វណ្ណដា ជាមនុស្សដំបូងឆាតសួរ KingChi មានបញ្ហាអ្វីពេលបង្ហោះត្រូវរកលុយឱ្យបាន៦ម៉ឺនដុល្លារ

នៅក្នុងកម្មវិធី Listening Party កាលពីពេលថ្មីៗនេះតារារ៉េប KingChi បានទម្លាយប្រាប់ទស្សនិកជនថា វណ្ណដា គឺជាមនុស្សដំបូងដែលបានឆាតមកសួរលោកថាមានរឿងអ្វីបន្ទាប់ពីលោកកបានបង្ហោះត្រូវរកលុយឱ្យបានចំនួន៦ម៉ឺនដុល្លារ។ ក្នុងគ្រានោះ វណ្ណដា បានជួយ KingChi ចំនួន៥០០០ដុល្លារផងដែរ។

ដូចប្រិយមិត្តមួយចំនួនជ្រាបមកហើយថាកន្លងមកនេះភរិយារបស់តារារ៉េប KingChi មានបញ្ហាសុខភាពយ៉ាងធ្ងន់ធ្ងររហូតត្រូវវះកាត់ប្តូរក្រលៀន ដែលមកទល់ពេលនេះគឺវះកាត់ប្រកបដោយភាពជោគជ័យហើយ។ នាគ្រានោះ KingChi និងភរិយា បានប្រកាសលក់ផ្ទះរបស់ខ្លួនភ្លាមៗដើម្បីយកលុយមកព្យាបាលជំងឺ ពីព្រោះដំបូងឡើយត្រូវលាងឈាមញឹកញាប់។ ក្រោយពីរឿងនេះបានសាយភាយគ្របដណ្តប់លើបណ្តាញសង្គមមានសិល្បករជាច្រើនបានជួយសម្រួលបន្ទុកមួយផ្នែករបស់ KingChi ក៏ដូចជាសារលើកទឹកចិត្តពីបងប្អូនអ្នកគាំទ្រ។

យ៉ាងណាមិញនាពេលថ្មីៗនេះ KingChi ទើបតែបង្ហើបប្រាប់សិល្បករ និងទស្សនិកជនតាមរយៈកម្មវិធី Listening Party ពីអាល់ប៊ុមរបស់ខ្លួនដោយបញ្ជាក់ៗថា វណ្ណដា គឺជាមនុស្សដំបូងគេដែលបានឆាតមកសួរលោកថាមានបញ្ហាអ្វី។ លោកក៏បានរម្លឹកនិងអរគុណ វណ្ណដា ដោយមានសំឡេងអមអរសាទរពីសិល្បករនិងអ្នកគាំទ្រដែលបានចូលរួមផងដែរ។

គួរបញ្ជាក់ផងដែរថា អំឡុងពេលនោះ វណ្ណដា បានជួយថវិកា KingChi សម្រាប់ព្យាបាលភរិយាចំនួន៥០០០ដុល្លារដែលជាចំនួនខ្ពស់ជាងគេក្នុងចំណោមសិល្បករដទៃទៀតដែលបានជួយលោក។ វណ្ណដា និង KingChi គឺមានទំនាក់ទំនងល្អជាមួយគ្នាបើទោះបីជាពេលនេះ KingChi ពុំបានធ្វើការជាមួយគ្នាក្នុងកម្មវិធីរ៉េបដូចកាលពីមុនឡើយ។ កាលពីថ្ងៃកំណើត វណ្ណដា គេក៏បានឃើញវត្តមានរបស់ KingChi ចូលរួមដូចគ្នា៕