អ្នកកាសែតល្បីថៃ ព្រមា.នពីអន្ទាក់ជាតិនិយមជ្រុលដែលកំពុងគ្រប់គ្រងលើសង្គមថៃ

ខណៈដែលភាពតានតឹងរវាងថៃ និងកម្ពុជានៅតែជាប្រធានបទដែលទាក់ទាញចំណាប់អារម្មណ៍សាធារណៈ អ្នកកាសែតជើងចាស់របស់ថៃ លោក Pravit Rojanaphruk បានរិះគ.ន់ចំៗទៅលើមនោគមវិជ្ជាជាតិនិយមជ្រុលកំពុងធ្វើឱ្យប្រទេសថៃក្លាយជាចំណាប់ខ្មាំង ដោយបំផ្លា.ញទំនាក់ទំនងជាមួយប្រទេសជិតខាង និងធ្វើឱ្យកិត្យានុភាពជាតិធ្លាក់ចុះ។ អ្នកនិពន្ធរូបនេះព្រមាន.ថា ការកើនឡើងកម្តៅផ្នែកយោធា និងការបាត់បង់ការទូត អាចរុញច្រានថៃឱ្យធ្លាក់ក្នុងភាពឯកោ និងជួបវិបត្តិសេដ្ឋកិច្ច។

យោងតាមអត្ថបទវិភាគរបស់លោក Pravit ដែលចេញផ្សាយនៅលើគេហទំព័រសារព័ត៌មាន Khaosod English ថ្ងៃទី១៨ ខែមិថុនា បានឲ្យដឹងថា ចរន្តជាតិនិយមជ្រុលនៅថៃ កំពុងមានឥទ្ធិពលខ្លាំងលើការបង្កើតទស្សនៈសាធារណៈ ជាពិសេសពាក់ព័ន្ធនឹងទំនាក់ទំនងជាមួយប្រទេសជិតខាង។ លោកអះអាងថា ការបំផុសអារម្មណ៍ស្នេហាជាតិហួសហេតុ បានធ្វើឱ្យការពិភាក្សាលើបញ្ហាតំបន់ និងអន្តរជាតិខ្វះភាពសមហេតុផល និងផ្អែកលើអារម្មណ៍ច្រើនជាងការវិភាគជាក់ស្តែង។

អ្នកសារព័ត៌មានរូបនេះបានរិះគន់ថា ក្រុមនយោបាយ និងបុគ្គលមួយចំនួន តែងយកបញ្ហាជម្លោះព្រំដែន ឬក្តីបារម្ភអំពីសន្តិសុខជាតិ មកប្រើប្រាស់ជាឧបករណ៍នយោបាយ ដើម្បីជំរុញចលនាជាតិនិយម និងប្រមូលការគាំទ្រពីសាធារណជន។ តាមការយល់ឃើញរបស់លោក គឺការធ្វើបែបនេះអាចបង្វែរការចាប់អារម្មណ៍របស់ប្រជាពលរដ្ឋចេញពីបញ្ហាសេដ្ឋកិច្ច សង្គម និងការអភិវឌ្ឍជាតិ ដែលគួរតែជាអាទិភាពសម្រាប់រដ្ឋាភិបាល។

លោក Pravit ក៏បានបញ្ជាក់ថា ការបន្តបណ្តោយឱ្យមនោគមវិជ្ជាជាតិនិយមជ្រុលគ្រប់គ្រងទស្សនៈសង្គម អាចប៉ះពាល់ដល់ទំនាក់ទំនងល្អរវាងប្រទេសក្នុងតំបន់ និងបង្កឱ្យមានបរិយាកាសមិនអំណោយផលសម្រាប់កិច្ចសហប្រតិបត្តិការសេដ្ឋកិច្ច។ លោកអំពាវនាវឱ្យសង្គមថៃងាកមកប្រើប្រាស់ការគិតដោយហេតុផល ការគោរពគ្នាទៅវិញទៅមក និងការដោះស្រាយបញ្ហាតាមផ្លូវការទូត ជាជាងការបណ្តោយឱ្យអារម្មណ៍ជាតិនិយមក្លាយជាកត្តាជំរុញការសម្រេចចិត្ត។

តាមរយៈអត្ថបទវិភាគរបស់លោក Pravit Rojanaphruk បានបង្ហាញពីការព្រួយបារម្ភចំពោះឥទ្ធិពលនៃជាតិនិយមជ្រុលនៅក្នុងសង្គមថៃ និងល្បិចកលនយោបាយដែលអាចត្រូវបានប្រើប្រាស់ដើម្បីបង្វែរការយកចិត្តទុកដាក់របស់សាធារណជន។ លោកជឿថា ការលើកកម្ពស់ការគិតដោយហេតុផល និងកិច្ចសហប្រតិបត្តិការជាមួយប្រទេសជិតខាង គឺជាមធ្យោបាយដ៏សមស្របសម្រាប់ធានាសន្តិភាព និងការអភិវឌ្ឍប្រកបដោយចីរភាពនៅក្នុងតំបន់៕