ទើបមានរឿងចម្រូ.ងចម្រា.ស ប៉ីប៉ី ឌី ជួបគ្រោះថ្នាក់ចរាចរណ៍ប៉ះឡានកំពុងសំចត

ដូចប្រិយមិត្តជ្រាបមកហើយថា ប៉ីប៉ី ឌី បានប្រឈមនឹងភាពចម្រូងចម្រាសយ៉ាងខ្លាំងនៅលើបណ្តាញសង្គមនារយៈពេលប៉ុន្មានថ្ងៃចុងក្រោយនេះហើយអ្នកគាំទ្រមួយចំនួនក៏បានបង្ហាញការខកចិត្តចំពោះលោកផងដែរ។ ទើបមានរឿងមិនទាន់ចប់ ប៉ីប៉ី ឌី ស្រាប់តែបានបង្ហាញថាបានជួបគ្រោះថ្នាក់ចរាចរណ៍ប៉ុន្តែមិនរងរបួសអ្វីនោះទេ។

នៅយប់ថ្ងៃទី២១ ខែឧសភា ឆ្នាំ២០២៦ ប៉ីប៉ី ឌី អ្នកមានឥទ្ធិពលលើបណ្តាញសង្គមនិងជាអ្នកជំនួញមួយរូបបង្ហោះនៅលើបណ្តាញសង្គមរបស់ខ្លួនថា «គ្រោះថ្នាក់ចរាចរណ៍មុននេះនៅព្រែកព្នៅ ដោយសារម៉ូតូជិះវ៉ាកាត់មុខឡាន ខ្ញុំក៏ទាញចង្កូតទៅប៉ះឡានដែលចតលើផ្លូវ គ្មានសញ្ញ ហើយក៏មិនបានប៉ះធ្ងន់ធ្ងរដែរ ខ្ញុំចុះទៅសម្រួលភ្លាមៗ សងការខូចខាត ដោយមានការដឹងឮវាស់វែងពីប៉ូលិសត្រឹមត្រូវដោយគ្មានអ្នករបួសទេ»។

ជាមួយនឹងការបញ្ជាក់អំពីមូលហេតុគ្រោះថ្នាក់និងដោះស្រាយគ្នាដោយសន្តិវិធីជាមួយនឹងសំណងការខូចខាតនេះ ប៉ីប៉ី ឌី បានបញ្ជាក់ទៀតថាលោកមិនបានបើកបរក្នុងស្ថានភាពស្រវឹងនោះទេហើយមានប័ណ្ណបើកបរត្រឹមត្រូវផងដែរ។

ក្រោយពី ប៉ីប៉ី ឌី បានបង្ហោះថារូបលោកជួបគ្រោះថ្នាក់ចរាចរណ៍ មានអ្នកគាំទ្រជាច្រើនបានសម្តែងការព្រួយបារម្ភនិងឱ្យលោកថែរក្សាសុវត្ថិភាព។ ដោយសារតែជួបរឿងរ៉ាវផ្ទួនៗគ្នានេះអ្នកគាំទ្រខ្លះក៏ថែមទាំងជំរុញឱ្យ ប៉ីប៉ី ឌី ទៅវត្តស្រោចទឹកក្នុងការបណ្តេញគ្រោះអាក្រក់ទៅតាមជំនឿរបស់ខ្លួន។

គួរបញ្ជាក់ផងដែរថា ជុំវិញជម្លោះរវាង ប៉ីប៉ី ឌី និង អ្នកលក់អនឡាញ អាជី បានធ្វើឱ្យកក្រើកពេញបណ្តាញសង្គមយ៉ាងខ្លាំង។ ភាពចម្រូងចម្រាសនេះក៏ធ្វើឱ្យមនុស្សមួយចំនួនជីកកាយរឿងលុយជំនួយកន្លងមកដោយចង់ឱ្យលោកបញ្ជាក់ឱ្យច្បាស់លាស់ ខណៈ ប៉ីប៉ី ឌី ក៏ធ្លាប់បានបង្ហោះពីការចំណាយផ្សេងៗក្នុងការទិញស្បៀងជួយដល់កងទ័ព និងជនភៀសសឹកនាពេលកន្លងមកផងដែរ៕