ក្រសួងការពារជាតិបង្ហាញថា មានការផ្ទុះអាវុ.ធថ្មីៗចំនួន៤លើកនៅខាងភាគីថៃនាយប់ថ្ងៃទី២៥ កញ្ញា

ភ្នំពេញ៖ ក្រសួងការពារជាតិកម្ពុជាបានចេញសេចក្តីប្រកាសព័ត៌មានមួយ ដើម្បីបដិសេធទាំងស្រុងនូវការចោទប្រកាន់ពីសំណាក់កងទ័ពជើងគោកថៃ និងប្រព័ន្ធផ្សព្វផ្សាយថៃមួយចំនួន ដែលបានអះអាងថា កងកម្លាំងកម្ពុជាបានបង្កហេតុពេញមួយយប់នៅតំបន់យោធភូមិភាគទី២ និងបានបង្ហាញឲ្យដឹងដែរថានាយប់រំលងអាធ្រាតថ្ងៃទី២៥ ខែកញ្ញានេះ មានការផ្ទុះអាវុ.ធចំនួន៤លើកនៅខាងភាគីថៃ។

តាមរយៈអ្នកនាំពាក្យក្រសួងការពារជាតិ លោកជំទាវ ឧត្តមសេនីយ៍ឯក ម៉ាលី សុជាតា កម្ពុជាបានបញ្ជាក់យ៉ាងច្បាស់ថា កងកម្លាំងរបស់ខ្លួនមិនបានបង្កហេតុ ឬធ្វើសកម្មភាពណាមួយដែលរំលោភលើកិច្ចព្រមព្រៀងបទឈប់បាញ់នោះទេ។ សេចក្តីប្រកាសដដែលបានបន្ថែមថា កម្ពុជានៅតែបន្តគោរព និងអនុវត្តយ៉ាងម៉ឺងម៉ាត់នូវកិច្ចព្រមព្រៀងបទឈប់បាញ់រវាងយោធាកម្ពុជា និងយោធាថៃ។

ផ្ទុយទៅវិញ បើយោងតាមការបញ្ជាក់ពីកងកម្លាំងរបស់កម្ពុជាយើងដែលឈរជើងនៅជួរមុខបានឱ្យដឹងថា នៅរំលងអធ្រាត្រ ថ្ងៃទី២៥ ខែកញ្ញា ឆ្នាំ២០២៥នេះ មានការផ្ទុះអាវុ.ធចំនួន៤លើកពីសំណាក់យោធាថៃក្នុងទឹកដីថៃ ដោយ៖
នៅវេលាម៉ោង ២:៥៧នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៥:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៦:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់
នៅវេលាម៉ោង ៧:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់

ជាមួយគ្នានេះ ក្រសួងការពារជាតិក៏បានគូសបញ្ជាក់អំពីកិច្ចសហប្រតិបត្តិការល្អដែលមានស្រាប់រវាងប្រទេសទាំងពីរ ដោយក្រុមទំនាក់ទំនងរវាងកម្ពុជា-ថៃ នៅជួរមុខតែងតែធ្វើការជាមួយគ្នាជាប្រចាំដើម្បីផ្លាស់ប្តូរព័ត៌មាន និងបញ្ជាក់គ្នាទៅវិញទៅមក ដើម្បីចៀសវាងការយល់ច្រឡំ ឬភាពតានតឹងដែលមិនចាំបាច់។

គួរបញ្ជាក់ថា សេចក្តីប្រកាសព័ត៌មាននេះធ្វើឡើងបន្ទាប់ពីផេកផ្លូវការរបស់កងទ័ពជើងគោកថៃ និងសារព័ត៌មានថៃមួយចំនួនបានចុះផ្សាយព័ត៌មានថា មានហេតុការណ៍ផ្ទុះអាវុធ និងសកម្មភាពគួរឱ្យសង្ស័យនៅតាមព្រំដែន ដែលពួកគេបានចោទថាជាទង្វើរបស់កងទ័ពកម្ពុជា។