អតីតមន្ត្រីរាជការទាមទារឱ្យនាយករដ្ឋមន្ត្រីថៃចុះចេញពីតំណែងដោយសារមិនអាចដោះស្រាយបញ្ហាទឹកជំនន់

ប្រទេសថៃ ៖ បន្ទាប់ពីទឹកជំនន់ដ៏ធ្ងន់ធ្ងរបានវាយប្រ.ហារអស់រយៈពេលជិត១សប្តាហ៍នៅស្រុកហាតយៃ ខេត្តសុងក្លា បណ្តាលឱ្យមនុស្សស្លា.ប់រហូតដល់ជាង១០០នាក់ គិតត្រឹមថ្ងៃទី២៧ ខែវិច្ឆិកា ឆ្នាំ២០២៥ រដ្ឋាភិបាលថៃសន្យាផ្តល់ប្រាក់សំណងចំនួន២លានបាត (ឬជាង៦ម៉ឺនដុល្លារ) ក្នុង១សាកស.ព និងផ្តល់ប្រាក់៩ពាន់បាត (ឬជាង២០០ដុល្លារ) ក្នុង១គ្រួសារ រួមទាំងផ្តល់ប្រាក់សម្រាប់ជួសជុលផ្ទះ ។ ប៉ុន្តែពលរដ្ឋភាគខាងត្បូងស្តីបន្ទោសយ៉ាងខ្លាំង ជាពិសេស អ្នកនយោបាយ និងមន្ត្រីរាជការថា នាយករដ្ឋមន្ត្រីថៃមិនចេះដោះស្រាយបញ្ហាទឹកជំនន់ ជួយសង្គ្រោះពលរដ្ឋយឺតយ៉ាវ រហូតពលរដ្ឋស្លា.ប់ដោយអត់បាយ លង់ទឹក និងឆក់ខ្សែភ្លើង ដោយទាមទារឱ្យចុះចេញពីតំណែង ។

សារព័ត៌មាន Khaosod រាយការណ៍ថា នៅថ្ងៃទី២៨ ខែវិច្ឆិកា អតីតមន្ត្រីរាជការម្នាក់បានទាមទារឱ្យនាយករដ្ឋមន្ត្រីថៃ លោក Anutin Charnvirakul ចុះចេញពីតំណែងដោយសារមិនអាចដោះស្រាយបញ្ហាទឹកជំនន់ ។ ការចុះចេញពីតំណែងដើម្បីបង្ហាញពីការទទួលខុសត្រូវចំពោះទឹកជំនន់វាយប្រហារនៅភាគខាងត្បូងបណ្តាលឱ្យបាត់បង់ជីវិតមនុស្ស ហេដ្ឋារចនាសម្ព័ន្ធ និងទ្រព្យសម្បត្តិយ៉ាងច្រើនមហាសាល ។ លោក Anutin គួរផ្តល់ឱកាសឱ្យរដ្ឋាភិបាលថ្មី និងមិនចាំបាច់ប្រញាប់រំលាយសភាដើម្បីបោះឆ្នោតទេ ត្រូវយកប្រាក់សម្រាប់រៀបចំការបោះឆ្នោតមកជួយពលរដ្ឋរងគ្រោះដោយទឹកជំនន់ ។ បើព្រមចុះចេញ រដ្ឋាភិបាលថ្មីនឹងអាចដោះស្រាយជម្លោះព្រំដែនជាមួយប្រទេសជិតខាង និងផ្តល់ប្រាក់សំណងឱ្យពលរដ្ឋរងគ្រោះ ។

នៅថ្ងៃទី២៨ ខែវិច្ឆិកា លោក ស៊ុមឆ័យ ស្រ៊ីសុទ្ធីយ៉ាកន (Somchai Srisutthiyakorn) មន្ត្រីរាជការចូលនិវត្តន៍ និងអតីតសមាជិកគណបក្សប្រាឆាធិប៉ាត់ និងអតីតមន្ត្រីគណៈកម្មការរៀបចំការបោះឆ្នោត បានបង្ហោះសារក្នុងបណ្តាញសង្គមទាមទារឱ្យលោក Anutin នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃ ត្រូវទទួលខុសត្រូវចំពោះវិធានការដោះស្រាយបញ្ហាទឹកជំនន់នៅភាគខាងត្បូងរបស់រដ្ឋាភិបាល ។ លោកថា ភ្លៀងធ្លាក់ខ្លាំងជារឿងធម្មជាតិពុំអាចហាមឃាត់បាន វាក៏ក្លាយជាទឹកជំនន់ ប៉ុន្តែការជួយសង្គ្រោះមនុស្សរងគ្រោះដោយទឹកជំនន់ឱ្យរស់រានមានជីវិត និងឆាប់រហ័សមានប្រសិទ្ធភាព គឺជាបញ្ហាដែលអាចដោះស្រាយបាន ។ អាជ្ញាធរក្នុងតំបន់អាចវាយតម្លៃស្ថានការណ៍ខុស ខ្វះខាតកម្លាំង និងឧបករណ៍ ដែលនេះជាតួនាទីរបស់រដ្ឋាភិបាលចាត់ការទឹកជំនន់ ឬបញ្ជូនកម្លាំងមកជួយ ។

រដ្ឋាភិបាលចាត់ការទឹកជំនន់យឺតយ៉ាវ និងផ្តោតតែលើការទាក់ទាញប្រជាប្រិយភាពដើម្បីទទួលបានសំឡេងឆ្នោតប៉ុណ្ណោះ រដ្ឋាភិបាលមិនដឹងថា គ្រប់វិនាទីមានសារៈសំខាន់សម្រាប់ជីវិតមនុស្សរាប់ម៉ឺននាក់ដែលកំពុងប្រឈមគ្រោះថ្នាក់ ដូចជា ៖ គ្មានទឹក គ្មានអាហារ រួមទាំងអ្នកជំងឺ មនុស្សចាស់ និងកុមារ រហូតបណ្តាលឱ្យមនុស្សស្លាប់ដោយសារទឹកជំនន់ជាង១០០នាក់ ។ រដ្ឋាភិបាលមិនគួរនិយាយថា បានជួយសង្គ្រោះទាន់ពេល មិនយឺតយ៉ាវនោះទេ ប៉ុន្តែលោក Anutin និងមន្ត្រីពាក់ព័ន្ធ គួរសូមទោសពលរដ្ឋដោយសារមិនអាចជួយពួកគេបាន ព្រមទាំងចុះចេញពីតំណែងដើម្បីបើកឱកាសឱ្យសភាបោះឆ្នោតជ្រើសរើសនាយករដ្ឋមន្ត្រីថ្មី ដែលនេះបង្ហាញពីការទទួលខុសត្រូវ ។

បើលោក Anutin ព្រមចុះចេញពីតំណែង សភានឹងបោះឆ្នោតឱ្យបុគ្គលណាម្នាក់ធ្វើជានាយករដ្ឋមន្ត្រីថ្មី ហើយគណបក្សប្រជាជនអាចនឹងសហការជាមួយគណបក្សនយោបាយណាមួយដើម្បីបង្កើតរដ្ឋាភិបាលថ្មីមានសំឡេងភាគច្រើនមកដឹកនាំប្រទេស ។ រដ្ឋាភិបាលថ្មីនឹងអាចដោះស្រាយជម្លោះព្រំដែនជាមួយប្រទេសជិតខាងដែលកំពុងអូសបន្លាយ និងផ្តល់ប្រាក់សំណងឱ្យពលរដ្ឋរងគ្រោះដោយទឹកជំនន់ ដោយពុំចាំបាច់រំលាយសភា ហើយយកប្រាក់សម្រាប់រៀបចំការបោះឆ្នោតទៅជួយពលរដ្ឋភាគខាងត្បូង ។ នេះបើតាមការលើកឡើងរបស់អតីតមន្ត្រីរាជការ ។

គួរបញ្ជាក់ថា កាលពីថ្ងៃទី២៦ ខែវិច្ឆិកា អតីតស្នងការរងនគរបាលជាតិ ក៏បានទាមទារឱ្យនាយករដ្ឋមន្ត្រីថៃទទួលខុសត្រូវពលរដ្ឋស្លា.ប់ដោយសារទឹកជំនន់នៅភាគខាងត្បូងដែរ ដោយបានស្តីបន្ទោសលោក Anutin បរាជ័យក្នុងការដោះស្រាយបញ្ហាទឹកជំនន់នៅស្រុកហាតយៃ ខេត្តសុងក្លា រហូតដល់ពលរដ្ឋស្លា.ប់កើនឡើងជាបន្តបន្ទាប់ក្រោយពីទន្ទឹងរង់ចាំការជួយសង្គ្រោះពីរដ្ឋាភិបាលទាំងអស់សង្ឃឹម ។ លោក Anutin កាន់តំណែងជានាយករដ្ឋមន្ត្រីផង និងរដ្ឋមន្ត្រីក្រសួងមហាផ្ទៃផង បែរជាមិនអាចដោះស្រាយបញ្ហាទឹកជំនន់ បណ្តោយឱ្យមន្ត្រីថ្នាក់ក្រោមធ្វើជំនួស ៕