ផ្អើលប៉ោយប៉ែត! ជនជាតិចិនរត់ប្រសាចពេញផ្លូវ ក្រោយសមត្ថកិច្ចចុះបង្រ្កាបទីតាំងអនឡាញស្កេម

ទំនងជាមានមិនក្រោម ១ពាន់នាក់ឡើយ! ជនជាតិចិនជាច្រើននាក់បាននាំគ្នាសម្រុករត់ចេញពីអគារដែលកម្លាំងសមត្ថកិច្ចចុះបង្ក្រាបបទល្មើស Scam Online ដ៏ក្តៅគគុកនៅក្រុងប៉ោយប៉ែត ខេត្តបន្ទាយមានជ័យ នៅថ្ងៃទី២៩ ខែមេសា ឆ្នាំ២០២៦នេះ។ នៅក្នុងប្រតិបត្តិការនេះក៏មានលឺស្នូរផ្ទុះអាវុ.ធជាច្រើនគ្រាប់ផងដែរ។

កម្លាំងនគរបាល នៃអគ្គស្នងការដ្ឋាននគរបាលជាតិ បានសហការជាមួយកម្លាំងគណ:បញ្ជាការឯកភាពខេត្តបន្ទាយមានជ័យ មានទាំងនគរបាល និងអាវុធហត្ថ ក្រោមការសម្របសម្រួលរបស់ព្រះរាជអាជ្ញាខេត្ត បានរួមសហការគ្នាបង្ក្រាបបទល្មើសមួយនេះ រហូតផ្ទុះអាវុធដោយសារតែជនជាតិចិនទាំងនោះ នៅតែសម្រុកចាកចេញ ហើយជនល្មើសខ្លះមានអាវុធទៀតផង។



ខណៈដែលកម្លាំងសមត្ថកិច្ចទាំងនគរបាល និងអាវុធហត្ថមានចំនួនកំណត់ ដែលធ្វើឲ្យការគ្រប់គ្រងភាពចលាចលរបស់ក្រុមជនជាតិចិនទាំងនោះជួបការលំបាក អភិបាលខេត្តបន្ទាយមានជ័យ បានស្នើឲ្យមានការចូលរួមពីកម្លាំងយោធា ហើយរហូតមកដល់ពេលនេះ សភាពការណ៍បានស្ងប់ស្ងាត់ហើយ ក្រោយជនជាតិចិនទាំងនោះ ត្រូវកម្លាំងសមត្ថកិច្ចបានគ្រប់គ្រងបានទាំងស្រុង។

សូមបញ្ជក់ថា នេះជាលើកទី២ហើយក្នុងខែមេសា ឆ្នាំ២០២៦ ដែលមានការផ្ទុះអាវុធនៅក្រុងប៉ោយប៉ែត ក្នុងពេលដែលសមត្ថកិច្ចចុះប្រតិបត្តិការ ត្រួតពិនិត្យ និង បង្ក្រាបទីតាំងសង្ស័យអនឡាញ ដោយលើកទី១នៃការផ្ទុះអាវុធ កាលពីថ្ងៃទី២៥ខែមេសា២០២៦នៅចំណុចអគារកម្ពស់១៦ជាន់ ស្ថិតនៅក្នុងសង្កាត់អូរជ្រៅ ត្រូវបានសមត្ថកិច្ចប៉ូលិសបាញ់ឡើងលើដើម្បីបង្រ្កាបនឹងទប់ស្កាត់ការសម្រុកចេញ របស់ជនបរទេសពីក្នុងអគារ៕