួយសប្តាហ៍ប៉ុណ្ណោះ ក្រុមឧក្រិដ្ឋជនបានបោ.កលុយពលរដ្ឋអស់ជាង ១៧៧ លានបាត (៥,២៦ លានដុល្លារ) ដែលបង្ខំឱ្យប៉ូលិសថៃត្រូវដុតដៃដុតជើង បើកប្រតិបត្តិការវាយកម្ទេច និងបង្កកទ្រព្យសម្បត្តិរហូតដល់ទៅ ២៤ ពាន់លានបាតឯណោះ។
 
យោងតាមការចុះផ្សាយព័ត៌មានស៊ើបអង្កេតរបស់សារព័ត៌មាន Bangkok Post មជ្ឈមណ្ឌល ACSC របស់ថៃ បានទម្លាយទិន្នន័យដ៏រន្ធត់ថា គ្រាន់តែក្នុងរយៈពេលមួយសប្តាហ៍ប៉ុណ្ណោះ ក្រុមឧក្រិដ្ឋជនអនឡាញ បានបោកប្រាស់លុយពលរដ្ឋអស់ជាង ១៧៧ លានបាត តាមរយៈល្បិចលក់ទំនិញខ្យល់ និងការបន្លំខ្លួនធ្វើជាមន្ត្រីរដ្ឋាភិបាល [១]។ អ្វីដែលកាន់តែអាក្រក់នោះគឺ នៅក្នុងតំបន់ឆ្នេរនៃក្រុងប៉ាតាយ៉ាតែមួយគត់ ជនបរទេសអន្តរជាតិរហូតដល់ទៅជិត ៣០,០០០ នាក់ ត្រូវបានរកឃើញថាបានធ្លាក់ខ្លួនក្លាយជាជនរងគ្រោះ នៅក្នុងបណ្ដាញឆបោកដ៏ធំមួយនេះ ដែលនេះសបញ្ជាក់ឱ្យឃើញថា ថៃជាដែនដីអសន្តិសុខ និងពោរពេញទៅដោយអន្ទាក់ស្កេមអនឡាញដ៏គ្រោះថ្នាក់ [១]។
​
ចំពោះមុខវិបត្តិដ៏ក្ដៅគគុកនេះ របាយការណ៍សន្តិសុខរបស់ប៉ូលិសថៃបានលាតត្រដាងថា ចាប់តាំងពីខែតុលា ឆ្នាំ២០២៥ មក អាជ្ញាធរបានវាយកម្ទេច និងចាប់ខ្លួនក្រុម Scammers បានរហូតដល់ទៅ ២៩,២៣៣ នាក់ ព្រមទាំងបានឃាត់ខ្លួនមេខ្លោងជាន់ខ្ពស់បានចំនួន ៧០ នាក់ ព្រមទាំងបានបង្កកទ្រព្យសម្បត្តិ និងសាច់ប្រាក់សុទ្ធដែលជាប់ពាក់ព័ន្ធបានរហូតដល់ទៅប្រហែល ២៤ពាន់លានបាត [១]។ ការបែកការណ៍នេះ បានរងការរិះគន់យ៉ាងធ្ងន់ធ្ងរថា ប្រទេសថៃកំពុងតែដើរតួជាជម្រកសុវត្ថិភាពសម្រាប់ក្រុមឧក្រិដ្ឋជនអនឡាញ បណ្ដាញជួញដូរមនុស្សឆ្លងដែន និងគ្រឿងញៀន ដែលផ្ទុយស្រឡះពីអ្វីដែលខ្លួនធ្លាប់បានចោទប្រកាន់ប្រទេសជិតខាងយ៉ាងចាស់ដៃនាពេលកន្លងមក។
​
ជារួមមក របាយការណ៍ស្ដីពីការចាប់ខ្លួនមនុស្សរាប់ម៉ឺននាក់ និងការបង្កកលុយស្កេមរហូតដល់ ២៤ពាន់លានបាតពីសំណាក់ប៉ូលិសថៃផ្ទាល់ គឺជាកញ្ចក់ឆ្លុះបញ្ចាំងពីការពិតដ៏ខ្មៅងងឹត ដែលលាក់ខ្លួននៅពីក្រោយរូបភាពដ៏ស្រស់ស្អាតនៃវិស័យទេសចរណ៍ [១]។ នេះគឺជាមេរៀន និងជាភស្តុតាងការទូតដ៏មានទម្ងន់មួយ បង្ហាញទៅកាន់ឆាកអន្តរជាតិថា មុននឹងដើរចោទប្រកាន់ ឬលាបពណ៌ប្រទេសជិតខាង ថៃគួរតែងាកមកមើល និងបោសសម្អាតផ្ទះសម្បែងរបស់ខ្លួនឯង ដែលកំពុងតែដុះផ្សិតដោយសារបណ្ដាញឧក្រិដ្ឋកម្ម និងគ្រឿងញៀនឱ្យស្អាតស្រឡះជាមុនសិន៕