ជា សុជាតិ បង្ហោះសំណេរមួយបង្កឱ្យមានមតិក្តៅគគុក

តារាចម្រៀង ជា សុជាតិ បានបង្កឱ្យមានមតិវែកញែកយ៉ាងក្តៅគគុកបន្ទាប់ពីចេញបទចម្រៀងហើយស្រាប់តែលោកបង្ហោះសំណេរមួយនៅលើបណ្តាញសង្គម។ ចាប់តាំងពីមានរឿងចម្រូងចម្រាសជាមួយនឹង ជី ដេវីត មកសមាជិកក្មេងខ្មែររូបនេះប្រឈមនឹងមតិជាច្រើន។

ដូចប្រិយមិត្តមួយចំនួនធំជ្រាបមកហើយថាតារាចម្រៀង ជី ដេវីត និង ជា សុជាតិ បានប៉ះទង្គិចពាក្យសម្តីគ្នានៅលើបណ្តាញសង្គមយ៉ាងក្តៅគគុករហូតដល់ ជី ដេវីត បង្ហោះសំណេរចុចឈ្មោះចំៗទៅកាន់ ជា សុជាតិ ប៉ុន្តែលោកមិនបានឆ្លើយតបអ្វីឡើយព្រមទាំងបង្ហាញសកម្មភាពផ្សេងៗព្រមទាំងចេញបទថ្មី។ សកម្មភាពនេះក៏ជំរុញឱ្យមានមតិយោបល់ជាច្រើនដោយចោទប្រកាន់ថា ជា សុជាតិ ទាក់ទាញចំណាប់អារម្មណ៍មហាជនព្រោះតែចេញបទថ្មី។

បន្ទាប់ពីចេញផ្សាយបទ «ភ្លឺឡើងបាត់ស្នេហ៍ (Remix)» គេស្រាប់តែបានឃើញ តារាចម្រៀង ជា សុជាតិ បានចេញវីដេអូខ្លីៗនៃបទថ្មីរបស់ខ្លួនក្នុងទម្រង់បែបកាចៗនិងបែបឌឺដង។ នេះនាំឱ្យមានមតិយោបល់ជាច្រើនមកកាន់តារាចម្រៀងរូបនេះ។

ប្រឈមនឹងការវែកញែកពីបទចម្រៀងថ្មីដែលមិនទាន់ចេញជាផ្លូវការតារាចម្រៀង ជា សុជាតិ បានបង្ហោះសំណេរមួយកាលពីយប់ថ្ងៃទី២១ កក្កដា ថា «ចម្រៀងធ្វើចោលទេ តែបើមានខ្លួនយកចុះ»។ សំណេរខ្លីនេះបានទាក់ទាញអារម្មណ៍អ្នកលេងបណ្តាញសង្គមជាច្រើនរួមទាំងមានការរិះគន់មកកាន់សមាជិកក្មេងខ្មែររូបនេះផងដែរ។

គួរឱ្យដឹងថាភាពចម្រូងចម្រាសបានកើតឡើងកាលពីចុងខែមិថុនា បន្ទាប់ពី ជី ដេវីត បង្ហោះសំណេរមួយក្រោយមក ជា សុជាតិ បានបង្ហោះសំណេរមួយវិញដែលធ្វើឱ្យអ្នកលេងបណ្តាញសង្គមថាអ្នកទាំងពីរកំពុងឆ្លើយឆ្លងគ្នា។ ក្រោយមក ជី ដេវីត បានចេញមកពន្យល់ពីសំណេររបស់ខ្លួនមិនសំដៅលើនរណាម្នាក់ឡើយតែជាការរើសដាក់ខ្លួន។ បន្ទាប់មកទៀត ជី ដេវីត បានចុចចំឈ្មោះ ជា សុជាតិ ប៉ុន្តែហាក់ដូចជាមិនទទួលបានការឆ្លើយតបជាផ្លូវការឡើយ៕