អាមេរិកចេញច្បាប់ថ្មីមិនផ្តល់ទិដ្ឋាការស្នាក់នៅអចិន្ត្រៃយ៍ឱ្យជនបរទេសដែលកើតជំងឺទឹកនោមផ្អែម ធាត់ និងបេះដូង

សហរដ្ឋអាមេរិក ៖ សេតវិមានអាមេរិកបានជូនដំណឹងទៅស្ថានទូតអាមេរិកនានានៅទូទាំងពិភពលោកពីច្បាប់ថ្មីរបស់អាមេរិកមិនផ្តល់ទិដ្ឋាការស្នាក់នៅអចិន្ត្រៃយ៍ (Immigrant Visa) ឱ្យជនបរទេសដែលកើតជំងឺទឹកនោមផ្អែម ធាត់ និងបេះដូង ដើម្បីកាត់បន្ថយការចំណាយប្រាក់បង់ពន្ធរបស់ពលរដ្ឋអាមេរិកក្នុងការព្យាបាលជំងឺជនបរទេស ។ ប៉ុន្តែក្រុមការពារសិទ្ធិជនអន្តោប្រវេសន៍បានរិះគ.ន់ច្បាប់ថ្មីរបស់រដ្ឋាភិបាលលោក Donald Trump ដែលបដិសេធការផ្តល់ទិដ្ឋាការឱ្យជនបរទេសមានជំងឺ ។

បទបញ្ជារបស់រដ្ឋាភិបាលអាមេរិកកាលពីថ្ងៃទី៦ ខែវិច្ឆិកា ឆ្នាំ២០២៥ ជនបរទេសដែលស្នើសុំទិដ្ឋាការស្នាក់នៅអចិន្ត្រៃយ៍ (Immigrant Visa) ដើម្បីមករស់នៅអាមេរិក គឺអាចត្រូវបដិសេធបើមានបញ្ហាសុខភាព ដូចជា ៖ កើតជំងឺទឹកនោមផ្អែម ធាត់ បេះដូង សរសៃឈាម និងជំងឺរ៉ាំរ៉ៃ ។ ក្រសួងការបរទេសអាមេរិកបានជូនដំណឹងទៅកាន់ស្ថានទូត និងកុងស៊ុលអាមេរិកនៅទូទាំងពិភពលោក ដើម្បីឱ្យមន្ត្រីអាមេរិកទទួលខុសត្រូវផ្នែកផ្តល់ទិដ្ឋាការលើកពីហេតុផលបន្ថែមទៀតដើម្បីបដិសេធទិដ្ឋាការជនបរទេស ដូចជា អាយុ ក្នុងគោលបំណងកុំឱ្យពួកគេប្រើប្រាស់ថវិកាសុខាភិបាលអាមេរិក និងក្លាយជាបន្ទុកនាថ្ងៃអនាគត ។

ទោះយ៉ាងណា ច្បាប់ថ្មីរបស់រដ្ឋាភិបាលលោក Donald Trump មិនអនុវត្តចំពោះទិដ្ឋាការទេសចរណ៍ទេ ប៉ុន្តែរងការរិះគន់ពីមជ្ឈដ្ឋាននានា ជាពិសេស ក្រុមការពារសិទ្ធិជនអន្តោប្រវេសន៍និយាយថា វាមិនយុត្តិធម៌ដែលអាមេរិកបិទសិទ្ធិការស្នើសុំទិដ្ឋាការរបស់ជនបរទេសមានបញ្ហាសុខភាព ។ ក្រុមការពារសិទ្ធិជនអន្តោប្រវេសន៍ហៅច្បាប់ថ្មីជាគោលនយោបាយបំបិទសិទ្ធិ ខណៈក្រសួងការបរទេសអាមេរិកថា ដើម្បីកាត់បន្ថយការចំណាយប្រាក់បានពីការបង់ពន្ធរបស់ពលរដ្ឋអាមេរិក ។

តាមការលើកឡើងរបស់ក្រុមការពារសិទ្ធិជនអន្តោប្រវេសន៍ ការហាមឃាត់នេះបញ្ជាក់យ៉ាងច្បាស់ពីរដ្ឋាភិបាលអាមេរិកព្យាយាមប្រាប់ពិភពលោកថា កុំមករស់នៅអាមេរិក ពីព្រោះជនបរទេសកើតជំងឺបេះដូង ផ្លូវដង្ហើម មហារីក ទឹកនោមផ្អែម និងជំងឺផ្សេងៗ ត្រូវចំណាយប្រាក់រាប់សែនដុល្លារក្នុងការព្យាបាលនៅអាមេរិក ។

មនុស្សលើពិភពលោកប្រមាណ១០% កើតជំងឺទឹកនោមផ្អែម និងបេះដូង ដែលជំងឺទាំងពីរនេះបានសម្លាប់ជីវិតមនុស្សច្រើនបំផុត ទើបមន្ត្រីទិដ្ឋាការអាមេរិកត្រូវពិចារណាថា តើជនបរទេសដែលស្នើសុំទិដ្ឋាការស្នាក់នៅអចិន្ត្រៃយ៍ (Immigrant Visa) មានប្រាក់គ្រប់គ្រាន់សម្រាប់ចាយវាយលើថ្លៃព្យាបាលដោយខ្លួនឯងដែរឬទេ ដោយពុំចាំបាច់សុំជំនួយពីរដ្ឋាភិបាលអាមេរិក ។

លើសពីនេះ មន្ត្រីទិដ្ឋាការអាមេរិកនឹងពិចារណាពីបញ្ហាសុខភាពរបស់សមាជិកគ្រួសារជនបរទេសផងដែរ ដូចជា កូនៗ និងឪពុក-ម្តាយ ពីព្រោះជនពិការ និងអ្នកមានជំងឺរ៉ាំរ៉ៃ ឬចាំបាច់ត្រូវទទួលការព្យាបាលជំងឺ ពួកគេមិនអាចធ្វើការបានទេ ។ ជនបរទេសស្នើសុំទិដ្ឋាការស្នាក់នៅអចិន្ត្រៃយ៍ ត្រូវតែពិនិត្យសុខភាពដោយគ្រូពេទ្យ និងស្ថានទូតអាមេរិកយល់ព្រមជាមុន ៕