ពីអតីតបេក្ខជនម្នាក់ប្រលងក្នុងកម្មវិធីចម្រៀងរ៉េបមានលោកឪពុកប្រឆាំង និងមានម្តាយគាំទ្រលើអាជីពនេះ អ៊ែនជីឡូ កំពុងបោះជំហានទៅមុខតាមរយៈស្នាដៃលេចធ្លោមួយចំនួន។ ទោះបីជាអាជីពសិល្បៈមិនទាន់លេចធ្លោដល់កម្រិតក្តីប៉ុន្តែ អ៊ែនជីឡូ នៅតែបោះជំហានទៅមុខហើយមនុស្សម្នាក់ដែលបំផុតគំនិតរបស់លោកលើអាជីពនេះគឺជាតារាចម្រៀង វណ្ណដា។
តាមរយៈវីដេអូដែលចែករំលែកនៅលើទិកតុក spotlightcambodia កាលពីពេលថ្មីៗនេះ អ៊ែនជីឡូ បានបញ្ជាក់ថាសម្រាប់តារានៅក្នុងស្រុកខ្មែរដែល Inspire លោកខ្លាំងជាងគឺជាតារាចម្រៀង វណ្ណដា ហៅកាត់ថា VD ។ អ៊ែនជីឡូ និង វណ្ណដា គឺអ្នករស់នៅខេត្តព្រះសីហនុដូចគ្នា ខណៈ អ៊ែនជីឡូ ធ្លាប់បានចូលរួមប្រកួតកម្មវិធី The Rapper Cambodia កាលពីឆ្នាំ២០២៣ ក្រោមការជំរុញលើកទឹកចិត្តពីអ្នកម្តាយ។
ទោះបីជាបរាជ័យនៅក្នុងការប្រកួត ប៉ុន្តែ អ៊ែនជីឡូ បានសាងប្រជាប្រិយភាពមានអ្នកស្គាល់ជាច្រើនទៅលើបទចម្រៀង «ប្រែកាយ (Wo Eh Eh)» សហការជាមួយ BAT RED ដែលល្បីល្បាញខ្លាំងកាលពីមួយរយៈមុន។ ជាមួយនឹងបទដែលមនុស្សជាច្រើនហៅកាត់ថា Wo Eh Eh អ៊ែនជីឡូ បន្តសាងស្នាដៃចម្រៀងមួយបទទៀតមានចំណងជើងថា «វាយសី» ដែលបានចេញកាលពី៤ខែមុន។
ក្រោយពីមានបទល្បីផ្ទុះនៅលើទីផ្សារ អ៊ែនជីឡូ បានលេចមុខតាម Pub មួយចំនួន និងចូលរួមកម្មវិធីសម្ភាសន៍មួយចំនួនទៀត៕
