តារាចម្រៀង HyunA បានធ្វើឱ្យទស្សនិកជនភ្ញាក់ផ្អើលជាខ្លាំងបន្ទាប់ពីឃើញនាងដួលសន្លប់ពេលកំពុងសម្តែងនៅលើឆាក Water Bomb ក្នុងទីក្រុងម៉ាកាវ។ នៅក្នុងវីដេអូដែលបានថតដោយទស្សនិកជនចូលរួមត្រូវបានចែករំលែកតាមអ៊ីនធឺណិត ខណៈពេលនាងកំពុងសម្តែងក្បាច់រាំដួលសន្លប់ឈឹងបាត់មាត់បាត់ក។ ភ្លាមៗក្រុមការងារបានប្រញាប់ប្រញាល់ឡើងទៅលើឆាកបី HyunA ចុះមកក្រោម។
ទស្សនិកជននៅ Water Bomb បាននិយាយថា HyunA ត្រូវច្រៀង និងរាំច្រើនជាង១០បទមុនពេលដួលសន្លប់។ មិនត្រឹមតែប៉ុណ្ណោះ ថ្មីៗនេះ នាងបានបន្តរបបអាហារ ដើម្បីសម្រកទំងន់ ដោយសារតែអ្នកគាំទ្រ រិះគន់នាង ចំពោះរូបរាងធាត់របស់នាង។ ដូច្នេះហើយ អ្នកនិយមលេងអ៊ីនធឺណិត ស្មានថា HyunA ហត់នឿយខ្លាំង ដោយសារតែត្រូវសម្តែងជាបន្តបន្ទាប់ ដោយមិនសម្រាក ក្នុងស្ថានភាពខ្វះអាហារូបត្ថម្ភ និងទទួលទានរបបអាហារ ដែលមិនផ្តល់សារធាតុចិញ្ចឹម និងថាមពលគ្រប់គ្រាន់។
គេដឹងថាតារាចម្រៀងស្រីរូបនេះ ព្យាយាមស្រក១០គីឡូក្រាម ក្នុងរយៈពេល១ខែ ធ្វើឱ្យរាងកាយ និងសុខភាពរបស់នាង មិនស្ថិតស្ថេរ។ បន្ទាប់ពីភ្ញាក់ពីគេង HyunA បានបង្ហោះសារដ៏វែងមួយ ប្រកាសថានាងសុខសប្បាយជាទេ បន្ទាប់ពីមានរឿងសុខភាពនឹកស្មានមិនដល់។ នាងបានសារភាពថានាងមិនមានវិជ្ជាជីវៈនៅកន្លែងធ្វើការ ហើយបានសូមទោសចំពោះការដួលសន្លប់នៅលើឆាកក្នុងព្រឹត្តិការណ៍ធំមួយ ដែលធ្វើឱ្យគ្រប់គ្នាមានការភិតភ័យ និងព្រួយបារម្ភ។
HyunA ធ្លាប់ត្រូវបានគេចាត់ទុកថាជានិមិត្តសញ្ញាស៊ិចស៊ីក្នុងវិស័យ Kpop។ ទោះជាយ៉ាងណា ក្នុងរយៈពេលប៉ុន្មានឆ្នាំចុងក្រោយនេះការបង្ហាញខ្លួនរបស់ HyunA បានធ្លាក់ចុះ។ ជាពិសេសក្រោយរៀបការរួច នាងឡើងទម្ងន់គួរឱ្យកត់សម្គាល់។ ក្រោយមកបណ្តាញសង្គមរបស់កូរ៉េ បានរិះគន់ចំពោះរូបរាងដ៏ធាត់របស់នាង។ ប្រឈមមុខនឹងការរិះគន់លើរាងកាយ HyunA បានបង្ហោះ Status ដោយទឹកមុខបន្ទោសខ្លួនឯង ដោយបង្កប់ន័យថានាងនឹងបន្តរបបអាហារដើម្បីសម្រកទម្ងន់៕
