ក្រុមហ៊ុន Google បានដាក់សំណើទៅកាន់ភ្នាក់ងារការពារបរិស្ថានសហរដ្ឋអាមេរិក (EPA) ដើម្បីអនុវត្តគម្រោង «Debug Project» លែងសត្វមូសចំនួន៣២លានក្បាល នៅក្នុងរដ្ឋកាលីហ្វ័រញ៉ា និងរដ្ឋផ្លរីដា សហរដ្ឋអាមេរិក (ក្នុងមួយរដ្ឋ នឹងលែង១៦លានក្បាល) នារយៈពេល២ឆ្នាំខាងមុខ ដើម្បីកាត់បន្ថយចំនួនមូស និងបង្ការជំងឺឆ្លងផ្សេងៗ។ ក្រុមហ៊ុនថា វិធីកម្ចា.ត់មូសបច្ចុប្បន្ន គ្មានប្រសិទ្ធភាព១០០%ទេ គឺការបា.ញ់ថ្នាំនាំឱ្យបំពុលបរិស្ថាន និងពិបាកស្វែងរកប្រភពទឹកដែលមានមូសបង្កា.ត់ពូជ។.jpg)
ការលែង គឺនឹងលែងតែមូសឈ្មោលប៉ុណ្ណោះ ពីព្រោះតាមធម្មជាតិ គឺមានតែមូសញីទេដែលខាំ និងបឺតឈាមមនុស្សដើម្បីយកសារធាតុចិញ្ចឹម ហើយការលែងមូសឈ្មោលរាប់លានក្បាលនេះ ពួកវានឹងមិនខាំ ឬរំខានដល់មនុស្សឡើយ។ ក្រុមហ៊ុននឹងប្រើប្រាស់បច្ចេកវិទ្យាសិប្បនិម្មិត (AI) ក្នុងការបែងចែងប្រភេទរវាងមូសឈ្មោល និងញីឱ្យមានភាពត្រឹមត្រូវ មុនពេលយកទៅលែង ដែលវិធីនេះអាចជួយកាត់បន្ថយចំនួនមូសឱ្យធ្លាក់ចុះយ៉ាងច្រើន។
មុនពេលលែងមូសឈ្មោលជាច្រើនសន្ធឹកសន្ធាប់នេះ ក្រុមហ៊ុននឹងចិញ្ចឹមក្នុងបន្ទប់ពិសោធន៍ រួចហើយ ចាក់បញ្ចូលបាក់តេរីម្យ៉ាងឈ្មោះ Wolbachia ដែលជាបាក់តេរីកើតឡើងតាមធម្មជាតិក្នុងសត្វល្អិត។ ពេលមូសឈ្មោលមានបាក់តេរីនេះ ទៅបង្កាត់ពូជជាមួយមូសញីក្នុងព្រៃ វានឹងប៉ះពាល់ដល់ការបង្កាត់ពូជ ហើយធ្វើឱ្យពងរបស់មូសញីស្អុយ មិនអាចញាស់ចេញជាកូនមូសបានឡើយ។ 
ក្រុមហ៊ុន Google មានគោលដៅផ្តោតចម្បងទៅលើការកាត់បន្ថយមូសខ្លា ដែលជាភ្នាក់ងារមេរោគផ្សេងៗដ៏គ្រោះថ្នាក់ រួមមាន គ្រុនឈាម ហ្ស៊ីកា និងគ្រុនលឿង។ វាជាវិធីដ៏មានប្រសិទ្ធភាព ដែលមិនចាំបាច់ប្រើប្រាស់ថ្នាំគីមីបាញ់ប៉ះពាល់បរិស្ថាន និងសុខភាពមនុស្សឡើយ ហើយក៏មិនមែនជាវិធីថ្មីដែរ គឺធ្លាប់បានសាកល្បង និងទទួលជោគជ័យរួចមកហើយ ដូចជា នៅប្រទេសសិង្ហបុរី បានប្រើប្រាស់បាក់តេរី Wolbachia ទៅលើមូសឈ្មោល និងអាចកាត់បន្ថយចំនួនមូសខ្លាបានចាប់ពី៨០% ទៅ៩០% និងកាត់បន្ថយការឆ្លងជំងឺគ្រុនឈាមរហូតដល់ជាង៧០%។
ទោះយ៉ាងណា ភ្នាក់ងារការពារបរិស្ថានសហរដ្ឋអាមេរិក (EPA) កំពុងតែពិចារណាត្រួតពិនិត្យលើសំណើអនុវត្តគម្រោង «Debug Project» របស់ក្រុមហ៊ុន Google និងរង់ចាំការស្ទង់មតិពីមហាជនជាមុនសិន មុនពេលអនុញ្ញាតឱ្យលែងមូសរាប់លានក្បាលជាផ្លូវការ ពីព្រោះគម្រោងនេះទទួលការរិះគន់ និងបារម្ភពីមហាជនមួយចំនួនអំពីផលប៉ះពាល់ប្រព័ន្ធអេកូឡូស៊ីធម្មជាតិ៕
