Zhao Liying ខកខានការសម្តែងជាង១ឆ្នាំខណៈពិបាករកគម្រោងសមស្របនឹងខ្លួន

យោងតាម QQ បន្ទាប់ពីឈ្នះពានរង្វាន់ធំៗ Zhao Liying បានផ្អាកការទទួលយកគម្រោងថ្មីៗដោយមិននឹកស្មានដល់។ «The Belief» គឺជាគម្រោងមួយក្នុងចំណោមគម្រោងមួយចំនួនដែលនៅសេសសល់របស់ Zhao Liying ប៉ុន្តែតារាស្រីរូបនេះគ្រាន់តែដើរតួជាភ្ញៀវកិត្តិយសប៉ុណ្ណោះ។

ប្រភពដដែលបញ្ជាក់ថាប្រសិនបើ Zhao Liying មិនសម្តែងខ្សែភាពយន្តថ្មីណាមួយទេ នាងអាចនឹងអវត្តមានពីអេក្រង់ទូរទស្សន៍អស់រយៈពេលជិតពីរឆ្នាំ។ ខ្សែភាពយន្តពីរចុងក្រោយបង្អស់របស់ Zhao Liying គឺ «What a Wonderful World» និង «The Dream Maker» ទាំងពីរមិនទទួលបានជោគជ័យដូចការរំពឹងទុកនោះទេ។

នេះបាននាំឱ្យទស្សនិកជនជាច្រើនសង្ស័យពីភាពទាក់ទាញរបស់ Zhao Liying។ តាមរបាយការណ៍បានឱ្យដឹងថា Zhao Liying មិនបានចូលរួមក្នុងគម្រោងភាពយន្តណាមួយអស់រយៈពេលជាងមួយឆ្នាំមកហើយ។ នាងក៏មិនសូវបានលេចមុខក្នុងប្រព័ន្ធផ្សព្វផ្សាយដែរ ផ្ទុយទៅវិញនាងចំណាយពេលសម្រាកបន្ទាប់ពីបញ្ចប់គម្រោង «The Dream Maker »។

យោងតាមប្រព័ន្ធផ្សព្វផ្សាយចិន ទីផ្សារភាពយន្តរបស់ប្រទេសចិនកំពុងជួបប្រទះនឹងការធ្លាក់ចុះ។ មុនពេលមានជំងឺរាតត្បាតកូវីដ១៩ ស្ទូឌីយោភាពយន្ត Hengdian បានឃើញក្រុមការងារភាពយន្តប្រហែល ២០ចាប់ផ្តើមផលិតជារៀងរាល់ថ្ងៃ ប៉ុន្តែឥឡូវនេះក្នុងខែមិថុនាទាំងមូលមានតែគម្រោងថ្មីចំនួន៣ប៉ុណ្ណោះដែលត្រូវបានកត់ត្រាទុក។ ដោយសារតែការបរាជ័យជាបន្តបន្ទាប់នៃផលិតកម្មជាច្រើន វិនិយោគិនកាន់តែមានការប្រុងប្រយ័ត្នខ្ពស់ចំពោះការវិនិយោគ។

លើសពីនេះ ក្រុមការងារភាពយន្តប្រឈមមុខនឹងសម្ពាធហិរញ្ញវត្ថុយ៉ាងខ្លាំង។ យោងតាមប្រភពខ្លះ អ្នកដឹកនាំរឿង តារាសម្ដែង និងសមាជិកក្រុមការងារពេលខ្លះត្រូវចូលរួមក្នុងសកម្មភាពផ្សព្វផ្សាយ ឬចូលរួមចំណែកផ្នែកហិរញ្ញវត្ថុដើម្បីបង្កើនចំនួនអ្នកទស្សនា និងប្រាក់ចំណូលសម្រាប់វេទិកាចែកចាយដូចជា iQIYI, Tencent Video ឬ Youku។

ដូច្នេះមិនត្រឹមតែ Zhao Liying ប៉ុណ្ណោះទេ ថែមទាំងសិល្បករជាច្រើនទៀតក៏កំពុងប្រឈមមុខនឹងការលំបាកក្នុងការស្វែងរកគម្រោងដែលសមស្របផងដែរ។ យោងតាមប្រព័ន្ធផ្សព្វផ្សាយចិន តារាស្រីរូបនេះជ្រើសរើសរង់ចាំស្គ្រីបដែលមានគុណភាពខ្ពស់ពិតប្រាកដ ជាជាងប្រញាប់ប្រញាល់វិលត្រឡប់មកវិញ៕