ជ្រើសរើសប្រធានបទពេញនិយមពីបណ្តាញសង្គមពីសត្វតាលូនទូនបូកជាមួយនៃការច្នៃប្រឌិតពាក្យពេចន៍បរទេសនៃអាយៃឆ្លើយឆ្លងរវាងអ្នកនាង ខាត់ សុឃីម និងលោក ដួង សុខគា បានធ្វើឱ្យសាធារណជនមានការចាប់អារម្មណ៍យ៉ាងច្រើនខណៈបច្ចុប្បន្នសិល្បៈបែបនេះពុំសូវមានការសម្តែងទូលំទូលាយនោះទេ។ ការគាំទ្រនេះជាការអភិរក្សនិងថែរក្សាមរតកដូនតាខ្មែរដើម្បីកុំឱ្យបាត់បង់នៃសិល្បៈបុរាណខ្មែរមួយនេះ។
នៅក្នុងកម្មពិធី «នគរសង្ក្រាន្ត» ដែលទើបបញ្ចប់ថ្មីៗនេះពោរពេញដោយការចងចាំល្អៗក្នុងការលើកស្ទួយសិល្បៈវប្បធម៌ខ្មែរនាឱកាសពិធីបុណ្យចូលឆ្នាំខ្មែរប្រពៃណីជាតិ។ ជាមួយនឹងការបង្ហាញវប្បធម៌ចម្រុះសិល្បៈអាយ៉ៃ ដែលពុំសូវមានការសម្តែងច្រើននាសម័យបច្ចុប្បន្នបានធ្វើឱ្យសាធារណជនចាប់អារម្មណ៍ម្តងទៀតបន្ទាប់ពីអ្នកនាង ខាត់ សុឃីម ចាប់ដៃគូច្រៀងអាយ៉ៃឆ្លើយឆ្លងជាមួយនឹងលោក ដួង សុខគា។
សិល្បករជើងចាស់ដ៏ចំណានទាំងពីររូបបានជ្រើសរើសប្រធានបទលេបខាយពាក្យសម្តីដោយលើកពីអ្វីដែលបានផ្ទុះនៅលើបណ្តាញសង្គមមកច្រៀងឆ្លើយឆ្លងផ្តុះផ្តងវាចាយ៉ាងស៊ីសង្វាក់បូករួមជាមួយនឹងទម្រង់បុរាណលាយសម័យ។ ក្រៅពីការច្រៀងឆ្លើយឆ្លងបែបសប្បាយៗ បង្កបរិយាកាសរីករាយនៅក្នុងកម្មវិធីអ្នកទាំងពីរក៏បានច្រៀងអាយ៉ៃឆ្លងឆ្លងពីអត្ថន័យសិរី៣ប្រការនៅក្នុងពិធីបុណ្យចូលឆ្នាំខ្មែរផងដែរ។
បន្ទាប់ពីវីដេអូអាយ៉ៃឆ្លើយឆ្លងរវាងលោក ដួង សុខគា និងអ្នកនាង ខាត់ សុឃីម បានបង្ហោះធ្វើឱ្យទស្សនិកជនចាប់អារម្មណ៍យ៉ាងច្រើន។ ឆ្លើយតបទៅនឹងការគាំទ្រនិងការអភិរក្សនៃសិល្បៈអាយ៉ៃនៅយប់ថ្ងៃទី១៩ ខែមេសា តារាពហុជំនាញ ខាត់ សុឃីម បានបង្ហោះសារថ្លែងអំណរគុណទៅកាន់ទស្សនិកជនដូចគ្នាបន្ទាប់ពីឃើញសន្ទុះគាំទ្រច្រើន។ អ្នកនាង ខាត់ សុឃីម បានបង្ហាញអារម្មណ៍រំភើបចិត្តយ៉ាងក្រៃលែងដែលបានបំរើអារម្មណ៍ទស្សនិកជនចំពោះសិល្បៈទម្រង់មួយនេះដោយអ្នកនាងជឿជាក់ថាអ្នកជំនាន់ក្រោយនឹងជួយថែរក្សាឬក៏បន្តវេនឱ្យទម្រង់អាយ៉ៃមួយនេះ ការតែរីកចម្រើនទៅមុខទៀត។
ការគាំទ្រសិល្បៈអាយ៉ៃពីពលរដ្ឋខ្មែរគឺពិតជាមានសារៈសំខាន់ណាស់ក្នុងការអភិរក្សសិល្បៈបុរាណមួយនេះដើម្បីកុំឱ្យបាត់បង់នៅថ្ងៃក្រោយ។ ក្រៅពីការកម្សាន្តសើចសប្បាយអ្នកច្រៀងអាយ៉ៃក៏បានផ្តល់ជាចំណេះដឹងនិងសារអប់រំមួយចំនួនទៅកាន់អ្នកស្តាប់ផងដែរ៕
