នេន ទុំ ជំរុញប្រាក់រៀលតាមរយៈចម្រៀងនិងផ្សារភ្ជាប់អត្ថន័យលើរូបភាព

តារារ៉េប នេន ទុំ បានធ្វើឱ្យទស្សនិកជនមានការចាប់អារម្មណ៍និងសម្តែងការសរសើរទៅលើបទចម្រៀងថ្មីរបស់លោកទោះបីជាមិនទាន់ទម្លាក់ជាផ្លូវការក្តី។ «លុយខ្មែរ» គឺជាស្នាដៃថ្មីរបស់លោក នេន ទុំ ដែលផ្សារភ្ជាប់ជាមួយនឹងប្រាក់រៀលជាពិសេសទៅលើអត្ថន័យរូបនីមួយៗនៅលើក្រដាសប្រាក់។

កាលពីយប់ថ្ងៃទី២២ ខែតុលា តារារ៉េបជើងចាស់ នេនទុំ បានបញ្ចេញវីដេអូខ្លីនៃបទចម្រៀងថ្មីនៅលើគណនីទិកតុកអំពីលុយរៀល។ ក្នុងចម្រៀងនេះលោកបានរៀបរាប់នូវក្រដាសប្រាក់១០០រៀលចាស់មានរូបវិមានឯករាជ្យចំណែកឯក្រដាសប្រាក់១០០រៀលថ្មីមានរូបព្រះបរមរាជវាំង ក្រដាស៥០០រៀលមានរូបប្រាសាទអង្គរវត្ត ក្រដាស១០០០រៀលមានរូបក្លោងទ្វារធំប្រាសាទអង្គរវត្ត។

ជារួមតាមរយៈស្នាដៃថ្មីរបស់តារាចម្រៀង នេន ទុំ គឺបានបង្ហាញរូបិយប័ណ្ឌខ្មែរជាច្រើនទៀតមានដូចជាក្រដាស២០០០,៥០០០, ១០០០០,២០០០០,៥០០០០ ,១០០០០០ រៀល ដោយមិនភ្លេចរម្លឹកពីក្រដាសប្រាក់ចាស់នោះទេ។ ក្រដាសប្រាក់នីមួយៗ នេន ទុំ បានបង្ហាញពីរូបភាពសម្គាល់ក្នុងក្រដាសប្រាក់ដែលមានដូចជា ប្រាសាទព្រះវិហារ, ស្ពានកំពង់ក្តី , ពិធីបុណ្យអុំទូកដែលជាប្រពៃណីទំនៀមទម្លាប់ខ្មែរ និងរូបសម្តេចតាសម្តេចយាយនៅលើក្រដាសប្រាក់ធំជាដើម។

តាមរយៈការបង្ហើបបទចម្រៀងថ្មីដែលលើកស្ទួយលុយរៀលផ្សារភ្ជាប់ជាមួយនឹងអត្ថន័យ របស់តារារ៉េប នេន ទុំ ទទួលបានការសរសើរយ៉ាងច្រើនពីទស្សនិកជន។ អ្នកលេងបណ្តាញសង្គមទិកតុកបានបញ្ចេញមតិស្រដៀងៗគ្នាថា បទនេះឡូយមានអត្ថន័យ ពួកគេគាំទ្រពេញទំហឹង។

គួរឱ្យដឹងថា ចុងក្រោយនេះតារាចម្រៀង នេន ទុំ បានធ្វើឱ្យទស្សនិកជនជាច្រើនសរសើរសម្រាប់ការផ្តល់ម៉ូតូមួយគ្រឿងទៅកាន់បុរសម្នាក់ដែលទូលនំលក់។ បុរសដែលលោក នេន ទុំ ជួយនេះក៏បានធ្វើឱ្យទស្សនិកជនសរសើរជាច្រើនព្រោះតែបានប្រើសម្តីផ្អែមល្ហែមទៅកាន់ប្រពន្ធរបស់ខ្លួនយ៉ាងពីរោះពិសារ៕