ទីក្រុងប៉េកាំង៖ ក្រុមហ៊ុនជីវបច្ចេកវិទ្យាចិនថ្មីមួយបានបង្កឱ្យមានចំណាប់អារម្មណ៍ទូទាំងពិភពលោក ជាមួយនឹងការអះអាងយ៉ាងក្លាហានអំពីថ្នាំគ្រាប់ម្យ៉ាង ដែលមានសម្ថភាពប្រឆាំងភាពចាស់របស់មនុស្សបាន ហើយរំពឹងថានៅក្នុងពេលអនាគតដ៏ខ្លី វានឹងអាចពន្យារជីវិតមនុស្សឲ្យរស់នៅបានរហូតដល់ 150ឆ្នាំ តាមរយៈការកម្ចាត់កោសិកាដែលងាប់ចេញពីរាងកាយ។ នេះបើតាមការចេញផ្សាយរបស់The New York Times។
.jpg)
ក្រុមហ៊ុនជីវបច្ចេកវិទ្យា Lonvi Biosciences ដែលមានមូលដ្ឋាននៅទីក្រុង Shenzhen ប្រទេសចិនបានប្រកាសថា ថ្នាំគ្រាប់ពិសោធន៍របស់ខ្លួនមួយប្រភេទផ្តោតលើអ្វីដែលហៅថា “កោសិកាខ្មោចឆៅ” ឬ Zombie cells ដែលចម្រាញ់ចេញពីគ្រាប់ទំពាំងបាយជូរ នឹងចូលទៅប្រឆាំងកោសិកាចាស់ៗដែលលែងលូតលាស់ បន្ថយល្បឿននៃដំណើរការភាពចាស់បានគ្រប់គ្រាន់ ដើម្បីអនុញ្ញាតឱ្យមនុស្សរស់នៅលើសពីដែនកំណត់ធម្មជាតិសព្វថ្ងៃនេះ។
.jpg)
យោងតាមលទ្ធផលនៃការអភិវឌ្របស់ក្រុមហ៊ុន Lonvi Biosciences ដែលបានដាក់បង្ហាញ សារធាតុដែលរកឃើញខាងលើនេះត្រូវបានគេហៅថា Procyanidin C1 (PCC1) ដែលមានសមត្ថភាពពិសេសក្នុងការកំណត់មុខសញ្ញា និងកម្ចាត់កោសិកាហ្សូមប៊ី ដែលបង្កឱ្យមានការរលាករ៉ាំរ៉ៃ និងជាមូលហេតុចម្បងនៃជំងឺផ្សេងៗដែលកើតឡើងតាមវ័យ។
នៅក្នុងការពិសោធន៍លើសត្វកណ្តុរ កណ្ដុរដែលគេបានផ្តល់សារធាតុ PCC1ឲ្យមានឱកាសរស់នៅបានយូរជាងប្រហែល 9-10% ជាមួយនឹងការកើនឡើងធំជាងនៅក្នុងអាយុជីវិតដែលនៅសល់បន្ទាប់ពីការព្យាបាលបានចាប់ផ្តើម។ នាយកប្រតិបត្តិ Lonvi បានពិពណ៌នាអំពីរឿងនេះថាជាមូលដ្ឋានគ្រឹះដ៏មានសក្តានុពលសម្រាប់ការព្យាបាលប្រឆាំងភាពចាស់របស់មនុស្សនាពេលអនាគត ហើយបានអះអាងថាការរស់នៅដល់អាយុ 150 ឆ្នាំរបស់មនុស្សនឹងអាចក្លាយមកជាការពិតក្នុងពេលឆាប់ៗ។
.jpg)
ទោះបីជាមានការរំភើបក៏ដោយ ប៉ុន្តែអ្នកវិទ្យាសាស្ត្របានជំរុញឱ្យមានការប្រុងប្រយ័ត្ន។ អ្នកជំនាញកត់សម្គាល់ថា ការកើនឡើងនៃអាយុកាលដែលឃើញនៅក្នុងសត្វកណ្ដុរមិនប្រាកដថាអាចទៅរួចនៅលើមនុស្សនោះទេ ហើយការសាកល្បងព្យាបាលយ៉ាងទូលំទូលាយនឹងត្រូវការពេលបន្ថែមដើម្បីបញ្ជាក់ថា ថ្នាំនេះមានសុវត្ថិភាពសម្រាប់ការប្រើប្រាស់។
បច្ចុប្បន្ន ប្រទេសចិនកំពុងជំរុញវិស័យស្រាវជ្រាវពន្យារអាយុជីវិត (Longevity sector) ឱ្យក្លាយជាអាទិភាពជាតិដើរទន្ទឹមនឹងបច្ចេកវិទ្យា AI។ តែទោះជាយ៉ាងណា ការរស់នៅរហូតដល់ 150ឆ្នាំ នៅតែត្រូវបានគេចាត់ទុកថាជា «ក្តីស្រមៃនាពេលអនាគត» ដែលស្ថិតក្នុងដំណាក់កាលសិក្សានៅឡើយ។ ហើយរហូតមកដល់ពេលនេះ មិនទាន់មានភស្តុតាងដែលបង្ហាញពីការសិក្សារបស់មនុស្សដែលបង្ហាញថា ថ្នាំគ្រាប់ណាមួយអាចបង្កើនអាយុកាលមនុស្សនោះទេ ហើយអ្នកស្រាវជ្រាវជាច្រើនបានសង្កត់ធ្ងន់ថា ភាពចាស់ជរាគឺជាដំណើរការជីវសាស្រ្តដ៏ស្មុគស្មាញមួយដែលគ្មានការព្យាបាលដោយសាមញ្ញបែបនេះឡើយ៕
