គ្មានការលើកលែងជាដាច់ខាត! ប្រមុខរាជរដ្ឋាភិបាលកម្ពុជា សម្ដេចធិបតីហ៊ុន ម៉ាណែត បានបញ្ជាក់ច្បាស់ៗថា ក្រុមហ៊ុននឹងត្រូវដកអាជ្ញាប័ណ្ណ ខណៈមន្ត្រីរាជការ ឬកងកម្លាំងប្រដាប់អាវុធ នឹងត្រូវបញ្ចប់តួនាទី និងត្រូវបណ្ដេញចេញពីក្របខណ្ឌភ្លាមៗដោយគ្មានការលើកលែង ប្រសិនបើរកឃើញថាមានលួ.ចនាំប្រេងពីថៃចូលកម្ពុជា។.jpg)
តាមរយៈសំណេរដែលបានបង្ហោះនៅលើទំព័រផេកផ្លូវការ នាព្រឹងថ្ងៃសុក្រ ទី៣ ខែមេសា សម្ដេចធិបតីបានលើកឡើងយ៉ាងដូច្នេះថា ខ្ញុំបានចេញបទបញ្ជាឲ្យ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ឯកឧត្តម ស ថេត អគ្គស្នងការនគរបាលជាតិ និង ឯកឧត្តម គុណ ញឹម អគ្គនាយក អគ្គនាយកដ្ឋានគយ និងរដ្ឋាករកម្ពុជា ស្រាវជ្រាវករណីនេះឲ្យបានច្បាស់លាស់។ ប្រសិនជាមានករណីនេះពិតប្រាកដមែន ត្រូវស្រាវជ្រាវឲ្យឃើញមុខសញ្ញាពាក់ព័ន្ធទាំងអស់ ហើយត្រូវចាត់វិធានការច្បាប់ឲ្យបានតឹងរឹងបំផុត។
តាមការគូសបញ្ជាក់របស់សម្ដេច ប្រសិនជាមានពាក់ព័ន្ធជាមួយក្រុមហ៊ុនប្រេងណាមួយ គឺត្រូវតែដកអាជ្ញាប័ណ្ណ។ ដោយឡែក ប្រសិនជាមានពាក់ព័ន្ធជាមួយមន្ត្រីរាជការ ឬកងកម្លាំងប្រដាប់អាវុធកម្ពុជា បុគ្គលនោះនឹងត្រូវបញ្ចប់តួនាទី និងបណ្ដេញចេញពីក្របខណ្ឌជាកំហិត មិនថាបុគ្គលនោះមានតួនាទី ឬឋានន្តរស័ក្តិប៉ុណ្ណានោះទេ។
ការចេញបញ្ជាដ៏តឹងរឹងនេះ ធ្វើឡើងក្រោយសម្ដេចធិបតីបានឃើញបណ្ដាញសារព័ត៌មានថៃចុះផ្សាយព័ត៌មាន ពាក់ព័ន្ធនឹងករណីដែលមានបណ្ដាញលួចនាំប្រេងខុសច្បាប់ ពីប្រទេសថៃចូលមកលក់នៅកម្ពុជានៅក្នុងពេលនេះ។
.jpg)
សូមរំលឹកថា កម្ពុជាបានផ្អាកការទិញប្រេងឥន្ធនៈ និងឧស្ម័នឥន្ធនៈគ្រប់ប្រភេទ ពីប្រទេសថៃចាប់តាំងពីខែមិថុនាឆ្នាំ២០២៥ ដោយកម្ពុជាមានប្រភពប្រេងពីប្រទេសផ្សេងៗគ្រប់គ្រាន់ហើយ ហើយក៏មិនមានការចាំបាច់ក្នុងការនាំប្រេងចូលពីប្រទេសថៃទៀតដែរ៕
