ហាមផឹកភេសជ្ជៈ៤ប្រភេទនេះពេលពោះទទេដាច់ខាតដើម្បីការពារផលប៉ះពាល់សុខភាពធ្ងន់ធ្ងរ

ទោះជាភេសជ្ជៈ៤ប្រភេទនេះផ្តល់ផលល្អសម្រាប់សុខភាព ប៉ុន្តែអ្នកជំនាញអាហារហាមផឹកពេលពោះទទេដាច់ខាត ពីព្រោះវាប៉ះពាល់សុខភាពធ្ងន់ធ្ងរ ដូចជា ៖ ខូចក្រពះ និងច្រាលអាស៊ីត សូម្បីតែអ្នកមានសុខភាពរឹងមាំ ក៏ប៉ះពាល់សុខភាពដែរ ។ មនុស្សភាគច្រើនចូលចិត្តផឹកភេសជ្ជៈទាំងនេះមុនពេលបរិភោគអាហារដើម្បីឱ្យអស់អារម្មណ៍ស្រស់ស្រាយ ប៉ុន្តែតើដឹងទេថា វាជាថ្នាំពុលបំផ្លា.ញក្រពះ ប្រសិនបើផឹកពេលពោះទទេ ។

អ្នកជំនាញអាហារព្រមានថា ការផឹកភេសជ្ជៈមិនត្រឹមត្រូវតាមពេលវេលាដើម្បីបំបាត់ការស្រេក ឬងងុយគេង វានឹងបំផ្លាញដល់ប្រព័ន្ធរំលាយអាហារយ៉ាងខ្លាំង ។ តើភេសជ្ជៈទាំង៤ប្រភេទនេះមានអ្វីខ្លះ ដែលគួរតែចៀសវាងនៅពេលមិនទាន់បរិភោគអ្វីចូលពោះ?

១-កាហ្វេខ្មៅ ៖ កាហ្វេខ្មៅត្រូវបានមនុស្សភាគច្រើនផឹកពេលព្រឹកដើម្បីជួយបំបាត់ការងងុយគេង និងកាត់បន្ថយហានិភ័យជំងឺទឹកនោមផ្អែម ប៉ុន្តែអ្នកជំនាញអាហារព្រមានថា ការផឹកកាហ្វេខ្មៅពេលពោះទទេ គឺជាការបំផ្លាញក្រពះដោយប្រយោល ដោយសារកាហ្វេខ្មៅមានសារធាតុ Chlorogenic acid ច្រើនដែលជំរុញឱ្យក្រពះបញ្ចេញជាតិអាស៊ីត ។ យើងអាចផឹកទឹកដោះគោ ឬទឹកសណ្តែកបន្តិច ឬបរិភោគនំប៉័ង ចេក យៅអ៊ួ មុនពេលផឹកកាហ្វេខ្មៅដើម្បីកុំឱ្យប៉ះពាល់សុខភាព ។

២-ទឹកតែ ៖ អ្នកខ្លះគេចពីកាហ្វេមកផឹកទឹកតែ ដោយសារគិតថា មិនប៉ះពាល់សុខភាព ប៉ុន្តែការពិត ទឹកតែក៏មានសារធាតុកាហ្វេអ៊ីន និងតានីន ដែលជំរុញអាស៊ីតក្នុងក្រពះដូចគ្នា អ្នកជំនាញអាហារថា ការផឹកទឹកតែចាស់ពេលពោះទទេ អាចប្រឈមនឹងអាការៈស្រវឹងទឹកតែ គឺក្អួតចង្អោរ និងឈឺពោះ ។ ក្រៅពីនេះ ការផឹកទឹកតែក្តៅពេលពោះទទេ នឹងកាន់តែប៉ះពាល់ក្រពះថែមទៀត ដែលយកល្អ គួរផឹកទឹកតែក្តៅឧណ្ឌៗ និងបរិភោគនំ Cookie ឬអាហារមានប្រូតេអ៊ីន ។

៣-ទឹកក្រូច ឬទឹកក្រូចឆ្មារ ៖ យើងដឹងថា ការផឹកទឹកក្រូចស្រស់ៗពេលព្រឹកមុនការបរិភោគអាហារផ្តល់ផលល្អសម្រាប់សុខភាព ពីព្រោះសម្បូរវីតាមីន ប៉ុន្តែបើផឹកពេលពោះទទេ មិនល្អសម្រាប់សុខភាពឡើយ ដោយសារក្រូច ឬក្រូចឆ្មារ មានអាស៊ីត Citric និងស្ករខ្ពស់ ។ ផលប៉ះពាល់សុខភាព គឺងងឹតមុខ និងឆាប់មួរម៉ៅ ប្រសិនបើចង់ផឹក គួរផឹកជាមួយទឹកសណ្តែក និងបរិភោគយៅអ៊ួ ដើម្បីបន្ថយការស្រូបជាតិស្ករ ។

៤-ភេសជ្ជៈប៉ូវកម្លាំង ៖ យើងតែងផឹកភេសជ្ជៈប៉ូវកម្លាំងពេលងងុយគេង ប៉ុន្តែវាប៉ះពាល់សុខភាពខ្លាំងបំផុត ជាពិសេស ប្រព័ន្ធរំលាយអាហារ បើផឹកពេលពោះទទេ ពីព្រោះវាសម្បូរសារធាតុកាហ្វេអ៊ីន និងស្ករ ។ គួរផឹកវាពេលបរិភោគអាហាររួចរាល់ ឬបរិភោគអាហារមានប្រូតេអ៊ីនខ្ពស់ ដូចជា ៖ ស៊ុត សណ្តែក និងឈីស ។

សរុបមក ការថែទាំសុខភាពមិនមែនគ្រាន់តែជាការជ្រើសរើសអាហារ ឬភេសជ្ជៈល្អៗសម្រាប់សុខភាពប៉ុណ្ណោះទេ ប៉ុន្តែគួរបរិភោគឱ្យត្រឹមត្រូវតាមពេលវេលាផងដែរ ។ បើអាចចៀសវាងបាន គួរបរិភោគអាហារសម្រន់បន្តិចមុនពេលផឹកភេសជ្ជៈទាំង៤នេះ ដើម្បីរក្សាសុខភាពក្រពះបានយូរអង្វែង ៕