វីន វិទូ , ខ្មែរមួយជីវិត , ឌីជេ ក្តិប , KingChi និងសិល្បករមួយចំនួនទៀតបានបង្ហាញការសោកស្តាយយ៉ាងខ្លាំងនិងចូលរួមរំលែកទុក្ខមកកាន់ MC Lisha ដែលបានទទួលមរណភាពក្នុងវ័យ៤៤ឆ្នាំដោយសារតែជំងឺសួតដំណាក់កាលធ្ងន់ធ្ងរ។ 
តាមការបញ្ជាក់នៅលើបណ្តាញសង្គម MC Lisha បានលាចាកលោកនាវេលាម៉ោង ៦ និង៥០នាទីព្រឹកថ្ងៃទី៥ ខែកុម្ភៈ ឆ្នាំ២០២៦ បន្ទាប់ពីរយៈពេល៦ថ្ងៃដែលតារាចម្រៀងរ៉េបជើងចាស់រូបនេះត្រូវបានបញ្ជូនទៅកាន់មន្ទីរពេទ្យជាលើកទីពីរកាលពីថ្ងៃទី៣០ ខែមករា។ MC Lisha ដែលមានឈ្មោះពិតថា ស្រ៊ីន ជេស៊ីកា ជាស្ត្រីខ្មែរដំបូង ដែលមានភាពល្បីល្បាញផ្នែកតន្ត្រីហ៊ីបហប់នៅកម្ពុជានាអំឡុងឆ្នាំ២០០០។ រយៈពេលជិត២ឆ្នាំចុងក្រោយនេះតារារ៉េបជើងចាស់រូបនេះបានជួបប្រទះបញ្ហាសុខភាពធ្លាក់ក្នុងសភាពស្គមស្គាំងយ៉ាងខ្លាំងដោយសាមីខ្លួនធ្លាប់បានបញ្ជាក់ប្រាប់សាធារណជនថាមានបញ្ហាសួតលក្ខណៈធ្ងន់ធ្ងរ។
បើតាមទំព័រផេក ក្រុមព្រះសុរិយា តារាចម្រៀងលីស្សា មានភាពល្បីល្បាញខ្លាំង ជាពិសេសពេលបំពេញការងាររួមជាអ្នកកាន់កម្មវិធីវិទ្យុ (DJ) ជាមួយ DJ Sope ក្នុងការបញ្ជ្រាបការអប់រំតាមរយៈតន្ត្រីហ៊ីបហប់នៅកម្ពុជា។ គាត់មានបទចម្រៀងដ៏ល្បីជាច្រើនបទ ជាពិសេសនៅក្នុងគម្រោង The Cambodian Space Project, ផលិតកម្ម KlapYaHandz ជាដើម។
បទមួយចំនួនរបស់ MC Lisha ដែលទស្សនិកជនបានស្គាល់រួមមាន លោតដូចបេះដូង (ft Khmer Kid & Youngstez), They forget about us, Woman, ប្រុសស្អាត, Sweet Words, កាលខ្ញុំនៅពីក្រមុំ (ft Sreyleak), ត្រាវ (Gossip Bitches), ពួកគេភ្លេចយើងហើយ version2 ជាដើម។
ដំណឹងនេះបានធ្វើឱ្យអ្នកនៅក្នុងចង្កោមសិល្បៈហ៊ីបហបបង្ហាញការសោកស្តាយយ៉ាងខ្លាំងដោយចាត់ទុកថានេះជាការបាត់បង់ធនធានម្នាក់នៅក្នុងវិស័យនេះដែលបានត្រួសត្រាយផ្លូវ ហ៊ីបហបនៅកម្ពុជា៕
