អ្នកវិភាគឯករាជ្យ បង្ហោះសារបែបនេះអ្នកលេងបណ្តាញសង្គមសសង្ស័យថាសំដៅទៅកាន់ ប៉ីប៉ី ឌី

បន្ទាប់ពីកម្មវិធីប្រគល់ពានរង្វាន់របស់រោងកុនលេជេន គេសង្កេតឃើញថាព្រឹត្តិការណ៍នេះទទួលបាននូវការរិះគន់ពីផលិតករ ហ៊ុយ យ៉ាឡេង ខណៈ ទ្រី សក្កដា បង្ហាញការអន់ចិត្ត ស្របពេលនេះស្រាប់តែមានរឿងក្តៅគគុកមួយទៀតដែលទស្សនិកជនសង្ស័យថា អ្នកវិភាគឯករាជ្យ ចង់សំដៅទៅកាន់ ប៉ីប៉ី ឌី។

បន្ទាប់ពីកម្មវិធីពានរង្វាន់រួចនៅវេលាម៉ោង២ជាងទៀបភ្លឺឈានចូលថ្ងៃទី១២ ខែកក្កដា ប៉ីប៉ី ឌី បានបង្ហោះរូបភាពមួយសន្លឹកដែលជារូបរបស់លោកជាមួយនឹង ម៉ែសេះ ហើយភ្ជាប់មកជាមួយនឹងសំណេរថា «យើងមិនមែនជាស្រី សមត្ថភាពយើងតែងតែត្រូវបានគេមើលរំលង វគ្គ2នេះ បន្ថែមភេទទី3ម្នាក់ទៀត កាន់តែអត់ន័យសម្រិតសម្រាំងរាប់ខែចូលឆ្នាំ ចាយទុនយកគុណភាព មួយឆ្នាំចេញបានមួយរឿង ធ្វើម៉េចចូលចំណោមគេចុះ
បើសិនមួយខែ១រឿង ធ្វើឱ្យតែហើយៗបែបល្អ និងសល់លុយច្រើនជាង និយាយត្រង់ចឹង ខុសអត់? ខុសក៏បាន តែចង់និយាយចឹង»។

ក្រោយការបង្ហោះនេះដំបូងឡើយអ្នកលេងបណ្តាញសង្គមមួយចំនួនយល់ថាជារឿងធម្មតា ប៉ុន្តែភាពចម្រូងចម្រាសបានកើតឡើងនិងមានការពិភាក្សាបន្ទាប់ពីអ្នកវិភាគឯករាជ្យ បានបង្ហោះសំណេរដែលអ្នកលេងបណ្តាញសង្គមសង្ស័យថាចង់សំដៅទៅកាន់ ប៉ីប៉ី ឌី ស្របពេល ទ្រី សក្កដា ក៏បានបង្ហាញការអន់ចិត្តរបស់ខ្លួនឡើងមករឿងម៉ែសេះមិនបានទទួលពានរង្វាន់ ចំណែកឯភាពយន្តរកចំណូលបានច្រើនជាងគេមិនមែនមានតែមួយរឿង។

នៅថ្ងៃទី១៤ ខែកក្កដា ផេក Stephen Row : អ្នកវិភាគឯករាជ្យ បានបង្ហោះសំណេរមួយថា «គ្រាន់ឈ្នះពានតិចជាងផលិតករផ្សេង សុទ្ធតែផុសផ្លែផ្កាចេតនាទាញស្ថាប័នវាយតម្លៃគេ រើសអើង LGBT community ! អាណោចអាធមខ្សែគេ ផលិតករធ្វើកុន១ខែ១ … អា 5.6/10 ខ្លះ!»។ សំណេររបស់លោកត្រូវបានអ្នកលេងបណ្តាញសង្គមសង្ស័យថាចង់សំដៅទៅកាន់ ប៉ីប៉ី ឌី ខណៈក៏មានអ្នកយកការបង្ហោះរបស់ ប៉ីប៉ី ឌី បានខម្មិនផងដែរ។

លើសពីទៅទៀត អ្នកវិភាគឯករាជ្យ ក៏បានចែករំលែករូបភាពរបស់ផលិតករ សាស្រ្តាហ្វៀម គឺលោក គូ ដារ៉ាចាន់ ដែលឈ្នះពានរង្វាន់ដោយភ្ជាប់មកជាមួយនឹងសំណេរថា «សូមទោសផលិតករជាមុនផង ដែលនិយាយឃ្លានេះ …ផលិតករ ដែលអត់ឈ្នះពាន ថាគេរើសអើង LGBT ឬ នារីអត់សូវសុទ្ធ … ហួចមើលស្អីនៀក! ឆែកប្រូហ្វាលផលិតករ បើចង់ដឹងទើបផុសថា ..គាត់ប្រុសបោកឡើងឈ្នះពាន!មើលរូបរាងជាបុរសសង្ហា … តែជីវិតស្នេហា ឆ្លងកាត់ការឈឺផ្សារដូចកុន ឱបសពម្តាយ៣ថ្ងៃ (ស្រីខូច)! ថាគេ១ខែចេញមួយរឿង! មើលពានប៉ុណ្ណឹង.. សាកគិតបើគាត់សម្រិត៦ខែ ..ពានដឹងម៉ានរយពាន!and He deserved that ពាន! Legend Award សុក្រឹតបស់គេហើយ»។

គួរឱ្យដឹងថា ប៉ីប៉ី ឌី និង អ្នកវិភាគឯករាជ្យ ធ្លាប់ប៉ះទង្គិចពាក្យសម្តីគ្នាយ៉ាងកក្រើកកាលពីខែសីហា ឆ្នាំ២០២៥ បន្ទាប់ពីអ្នកវិភាគឯករាជ្យផ្តល់ពិន្ទុភាពយន្ត ភូមិគ្រឹះអាគម ៥.៦/១០ ៕