Song Weilong ត្រូវបានហ្វូងមនុស្សចោមរោមបន្ទាប់ពីលេចធ្លាយកាលវិភាគឯកជន

ថ្មីៗនេះ Song Weilong បានស្ថិតនៅចំកណ្តាលនៃការពិភាក្សាដ៏ក្តៅគគុកតាមអ៊ីនធឺណិត បន្ទាប់ពីត្រូវបានហ្វូងមនុស្សប្រមូលផ្តុំគ្នានៅអាកាសយានដ្ឋាន ដោយសារតែការលេចធ្លាយកាលវិភាគធ្វើដំណើរឯកជនរបស់ខ្លួន។

តារាសម្តែងចិន Song Weilong កាន់តែកើនឡើងនៃប្រជាប្រិយភាពបន្ទាប់ពីភាពជោគជ័យនៃរឿងភាគ «Shine on Me» ហើយត្រូវបានគេរាយការណ៍ថាលោកកំពុងធ្វើដំណើរទៅកាន់ទីកន្លែងមួយដោយសារហេតុផលផ្ទាល់ខ្លួន។ ទោះជាយ៉ាងណាក៏ដោយ ព័ត៌មានលម្អិតនៃផែនការធ្វើដំណើររបស់តារាសម្តែងរូបនេះត្រូវបានលាតត្រដាងតាមអ៊ីនធឺណិត ដែលនាំឱ្យក្រុមអ្នកគាំទ្រ រួមទាំងអ្នកដែលត្រូវបានគេចោទប្រកាន់ថាអ្នកគាំទ្រងប់ងល់ រោគចិត្ត តាមដានចលនារបស់ Song Weilong និងប្រមូលផ្តុំគ្នានៅអាកាសយានដ្ឋានដើម្បីរង់ចាំលោក។

វីដេអូដែលសាយភាយនៅលើបណ្ដាញសង្គមបង្ហាញពី Song Weilong ត្រូវបានឡោមព័ទ្ធនៅចម្ងាយជិត ដោយមានទូរស័ព្ទជាច្រើនគ្រឿងលើកឡើងចំមុខតារាប្រុសរូបនេះ។ មានពេលមួយ ដោយមានការខកចិត្តយ៉ាងខ្លាំង លោកបានងាកមកវិញ ហើយនិយាយយ៉ាងម៉ឺងម៉ាត់ថា «កុំប៉ះខ្ញុំ Okay?» ទោះបីជាពាក់វ៉ែនតាការពារកម្ដៅថ្ងៃ និងម៉ាស់ក៏ដោយអ្នកសង្កេតការណ៍បានកត់សម្គាល់ថា សម្លេងរបស់ Song Weilong បានបង្ហាញថាលោកកំពុងព្យាយាមទប់កំហឹងរបស់ខ្លួន។

អ្នកប្រើប្រាស់អ៊ីនធឺណិតបានប្រតិកម្មយ៉ាងខ្លាំងចំពោះវីដេអូនោះ ដោយមានអ្នករិះគន់ជាច្រើនអំពីកង្វះព្រំដែនផ្ទាល់ខ្លួន។ មិនយូរប៉ុន្មានបន្ទាប់ពីហេតុការណ៍នេះ ស្ទូឌីយោរបស់ Song Weilong បានចេញសេចក្តីថ្លែងការណ៍ជាផ្លូវការមួយថ្កោលទោសអាកប្បកិរិយានេះ។ សេចក្តីថ្លែងការណ៍នេះបានបញ្ជាក់ថា ក្នុងអំឡុងពេលធ្វើដំណើរឯកជនរបស់ Song Weilong បុគ្គលមួយចំនួនបានឈរចាំយូរនៅក្នុងតំបន់អាកាសយានដ្ឋានសាធារណៈ បិទផ្លូវ ដើរតាមគាត់ និងថតវីដេអូជិតៗ។ ស្ទូឌីយោបានសង្កត់ធ្ងន់ថា សកម្មភាពទាំងនេះបានរំខានដល់សណ្តាប់ធ្នាប់សាធារណៈ រំខានដល់អ្នកធ្វើដំណើរផ្សេងទៀត និងបង្កហានិភ័យសុវត្ថិភាព។

យោងតាមទីភ្នាក់ងារនេះ នេះមិនមែនជាករណីដាច់ដោយឡែកនោះទេ។ បើទោះបីជាមានរបាយការណ៍របស់ប៉ូលិសពីមុន និងសេចក្តីថ្លែងការណ៍ជាសាធារណៈដែលលើកឡើងពីឧប្បត្តិហេតុស្រដៀងគ្នានេះក៏ដោយ ក៏បុគ្គលមួយចំនួននៅតែបន្តមិនអើពើនឹងព្រំដែនផ្លូវច្បាប់ សូម្បីតែការទទួលបាន និងផ្សព្វផ្សាយព័ត៌មានកាលវិភាគដែលមិនមែនជាសាធារណៈតាមរយៈបណ្តាញមិនត្រឹមត្រូវ។

ស្ទូឌីយោបានជំរុញឱ្យសាធារណជនចៀសវាងការចែករំលែក ឬទិញព័ត៌មានលម្អិតអំពីដំណើរកម្សាន្តដែលលេចធ្លាយ ហើយបានអំពាវនាវដល់អ្នកគាំទ្រកុំឱ្យពង្រីកអាកប្បកិរិយាបែបនេះដោយការចូលរួម ឬចែកចាយឡើងវិញនូវខ្លឹមសារពាក់ព័ន្ធ។ លិខិតនោះក៏បានបញ្ជាក់ផងដែរថា ក្រុមមេធាវីពួកគេកំពុងប្រមូលភស្តុតាងយ៉ាងសកម្ម ហើយនឹងបន្តសកម្មភាពផ្លូវច្បាប់បន្ថែមទៀតប្រឆាំងនឹងអ្នកដែលទទួលខុសត្រូវ៕