ដូចប្រិយមិត្តជ្រាបហើយថា វណ្ណដា វណ្ណថាន នរិទ្ធ យូហៃ និងរ៉េត ស៊ូហ្សាណា បានសម្តែងការប្រគំតន្រ្តីប្រកបដោយភាពជោគជ័យនៅសាល Salle Pleyel ក្នុងទីក្រុងប៉ារីសប្រទេសបារាំង។ ជាមួយនឹងការចាប់អារម្មណ៍ការសម្តែងរបស់សិល្បករទាំង៥ អ្នកគាំទ្រក៏បន្តតាមដានសកម្មភាពជាពិសេសរវាង យូហៃ និង ហ្សាណា ដូចគ្នា។
តាមរយៈការចែករំលែកវីដេអូពីទីក្រុងប៉ារីសមកគេសង្កេតឃើញថា ម្ចាស់ពានកម្មវិធីប្រលងចម្រៀងរ៉េប យូហៃ និង រ៉េត ស៊ូហ្សាណា មានភាពចុះសម្រុងគ្នាយ៉ាងខ្លាំងធ្វើឱ្យអ្នកគាំទ្រ ពិតជាមិនអាចឈប់ Ship អ្នកទាំងពីរបាននោះទេ។ តារាចម្រៀងទាំងពីរដួងមិនថានៅក្នុងស្រុកមានសកម្មភាពស្និទ្ធស្នាលប៉ុណ្ណោះទេ ប៉ុន្តែក្រឡេកទៅមើលសកម្មភាពនៅប្រទេសបារាំង វិញអ្នកទាំងពីរនៅតែយកចិត្តទុកដាក់ក្បែរគ្នា ស្និទ្ធស្នាល ស្ទើរតែទ្វេដងជាហេតុធ្វើឱ្យអ្នកទស្សនាមានអារម្មណ៍ថាអ្នកទាំងពីរប្រៀបដូចជាគូស្នេហ៍ពិតៗ។
នៅពេលឃើញ យូហៃ និងហ្សាណា មានទំនាក់ទំនងល្អជាមួយគ្នាតាំងពីក្នុងស្រុករហូតដល់ក្រៅស្រុកបែបនេះអ្នកលេងបណ្តាញសង្គមទិកតុកជាអ្នកគាំទ្របានបញ្ចេញមតិថានឹង Ship អ្នកទាំងពីរដល់ចាស់។ អ្នកមួយចំនួនក៏លើកឡើងថានៅពេលឃើញយូហៃ និង ហ្សាណា មានភាពផ្អែមហ្ហែមដូចនេះធ្វើឱ្យពួកគេមើលហើយញញឹម ខណៈដែលសកម្មភាពរបស់អ្នកទាំងពីរពិតជាមិនអាចធ្វើឱ្យអ្នកគាំទ្រឈប់ Ship អ្នកទាំងពីរបាននោះទេ។
យោងតាមវីដេអូមួយគេបានឃើញទស្សនិកជនបានថតរូបអនុស្សាវរីយ៍ជាមួយនឹងសិល្បករ វណ្ណដា នរិទ្ធ ចំណែកឯ យូហៃ និង ហ្សាណា នៅជិតគ្នាហាក់ដូចជាមើលទៅមានតែរូបគេពីរនាក់។ នៅលើឆាកប្រគំតន្រ្តីវិញអ្នកទាំងពីរក៏រាំជាមួយគ្នាយ៉ាងសប្បាយរីករាយ។
មិនត្រឹមតែសកម្មភាពទាំងនេះប៉ុណ្ណោះទេ ប៉ុន្តែនៅមានសកម្មភាពជាច្រើនទៀតដែលទស្សនិកជនមើលឃើញ យូហៃ និង រ៉េត ស៊ូហ្សាណា ពិតជាស្និទ្ធស្នាល យកចិត្តទុកដាក់ចំពោះគ្នាទៅវិញទៅមកមានទំនាក់ទំនងស្វីតជាងគេនៅក្នុងក្រុម៕
