សន្តិសុខការពារជាតិកម្ពុជានឹងត្រូវពង្រឹងបន្ថែមមួយកម្រិតទៀត! រដ្ឋាភិបាលជប៉ុនបានសម្រេចផ្តល់ជំនួយសន្តិសុខផ្លូវការ ហៅកាត់ថា OSA ជាផ្លូវការក្នុងទំហំទឹកប្រាក់រហូតដល់ ៥០០លានយ៉េន ឬប្រមាណ ៣លានដុល្លារអាមេរិក ដល់ក្រសួងការពារជាតិកម្ពុជា។ ជំនួយជាឧបករណ៍បច្ចេកវិទ្យា និងនាវាល្បាតនេះ ធ្វើឡើងក្នុងគោលបំណងលើកកម្ពស់សមត្ថភាពយោធាខ្មែរក្នុងការការពារបូរណភាពទឹកដី និងរក្សាសន្តិភាពនៅក្នុងតំបន់។
.jpg)
ពិធីចុះហត្ថលេខានិងផ្លាស់ប្តូរលិខិតប្តូរសារនៃគម្រោងជំនួយដ៏មានសារៈសំខាន់នេះ បានប្រព្រឹត្តទៅនៅថ្ងៃទី១៩ ខែកក្កដា ឆ្នាំ២០២៦ ម្សិលមិញនេះ។ ពិធីនេះត្រូវបានរៀបចំឡើងរវាងលោក អ៊ូអិណុ អាត់ស៊ូស៊ី (Ueno Atsushi) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា ក្រោមស្មារតីពង្រឹងកិច្ចសហប្រតិបត្តិការ និងចំណងមិត្តភាពរវាងប្រទេសទាំងពីរឱ្យកាន់តែស្អិតរមួតបន្ថែមទៀត។
យោងតាមប្រភពពីស្ថានទូតជប៉ុនប្រចាំនៅកម្ពុជា ថវិកាជំនួយប្រមាណ ៣លានដុល្លារនេះ នឹងត្រូវយកទៅបញ្ជាទិញសម្ភារយោធាទំនើបៗ រួមមានឧបករណ៍បញ្ជូនសារ និងទំនាក់ទំនងសម្រាប់ផ្គត់ផ្គង់ដល់កងទ័ពជើងគោក។ ក្រៅពីនេះ គម្រោងក៏នឹងផ្តល់នូវនាវាល្បាតទំនើបៗទៅកាន់កងទ័ពជើងទឹកនៃកងយោធពលខេមរភូមិន្ទផងដែរ ដែលនេះជាកត្តាគន្លឹះក្នុងការបង្កើនសមត្ថភាពរារាំង សង្គ្រោះ និងការពារសន្តិសុខដែនសមុទ្ររបស់កម្ពុជា។
តាមរយៈការផ្តល់ជំនួយសន្តិសុខផ្លូវការ (OSA) នាពេលនេះ ស្ថានទូតជប៉ុនបានបង្ហាញក្តីរំពឹងយ៉ាងមុតមាំថា គម្រោងនេះនឹងក្លាយជាកម្លាំងចលករយ៉ាងសំខាន់ក្នុងការលើកកម្ពស់សមត្ថភាពសន្តិសុខ និងសមត្ថភាពរារាំងរបស់កម្ពុជា។ លើសពីនេះ វាក៏នឹងរួមចំណែកយ៉ាងសកម្មជាមួយសហគមន៍អន្តរជាតិ ក្នុងការរក្សាសន្តិភាព ស្ថិរភាព និងសន្តិសុខនៅក្នុងតំបន់អាស៊ីអាគ្នេយ៍ទាំងមូលផងដែរ៕
