មហាជនព្រួយបារម្ភ ក្រោយរឿងជេ.រប្រទិ.ចគ្នាតាមបណ្ដាញសង្គមមានអ្នកមើលច្រើនជាងមាតិការអប់រំ

ប្រជាប្រិយភាពនៃការហែ.កហួរគ្នារវាងបុគ្គលល្បីៗនៅលើប្រព័ន្ធអ៊ីនធឺណិត កំពុងក្លាយជាវិបត្តិសីលធម៌លាក់មុខមួយ ដែលធ្វើឱ្យអ្នកអប់រំ អាណាព្យាបាល និងសង្គមស៊ីវិលសម្តែងការព្រួយបារម្ភយ៉ាងខ្លាំង។ តថភាពដ៏គួរឱ្យព្រួយបារម្ភនេះ កំពុងបង្កើតជាសំណួរយ៉ាងធំក្នុងសង្គមកម្ពុជាថា តើអនាគតផ្នត់គំនិតរបស់យុវជនជំនាន់ក្រោយនឹងទៅជាយ៉ាងណា បើពួកគេចំណាយពេលលើ “រឿងអវិជ្ជមាន” ច្រើនជាង “ចំណេះដឹង”បែបនេះ?

ផ្អែកតាមព្រឹត្តិការណ៍ដែលបាននិងកំពុងកើតមាននៅក្នុងពេលថ្មីៗនេះបានបង្ហាញឲ្យឃើញថា មនុស្សភាគច្រើន ជាពិសេសយុវជនក្មេងៗមានទំនោរតាមដានរឿងរ៉ាវជម្លោះរបស់បុគ្គលជាជាងការចំណាយពេលវេលាទៅសិក្សាស្វែងយល់ពីអ្វីដែលផ្ដល់ផលប្រយោជន៍និងចំណេះដឹង។ បុគ្គលល្បីៗ ព្រមទាំងអ្នកលក់អនឡាញមួយចំនួន តែងតែបង្កើតការផ្សាយផ្ទាល់ (Live) វាយប្រហារ បកអាក្រា.ត ឬប្រើប្រាស់ពាក្យអសុរោះដាក់គ្នាទៅវិញទៅមក ដើម្បីទាក់ទាញចំនួនអ្នកមើល និងបង្កើនការចាប់អារម្មណ៍លើទំព័ររបស់ខ្លួន។

ឯកឧត្តម ជុំ កុសល រដ្ឋលេខាធិការក្រសួងព័ត៌មានបានលើកឡើងថា នៅពេលអ្នកមានប្រជាប្រិយភាពណាម្នាក់នៅលើបណ្តាញសង្គមបានផ្សាយផ្ទាល់(LIVE)ដោយប្រើពាក្យសម្តីប្រមាថ និងដៀលគ្នា លោកសង្កេតឃើញមានអ្នកចូលមើលច្រើនដល់ម៉ឺននាក់ តែនៅពេលមានបុគ្គលណាម្នាក់ដែលបង្ហោះផ្សព្វផ្សាយពីប្រធានបទដែលផ្តល់ប្រយោជន៍ដល់សង្គមដូចជាទាក់ទងនឹងសុខភាព និងបញ្ហាសង្គមជាដើម បែរជាមិនសូវមានអ្នកចូលមើលនិងចាប់អារម្មណ៍ទៅវិញ។ លោកបន្ថែមថា តើរវាងការដៀលប្រមាថគ្នា និងការចែករំលែកអ្វីដែលជាប្រយោជន៍ដល់សង្គម មួយណាសំខាន់ជាង។

នៅខណៈពេលដែលវីដេអូអប់រំ និងចំណេះដឹងទូទៅទទួលបានការចុចមើល (Views) ត្រឹមតែរាប់ពាន់ដង វីដេអូជេរប្រមាថ និងជម្លោះហែកហួរគ្នារបស់បុគ្គលល្បីៗលើបណ្តាញសង្គម បែរជាអាចទាក់ទាញអ្នកទស្សនារហូតដល់រាប់លានដងក្នុងរយៈពេលតែប៉ុន្មានម៉ោងប៉ុណ្ណោះ។ កត្តានេះកំពុងជំរុញឲ្យសីលធម៌សង្គមធ្លាក់ចុះ ព្រោះក្មេងៗជំនាន់ក្រោយអាចយល់ច្រឡំថា ការជេរប្រមាថជាវិធីសាស្ត្រលឿនបំផុតដើម្បីទទួលបានភាពល្បីល្បាញ និងរកលុយបាន។ ក្នុងពេលជាមួយគ្នា បុគ្គលដែលផលិតមាតិកាអប់រំ វិទ្យាសាស្ត្រ ឬចំណេះដឹងទូទៅ ងាយនឹងបាក់ទឹកចិត្តលែងចង់បន្តផលិតវីដេអូដោយសារគ្មានអ្នកគាំទ្រ ដែលនៅពេលនោះសង្គមទាំងមូលនឹងពោរពេញដោយរឿងរ៉ាវអវិជ្ជមាន។

ដោយសារតែព្រួយបារម្ភពីបញ្ហាទាំងនេះ ក្រសួងពាក់ព័ន្ធនានាបានបង្កើនការរឹតបន្តឹង និងចាត់វិធានការជាបន្តបន្ទាប់ ដោយកន្លងមកក្រសួងព័ត៌មាន សហការជាមួយក្រសួងវប្បធម៌ និងវិចិត្រសិល្បៈ តែងតែធ្វើការកោះហៅបុគ្គលល្បីៗ ឬអ្នកបង្កើតមាតិកាដែលប្រើប្រាស់ពាក្យសម្តីអសុរោះខុសឆ្គងខ្លាំង មកធ្វើកិច្ចសន្យាបញ្ឈប់សកម្មភាព និងសុំទោសជាសាធារណៈ។ ក្រសួងក៏តែងតែអំពាវនាវឱ្យមហាជនងាកមកបង្កើត និងគាំទ្រមាតិកាដែលមានតម្លៃអប់រំ វប្បធម៌ និងចំណេះដឹងវិញ ដើម្បីកាត់បន្ថយឥទ្ធិពលអាក្រក់នៃរឿង Drama ទាំងនេះ។ ការណ៍នេះអាចសម្រេចទៅបានលុះត្រាតែមានការចូលរួមពីសំណាក់អាណាព្យាបាល និងយុវជនខ្លួនឯងក្នុងការ «ឈប់មើល និងឈប់ចែករំលែក» រាល់រឿងរ៉ាវអសីលធម៌ទាំងអស់នេះបន្តទៀត៕