បន្ទាប់ពី អ្នកវិភាគឯករាជ្យ ច្រានចោលការចោទប្រកាន់ថាលោកធ្វើការឱ្យរោងកុនថៃ Rate ដំបូង៧/១០ តែក្រោយមក៥.៦/១០ និងអះអាងថាខ្លួនត្រូវបានផលិតករស្អប់សេចក្តីពិតលាបពណ៌ស្រាប់តែ ទ្រី សក្កដា ចេញមកនិយាយថា អ្នកវិភាគឯករាជ្យ ដើរតួកម្សត់ មិនយល់ស្ថានភាព ទឹកចិត្តផលិតករ និងសម្តែងការសោកស្តាយទឹកចិត្តរាប់អានជាង១០ឆ្នាំ។
នៅថ្ងៃទី៤ កញ្ញា នេះ លោក ទ្រី សក្កដា បានចេញមករៀបរាប់យ៉ាងវែងទៅកាន់ អ្នកវិភាគឯករាជ្យ ដោយចាត់ទុកថាការវិភាគរបស់លោកគ្មានក្បាលគ្មានកន្ទុយទាំងដឹងហើយថា កុនខ្មែរតូចចង្អៀត ហើយក៏មិនមានការចាក់បញ្ចាំងក្នុងរោងកុនថៃទៀត។ លោក បន្ថែមថា អ្នកវិភាគឯករាជ្យ ចង់ Rate ១/១០ ក៏ Rate ទៅតែសុំមើលស្ថានភាពនិងយល់ដល់បេះដូងផលិតករផង មិនមែនចេញរឿងវាយតម្លៃរឿងទាំងមិនទាន់បាន៥ថ្ងៃផងគ្មានអ្នកណាទទួលយកបាននោះទេ។
ទ្រី សក្កដា បន្ថែមទៀតថា អ្នកដែលកាន់ជើងអ្នកវិភាគឯករាជ្យនិយាយថា គេ Rate សិន ចាំចាក់រឿងចប់ចាំគេបកស្រាយចំណុចខ្វះខាតតាមក្រោយ ចំណុចនេះលោកថាបើជ្រុលជាចឹងចាំចាក់រឿងចប់ចាំ Rate ហើយប្រាប់ពីចំណុចខ្វះខាតទៅ។ អ្នកដឹកនាំរឿងរូបនេះបានលើកឧទាហរណ៍ថាហាងអាហារមួយបើកចំនួន៥ថ្ងៃមានភ្ញៀវបុកទៅភ្លូកទឹកភ្លូកដី តែមានអ្នកយកឈ្មោះហាងគេទៅផុសថា ហូបមិនកើត តើគោលបំណងនេះគឺចង់ផ្តួលរំលំហាងគេមែនអត់?។
ជាមួយគ្នានេះ ទ្រី សក្កដា ជឿថាការដែលអ្នកទស្សនិកជនបានទិញសំបុត្រទស្សនាមិនមែនដោយសារសាច់រឿងល្អឥតខ្ចោះទេ តែបងប្អូនប្រើបេះដូងគាំទ្រអ្វីដែលកូនខ្មែរផលិតហើយក្រុមផលិតលោកពិតជាយល់ពីចំណុចខ្វះខាតរបស់រឿងមួយនេះ។ ទ្រី សក្កដា បានចោទសួរទៅកាន់ អ្នកវិភាគឯករាជ្យ ថាយល់ពីស្ថានភាពមួយនេះទេ និងថាមិនមែនអ្នកផលិត មិនយល់អារម្មណ៍គេទេ បានត្រឹមតែកាន់ទូរស័ព្ទសរសេរបំបាក់ទឹកចិត្តអ្នកផលិតដោយមិនដឹងគោលបំណងវិភាគដើម្បីអ្វីឬចង់បានចំណាប់អារម្មណ៍ខុសពេល។
ទ្រី សក្កដា ថា អ្នកវិភាគឯករាជ្យ ប៉ិនខាងរៀបរាប់ធ្វើតួកម្សត់ លោកឱ្យលេខអនន្តតែម្តង។ ក្នុងនោះលោកក៏បានសម្តែងការសោកស្តាយទឹកចិត្តរាប់អានជាងដប់ឆ្នាំផងដែរ៕
