ឧត្តរមានជ័យ៖ កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ(RBC) នាព្រឹកថ្ងៃទី២៧ ខែសីហា ឆ្នាំ២០២៥នេះ ភាគីទាំងពីរបានឯកភាពគ្នាលើចំណុចសំខាន់ៗមួយចំនួន ដោយប្ដេជ្ញារថានឹងដោះស្រាយរួមគ្នា មិងមិនពង្រីកជម្លោះដើម្បីរក្សាទំនាក់ទំនង កសាងទំនុកចិត្ត និងភាពជាអ្នកជិតខាងល្អឲ្យដូចស្ថានភាពកាលពីមុន។
កិច្ចប្រជុំវិសាមញ្ញគណៈកម្មការព្រំដែនថ្នាក់យោធភូមិភាគ រវាងឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ និង លោក ប៊ុនស៊ីង ផាកខ្លាង (Boonsin Padklang) មេបញ្ជាការយោធភូមិភាគទី២ថៃ នៅច្រកអន្តរជាតិជាំ-សាង៉ាំ ក្នុងស្រុកអន្លង់វែង ខេត្តឧត្តរមានជ័យ ទទួលបានលទ្ធផលជាវិជ្ជមាន ដោយភាគីទាំងពីរបានឯកភាពជំរុញឱ្យ«ព្រំដែន»វិលទៅរកប្រក្រតីភាពឡើងវិញ។
បើតាមការបញ្ជាក់នៅក្នុងសេចក្ដីប្រកាសព័ត៌មានរួមចេញដោយក្រសួងការពារជាតិបានឲ្យដឹងថា មេបញ្ជាការថ្នាក់មូលដ្ឋានរបស់ភាគីទាំងពីរ នឹងត្រូវជួបគ្នាជារៀងរាល់សប្ដាហ៍ឬតាមពេលវេលាសមស្រប ដើម្បីដោះស្រាយរាល់បញ្ហាដែលកើតមានឡើងនៅក្នុងដែននៃការទទួលខុសត្រូវរបស់ខ្លួន។ 
ក្រៅពីនេះ ភាគីទាំងពីរក៏បានឯកភាពថារាល់ការធ្វើសកម្មភាពដើម្បីធានាសុវត្ថិភាព រួមបញ្ចូលទាំងការល្បាត និងការសាងសង់ ឬការពង្រីកហេដ្ឋារចនាសម្ព័ន្ធ ឬលេណដ្ឋាន ដែលមានលក្ខណៈការពារខ្លួនសុទ្ធសាធ និងស្ថិតនៅតែខាងខ្លួនឯងប៉ុណ្ណោះ ភាគីនីមួយៗអាចអនុវត្ដទៅបាន ដោយអនុលោមពេញលេញតាមលក្ខខណ្ឌនៃបទឈប់បាញ់ដែលឯកភាពក្នុងកិច្ចប្រជុំ (GBC) នៅប្រទេសប្រទេសម៉ាឡេស៊ី ដើម្បីលើកកម្ពស់បរិយាកាសនៃជំនឿទុកចិត្ដទៅវិញទៅមក និងកិច្ចសហប្រតិបត្ដិការរវាងភាគីទាំងពីរ។
គួរបញ្ជាក់ថា នៅក្នុងកិច្ចប្រជុំវិសាមញ្ញនេះ មេបញ្ជាការថ្នាក់យោធភូមិភាគទាំងពីរបានឯកភាពគ្នាក្នុងការរក្សាទំនាក់ទំនងជាប្រចាំរវាងបណ្តាយោធភូមិភាគ និងតំបន់យោធា ព្រមទាំងបណ្តាអង្គភាព នៅតាមបណ្តោយព្រំដែននៃប្រទេសទាំងពីរ និងខិតខំដោះស្រាយរាល់បញ្ហាដោយសន្តិវិធី និងបញ្ចៀសការប៉ះទង្គិចគ្នា។
បន្ថែមពីនេះ ភាគីទាំងពីរបានប្ដេជ្ញារួមគ្នានៅគ្រប់កម្រិត ក្នុងការកសាងជំនឿទុកចិត្ត និងលើកកម្ពស់ភាពជាអ្នកជិតខាងល្អ តាមរយៈការប្រាស្រ័យទាក់ទងគ្នានេះ។ ភាគីទាំងពីរ បានសង្កត់ធ្ងន់ពីការវិវឌ្ឍជាវិជ្ជមាន និងវឌ្ឍនភាពដែលសម្រេចបានកន្លងមក សំដៅជំរុញកិច្ចសហប្រតិបត្តិការលើគ្រប់វិស័យ និងការវិលត្រឡប់ទៅរកប្រក្រតីភាពឡើងវិញ៕
