កំពុងបម្រើការងារជាទាហាន Cha Eun Woo រងការចោទប្រកាន់ថាគេចពន្ធជាង១៣លានដុល្លារ

យោងតាមរបាយការណ៍ប្រព័ន្ធផ្សព្វផ្សាយផ្តាច់មុខមួយនៅថ្ងៃទី២២ ខែមករាការិយាល័យពន្ធដារតំបន់សេអ៊ូលបានធ្វើសវនកម្មពន្ធយ៉ាងម៉ត់ចត់លើប្រាក់ចំណូលរបស់ Cha Eun Woo ក្នុងឆមាសទីមួយនៃឆ្នាំ២០២៥។ ការិយាល័យពន្ធដារសង្ស័យថា Cha Eun Woo បានបង្កើត «ក្រុមហ៊ុនក្រដាស» ជាមួយម្តាយរបស់ខ្លួន បន្ទាប់មកបានចុះកិច្ចសន្យាសេវាកម្មជាមួយក្រុមហ៊ុនគ្រប់គ្រងរបស់លោកគឺ Fantagio ដើម្បីអនុវត្តពន្ធសាជីវកម្មទាបជាង២០% លើផ្នែកមួយនៃប្រាក់ចំណូលរបស់លោក។

ការិយាល័យពន្ធដារកំពុងស៊ើបអង្កេតការចែកចាយប្រាក់ចំណូលរបស់ Cha Eun Woo តាមរយៈបណ្តាញបីគឺ Fantagio ដែលជាក្រុមហ៊ុនដែលបង្កើតឡើងដោយ Cha Eun Woo និងម្តាយ និង Cha Eun Woo ផ្ទាល់។ គេសង្ស័យថា Cha Eun Woo ប្រហែលជាបានគេចវេសពន្ធរហូតដល់ ២០ ពាន់លានវ៉ុន ប្រមាណ១៣.៦ លានដុល្លារអាម៉េរិកដោយផ្ទេរប្រាក់ចំណូលមួយផ្នែកទៅឱ្យ «ក្រុមហ៊ុនក្រដាស»ដែលមិនបានផ្តល់សេវាកម្មពិតប្រាកដ និងបង់ពន្ធសាជីវកម្មជំនួសឱ្យពន្ធឯកជន។ នេះបើយោងទៅតាមការចុះផ្សាយប្រពន្ធ័ផ្សព្វផ្សាយកូរ៉េជាច្រើននៅព្រឹកថ្ងៃទី២២ ខែមករា ឆ្នាំ២០២៦។

បន្ទាប់ពីការធ្វើសវនកម្ម ភាគីរបស់ Cha Eun Woo បានដាក់ជូនការវាយតម្លៃឡើងវិញ ដោយអះអាងថាក្រុមហ៊ុនរបស់លោក ត្រូវបានចុះបញ្ជីជាផ្លូវការជាភ្នាក់ងារកម្សាន្ត ហើយមិនមែនជាក្រុមហ៊ុនក្រដាសទេ។ ក្រុមហ៊ុនរបស់តារាប្រុសរូបនេះនឹងរៀបចំសេចក្តីថ្លែងការណ៍ជាផ្លូវការ។

គួរបញ្ជាក់ផងដែរថា Cha Eun Woo បានចូលបំពេញកាតព្វកិច្ចយោធានៅក្នុងខែកក្កដា ឆ្នាំ២០២៥ហើយបច្ចុប្បន្នកំពុងបម្រើការនៅក្នុងក្រុមតន្រ្តីកងទ័ពសាធារណរដ្ឋកូរ៉េ។ កាល បរិច្ឆេទចាកចេញរបស់លោកគឺគ្រោងចេញនៅថ្ងៃទី ២៧ ខែមករា ឆ្នាំ២០២៧៕