តារាចម្រៀង យឿន សូត្រអនុស្សាវរីយ៍ បានចេញវីដេអូសូមទោសជាសាធារណៈក្រោយពីលោកបានឆ្លើយតបដោយសម្តីអសុរោះមកកាន់អ្នកលេងបណ្តាញសង្គមក្នុងនាមជាមនុស្សរបស់មហាជន។
កាលពីកន្លងមកនេះតារាចម្រៀងក្នុងទ្រនំសាន់ដេ យឿន សូត្រអនុស្សាវរីយ៍ បានបង្ហោះសារក្នុងន័យត្អូញត្អែរពីផលលំបាកក្នុងនាមជាអ្នកចម្រៀងបន្ទាប់ពីរោងការត្រូវបានបិទ។ លោកបានបង្ហោះយ៉ាងដូច្នេះថា «តើអ្នកច្រៀងទៅជាណាបើគេបិទអស់ការច្រៀងអស់ហើយចប់ហើយខ្ញុំមនុស្សម្នាក់ៗមានបន្ទុករាងៗខ្លួន»។ សំណេរនេះបានធ្វើឱ្យអ្នកលេងបណ្តាញសង្គមមួយចំនួនបញ្ចេញមតិរិះគន់លោកដោយគណនីខ្លះក៏បានប្រើពាក្យមិនសមរម្យមកកាន់តារាចម្រៀងរូបនេះផងដែរ។
ឃើញមានការបញ្ចេញមតិរិះគន់មកកាន់ខ្លួនដោយសម្តីមិនសមរម្យតារាចម្រៀង យឿន សូត្រអនុស្សាវរីយ៍ បានឆ្លើយតបទៅវិញដោយសម្តីអសុរោះមិនសមរម្យទៅវិញដោយមិនចុះញមឡើយ។ នេះបានជំរុញឱ្យសាធារណជនបញ្ចេញមតិរិះគន់លោកមិនសំចៃម្តងទៀតពីព្រោះពួកគេយល់ថាការឆ្លើយតបបែបនេះពុំស័ក្តិសមក្នុងនាមលោកជាតារាចម្រៀងម្នាក់។
នៅល្ងាចថ្ងៃទី២៩ ខែធ្នូ ម្ចាស់បទ «ស្រមោច» បានចេញវីដេអូសូមទោសមហាជនចំពោះការប្រើប្រាស់ពាក្យសម្តីមិនសមរម្យ អសុរោះ របស់ខ្លួនទៅកាន់អ្នកលេងបណ្តាញសង្គម។ ក្នុងវីដេអូនេះ យឿន សូត្រអនុស្សាវរីយ៍ បានពន្យល់ថាការបង្ហោះរបស់ខ្លួនមិនមែនមានន័យថាលោកពិបាកតែម្នាក់ឯងនោះទេប៉ុន្តែក៏សម្តៅដល់សិល្បករដទៃទៀតដូចគ្នា ខណៈមានអ្នកអគតិមួយចំនួនជេរមកកាន់លោកហើយលោកទប់អារម្មណ៍មិនបានក៏ជេរតបតវិញ។
យឿន សូត្រអនុស្សាវរីយ៍ បានបន្តដោយការសូមទោសមហាជនចំពោះពាក្យសម្តីមិនល្អរបស់ខ្លួននៅលើបណ្តាញសង្គម។ ការចេញមកសូមទោសនេះ យឿន សូត្រអនុស្សាវរីយ៍
បានបញ្ជាក់ថាលោកមិនចង់ឱ្យអ្នកគាំទ្ររបស់ខ្លួនមានការយល់ច្រឡំ ខណៈលោកបានសន្យាថានឹងព្យាយាមផលិតចម្រៀងល្អៗជាការតបស្នងនឹងការគាំទ្ររបស់មហាជនដែលយល់ចិត្តលោក៕
