ក្រុមចម្រៀង BTS ទើបតែត្រូវបានប្រកាសថានឹងក្លាយជាសិល្បករសំខាន់សម្រាប់ការសម្តែងសម្រាកពាក់កណ្តាលម៉ោងលើកដំបូងក្នុងប្រវត្តិសាស្ត្រព្រឹត្តិការណ៍បាល់ទាត់ពិភពលោករួមជាមួយតារាចម្រៀង Shakira និង Madonna ។ ដំណឹងរីករាយនេះត្រូវបង្ហាញដោយ Chris Martin មកពី Coldplay ។ សហគមន៍អ្នកគាំទ្រ BTS បានបង្ហាញអារម្មណ៍រំភើបចិត្តយ៉ាងខ្លាំងខណៈនេះគឺជាប្រវត្តិសាស្រ្តលើកដំបូងសម្រាប់ក្រុមចម្រៀង K-Pop។
ការប្រកួតវគ្គផ្តាច់ព្រ័ត្រនៃព្រឹត្តិការណ៍បាល់ទាត់ពិភពលោកគឺជាព្រឹត្តិការណ៍កីឡាប្រចាំឆ្នាំដែលមានអ្នកទស្សនាច្រើនជាងគេបំផុតរបស់ពិភពលោក។ ការប្រកួតវគ្គផ្តាច់ព្រ័ត្រឆ្នាំ ២០២២ បានទាក់ទាញអ្នកទស្សនាផ្ទាល់ជាង ៥០០ លាននាក់ ដែលលើសពី Super Bowl LIX ដែលមានអ្នកទស្សនាច្រើនជាងគេបំផុតក្នុងប្រវត្តិសាស្ត្រ ដែលមានអ្នកទស្សនាជាមធ្យម ១២៧,៧១ លាននាក់។ កម្មវិធីសម្រាកពាក់កណ្តាលម៉ោងនៃវគ្គផ្តាច់ព្រ័ត្រព្រឹត្តិការណ៍ World Cup ឆ្នាំ ២០២៦ដែលរៀបចំដោយ Global Citizen និង Chris Martin មានគោលបំណងរៃអង្គាសថវិកាសម្រាប់មូលនិធិអប់រំពលរដ្ឋពិភពលោករបស់ FIFA ដែលជាមូលនិធិមួយដែលកំពុងខិតខំរៃអង្គាសថវិកាចំនួន ១០០ លានដុល្លារដើម្បីពង្រីកការទទួលបានការអប់រំ និងបាល់ទាត់សម្រាប់កុមារទូទាំងពិភពលោក។
យោងតាម Billboard ការប្រកួតនៅថ្ងៃទី១៩ ខែកក្កដា នៅកីឡដ្ឋាន MetLife សហរដ្ឋអាម៉េរិកនឹងសម្គាល់ជាលើកដំបូងក្នុងប្រវត្តិសាស្ត្រដែលវគ្គផ្តាច់ព្រ័ត្រនៃព្រឹត្តិការណ៍ World Cup នឹងមានការសម្តែងសម្រាកពាក់កណ្តាលម៉ោង។ កម្មវិធីនេះត្រូវបានគេរំពឹងថានឹងមានរយៈពេលប្រហែល ១១ នាទី។
BTS បានចូលរួមសកម្មភាពជាមួយ Global Citizen ជាយូរមកហើយ។ ក្រុមនេះបានចូលរួមក្នុងព្រឹត្តិការណ៍ Global Citizen LIVE ក្នុងឆ្នាំ ២០២១ ហើយ Jungkook បានសម្តែងនៅឯពិធីបុណ្យ Global Citizen ក្នុងឆ្នាំ ២០២៣។ Jungkook ពីមុនបានចូលរួមច្រៀងនៅក្នុងបទចម្រៀងផ្លូវការ «Dreamers» សម្រាប់ព្រឹត្តិការណ៍ FIFA World Cup ឆ្នាំ២០២២ និងបានសម្តែងនៅក្នុងពិធីបើកការប្រកួតនៅប្រទេសកាតាផងដែរ។
តាមរយៈក្រុមហ៊ុនគ្រប់គ្រង BTS បានចែករំលែកគំនិតរបស់ពួកគេថា «វាជាកិត្តិយសដ៏អស្ចារ្យមួយដែលបាននៅលើឆាកដ៏មានអត្ថន័យនេះ ដែលពិភពលោកទាំងមូលបានទស្សនា។ យើងជឿជាក់ថា តន្ត្រីគឺជាភាសាសកលដែលបង្ហាញពីក្តីសង្ឃឹម និងភាពសុខដុមរមនា។ការអាចចែករំលែកសារនោះជាមួយទស្សនិកជនទូទាំងពិភពលោកតាមរយៈព្រឹត្តិការណ៍ World Cup នេះ និងចូលរួមចំណែកក្នុងការពង្រីកឱកាសអប់រំសម្រាប់កុមារ គឺកាន់តែមានអត្ថន័យថែមទៀត៕
