ព្យុះទឹកកក រន្ទះបា.ញ់ នឹងវាយប្រ.ហារលើខេត្តចំនួន៤២របស់ថៃនៅភាគខាងកើត និងឦសាន

នាយកដ្ឋានឧតុនិយមថៃបានប្រកាសឱ្យពលរដ្ឋរស់នៅខេត្តចំនួន៤២ ប្រុងប្រយ័ត្នគ្រោះថ្នា.ក់បណ្តាលមកពីខ្យល់ព្យុះរដូវក្តៅ ចាប់ពីថ្ងៃទី២០ រហូតដល់ថ្ងៃទី២៥ ខែមេសា ឆ្នាំ២០២៦ ដែលចន្លោះថ្ងៃនេះ នឹងមានខ្យល់កន្ត្រាក់ ភ្លៀងធ្លាក់ខ្លាំង ព្យុះទឹកកក និងរន្ទះបា.ញ់ ។ លើសពីនេះ នឹងមានធូលីកខ្វក់កើនឡើងលើសស្តង់ដារគ្របដណ្តប់ខេត្តភាគខាងជើង និងកណ្តាល ដោយសំណូមពរឱ្យពាក់ម៉ាស់គ្រប់គ្នាដើម្បីការពារធូលីកខ្វក់ពេលស្ថិតនៅទីវាល ឬចេញទៅខាងក្រៅអគារ ។

តាមការប្រកាសរបស់នាយកដ្ឋានឧតុនិយមថៃនៅថ្ងៃទី២០ ខែមេសា ខេត្តចំនួន៤២ នឹងរងការវាយប្រហារពីខ្យល់ព្យុះរដូវក្តៅ ដែលបណ្តាលឱ្យមានខ្យល់កន្ត្រាក់ ភ្លៀងធ្លាក់ខ្លាំង ព្យុះទឹកកក និងរន្ទះបាញ់ ក្នុងនោះនឹងមានភ្លៀងធ្លាក់ខ្លាំងស្មើ៣០% នៅភាគខាងកើត ដោយនាយកដ្ឋានឧតុនិយមដាស់តឿនឱ្យពលរដ្ឋរស់នៅក្នុងខេត្តទាំងនេះប្រុងប្រយ័ត្នឱ្យបានខ្ពស់ ។

ចាប់ពីថ្ងៃទី២០ ខែមេសា តំបន់មួយចំនួនរបស់ថៃនឹងរងការវាយប្រហារពីខ្យល់ព្យុះរដូវក្តៅ ជាពិសេស ភាគឦសាន និងខាងកើត ហើយខ្យល់ព្យុះនេះនឹងមកនូវខ្យល់កន្ត្រាក់ ភ្លៀងធ្លាក់ខ្លាំង ព្យុះទឹកកក និងរន្ទះបាញ់ ដោយសារខ្យល់ភាគខាងត្បូង និងខ្យល់ភាគអាគ្នេយ៍បក់យកសំណើមពីឈូងសមុទ្រថៃ និងសមុទ្រចិនខាងត្បូងមកគ្របដណ្តប់លើភាគឦសាន ខាងកើត និងផ្នែកខាងលើឈូងសមុទ្រថៃ ដែលធ្វើឱ្យប្រទេសថៃមានអាកាសធាតុក្តៅខ្លាំង ។

នាយកដ្ឋានឧតុនិយមដាស់តឿនឱ្យពលរដ្ឋថែទាំសុខភាពដោយសារអាកាសធាតុក្តៅខ្លាំង និងប្រុងប្រយ័ត្នគ្រោះថ្នាក់ដោយសារខ្យល់ព្យុះ ព្រមទាំងចៀសវាងស្ថិតនៅទីវាល, កុំនៅក្រោមដើមឈើធំៗ, អគារមិនរឹងមាំ និងផ្ទាំងប៉ាណូ រីឯកសិករគួរតែត្រៀមខ្លួនការពារការខូចខាតផលដំណាំដោយសារខ្យល់ព្យុះ និងការពារសត្វពាហនៈ ។

ចាប់ពីថ្ងៃទី២៣ ដល់ថ្ងៃទី២៥ ខែមេសា ខ្យល់ព្យុះនឹងចាប់ផ្តើមវាយប្រហារភាគខាងជើង និងភាគឦសានមុនគេ បន្ទាប់មក ភាគកណ្តាល និងខាងកើត នឹងរងផលប៉ះពាល់ជាបន្តបន្ទាប់ ។ វាបណ្តាលមកពីសម្ពាធខ្ពស់ និងម៉ាស់ខ្យល់ត្រជាក់ពីប្រទេសចិនបក់មកម្តងទៀតគ្របដណ្តប់លើសមុទ្រចិនខាងត្បូង និងភាគឦសាន ខណៈភាគខាងជើងប្រទេសថៃមានអាកាសធាតុក្តៅខ្លាំង ។

លើសពីនេះ ធូលីកខ្វក់យ៉ាងក្រាស់លើសស្តង់ដារនឹងគ្របដណ្តប់ខេត្តភាគខាងជើង និងកណ្តាល ចាប់ពីថ្ងៃទី២៣ ដល់ថ្ងៃទី២៥ ខែមេសា ហើយធូលីកខ្វក់នឹងប៉ះពាល់សុខភាពពលរដ្ឋស្ថិតនៅទីវាល ដែលទាមទារឱ្យពាក់ម៉ាស់ដើម្បីសុវត្ថិភាពពេលចេញទៅខាងក្រៅអគារ ។ នាយកដ្ឋានឧតុនិយមបានប្រកាសពីសីតុណ្ហភាពនឹងកើនឡើងខ្លាំងចាប់ពី២១អង្សាសេ ដល់៤២អង្សាសេ នៅតាមបណ្តាខេត្ត រួមទាំងទីក្រុងបាងកក ចាប់ពីថ្ងៃទី២០ ដល់ថ្ងៃទី២១ ខែមេសា ៕