ក្រុមហ៊ុនយក្សចិនមួយ បង្ហាញបំណងចង់វិនិយោគលើបច្ចេកវិទ្យា AI នៅកម្ពុជា

ឱកាសមាសសម្រាប់វិស័យបច្ចេកវិទ្យាឌីជីថលនៅកម្ពុជាបានឈានមកដល់ហើយ! ក្រុមហ៊ុនបច្ចេកវិទ្យាឈានមុខគេរបស់ចិន Beijing Star AI ដែលជាអ្នកឯកទេសលំដាប់សកលលោកលើការផលិតភាពយន្តដោយប្រើប្រាស់បញ្ញាសិប្បនិម្មិត បានប្រកាសបង្ហាញបំណងចង់បោះទុនវិនិយោគខ្នាតយក្សលើបច្ចេកវិទ្យា AI នៅក្នុងប្រទេសកម្ពុជា។ ដំណឹងដ៏រីករាយនេះ មិនត្រឹមតែជាសញ្ញាវិជ្ជមានក្នុងការទាក់ទាញវិនិយោគិនទុនខ្ពស់ប៉ុណ្ណោះទេ ប៉ុន្តែវានឹងក្លាយជាកម្លាំងចលករយ៉ាងសំខាន់ក្នុងការរុញច្រានកម្ពុជាឱ្យដើរទាន់យុគសម័យបច្ចេកវិទ្យាទំនើបចុងក្រោយបង្អស់។

ការប្រកាសពីបំណងវិនិយោគដ៏មានសក្តានុពលនេះ ត្រូវបានធ្វើឡើងនៅក្នុងជំនួបពិភាក្សាការងាររវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជាមួយលោក ចាង វៃ (Zhang Wei) ស្ថាបនិក និងជានាយកប្រតិបត្តិនៃក្រុមហ៊ុន Beijing Star AI ក្នុងអំឡុងពេលដែលសម្តេចធិបតីទៅបំពេញទស្សនកិច្ចការងារ និងចូលរួមសន្និសីទពិភពលោកស្តីពីបញ្ញាសិប្បនិម្មិតនៅប្រទេសចិន កាលពីថ្ងៃទី១៥ ខែកក្កដា ឆ្នាំ២០២៦។ នៅក្នុងជំនួបនោះ ថ្នាក់ដឹកនាំក្រុមហ៊ុនបានអះអាងថា ក្រុមហ៊ុនរបស់ខ្លួនជាស្ថាប័នដំបូងគេនៅលើពិភពលោក ដែលបានកសាងសហគមន៍បង្កើតវីដេអូ AIGC ពេញលេញ និងបានដាក់ដំណើរការប្រព័ន្ធ AI Agent ក្នុងកម្រិតភាពយន្តដំបូងគេបង្អស់លើសកលលោក។ តាមរយៈកិច្ចសហប្រតិបត្តិការជាមួយដៃគូក្នុងស្រុក ក្រុមហ៊ុនចិនលំដាប់យក្សមួយនេះមានមហិច្ឆតាខ្ពស់ក្នុងការអភិវឌ្ឍវិស័យអាជីវកម្មស្នូលចំនួន ៤ នៅកម្ពុជា រួមមាន៖ មជ្ឈមណ្ឌលកុំព្យូទ័រវៃឆ្លាតប្រចាំតំបន់អាស៊ាន, មជ្ឈមណ្ឌលស្រាវជ្រាវនិងអភិវឌ្ឍន៍ភ្នាក់ងារ AI សម្រាប់ការផលិតភាពយន្ត, មជ្ឈមណ្ឌលចែកចាយរឿងភាគខ្លី AI ឆ្លងដែន និងមជ្ឈមណ្ឌលប្រតិបត្តិការពាណិជ្ជកម្មឌីជីថលអាស៊ាន។

ជាការឆ្លើយតប សម្ដេចធិបតី ហ៊ុន ម៉ាណែត បានសម្តែងការអបអរសាទរចំពោះភាពជោគជ័យដ៏អស្ចារ្យរបស់ក្រុមហ៊ុន ព្រមទាំងបានស្វាគមន៍យ៉ាងកក់ក្តៅចំពោះគម្រោងស្វែងរកឱកាសវិនិយោគលើវិស័យបច្ចេកវិទ្យា AI នៅលើទឹកដីកម្ពុជា។ សម្ដេចធិបតីបានគូសបញ្ជាក់យ៉ាងម៉ឺងម៉ាត់ថា វិស័យបច្ចេកវិទ្យាគឺជាអាទិភាពគន្លឹះមួយនៅក្នុងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា ដែលផ្ដោតការយកចិត្តទុកដាក់ និងជំរុញការអភិវឌ្ឍសេដ្ឋកិច្ចនិងសង្គមឌីជីថល។ ក្នុងន័យនេះ ប្រមុខរាជរដ្ឋាភិបាលកម្ពុជាបានលើកទឹកចិត្ត និងបើកផ្លូវឱ្យក្រុមហ៊ុនបន្តការផ្សារភ្ជាប់ទំនាក់ទំនង និងពិភាក្សាលម្អិតជាមួយក្រសួងស្ថាប័នពាក់ព័ន្ធរបស់កម្ពុជា ជាពិសេសក្រសួងប្រៃសណីយ៍ និងទូរគមនាគមន៍ ដើម្បីសិក្សាស្វែងយល់ និងចាប់យកកាលានុវត្តភាពក្នុងការអនុវត្តគម្រោងវិនិយោគជាក់ស្តែងឱ្យលេចចេញជារូបរាងឡើង។

គម្រោងបោះទុនវិនិយោគរបស់ក្រុមហ៊ុន Beijing Star AI គឺជាជំហានការទូតសេដ្ឋកិច្ច និងបច្ចេកវិទ្យាដ៏ជោគជ័យមួយសម្រាប់កម្ពុជា ក្នុងការកសាងប្រព័ន្ធអេកូឡូស៊ី AI កម្រិតខ្ពស់។ វត្តមាននៃមជ្ឈមណ្ឌលយុទ្ធសាស្ត្រទាំង ៤ នេះ មិនត្រឹមតែជួយបណ្តុះបណ្តាលធនធានមនុស្ស និងបង្កើតឱកាសការងារថ្មីៗសម្រាប់យុវជនកម្ពុជានោះទេ ប៉ុន្តែវានឹងប្រែក្លាយកម្ពុជាទៅជាមជ្ឈមណ្ឌលផ្ទុកទិន្នន័យ និងប្រតិបត្តិការបច្ចេកវិទ្យា AI ដ៏មានឥទ្ធិពលមួយដែលអាចបម្រើ និងផ្គត់ផ្គង់ដល់ទីផ្សារប្លុកអាស៊ានទាំងមូលនាពេលអនាគតដ៏ខ្លីខាងមុខនេះ៕