ថ្មីៗនេះវីដេអូចាស់របស់លោកជំទាវ យឹម ឆៃលីន បកស្រាយបទ «អូនជាចំណែកលើស» អមជាមួយនឹងម្ចាស់បទកញ្ញា ឈិត សុវណ្ណបញ្ញា បានល្បីកក្រើកឡើងវិញនៅលើបណ្តាញសង្គមទិកតុក។ ទស្សនិកជនមិនត្រឹមតែសរសើរពីសម្រស់របស់លោកជំទាវថានៅតែវ័យក្មេងប៉ុណ្ណោះទេប៉ុន្តែទេពកោសល្យការច្រៀងរបស់លោកជំទាវក៏មហាជនចាប់អារម្មណ៍ដូចគ្នា។
គណនីទិកតុកមួយបានយកវីដេអូចាស់កាលពីខែវិច្ឆិកា ឆ្នាំ២០២៤ របស់លោកជំទាវ យឹម ឆៃលីន ឈរទន្ទឹមជាមួយកញ្ញា ឈិត សុវណ្ណបញ្ញា ដែលបច្ចុប្បន្ននេះតារាចម្រៀងរូបនេះវិលមកអាជីពសិល្បៈវិញហើយ។ ស្ថិតក្នុងបរិយាសក្នុងវិធីជប់លៀងមួយ លោកជំទាវ យឹម ឆៃលីនបានបកស្រាយបទល្បីរបស់ ឈិត សុវណ្ណបញ្ញា មានចំណងជើងថា «អូនជាចំណែកលើស» ដែលបានចេញកាលពីឆ្នាំកាលពីឆ្នាំ២០១៦ ក្នុងផលិតកម្មរស្មីហង្សមាស។
គណនីទិកតុកដែលបានបង្ហោះបានភ្ជាប់មកជាមួយនឹងខេបសិនថា «ស្រស់ស្អាតណាស់» ជាមួយនឹងឈ្មោះលោកជំទាវ យឹម ឆៃលីន។ មនុស្សជាច្រើននៅតែសរសើរដ៏ស្រស់សោភាពរបស់លោកជំទាវ។ ថ្មីៗនេះនៅលើបណ្តាញសង្គមហ្វេកប៊ុក អ្នកនាង ចន ច័ន្ទលក្ខណា រួមទាំងអ្នកនាង ជីមមី ផង បានបង្ហោះពីការគោរពស្រលាញ់មកកាន់ជំទាវ យឹម ឆៃលីន ដូចគ្នា។
មិនថាស្ថិតក្នុងសំលៀកបំពាក់បែបសម័យថ្មីឬបែបប្រពៃណីខ្មែរសម្រស់របស់លោកជំទាវ យឹម ឆៃលីន បានទាក់ទាញមនុស្សជាច្រើនដោយនិយាយថាការតុបតែងខ្លួនរបស់លោកជំទាវសម័យចំសម័យ បុរាណចំបុរាណ ស័ក្តិសមទាំងអស់។ ជាក់ស្តែងនៅក្នុងពិធីព្រះវិវាហមង្គលអាពាហ៍ពិពាហ៍ព្រះអង្គម្ចាស់ក្សត្រិយ៍ នរោត្តម ពង្ស់សូរិយា និងលោក អ៊ឹង ស៊ីវឈន់ សម្រស់របស់លោកជំទាវ យឹម ឆៃលីន ទទួលបានមតិសរសើរជាច្រើនពីអ្នកលេងបណ្តាញសង្គម៕
