មានការភ្ញាក់ផ្អើលយ៉ាងខ្លាំងនៅលើបណ្តាញសង្គមបន្ទាប់ពីអតីតតារាសម្តែង វ៉ាង ស្រីណូ បានចេញមកអះអាងថាហាងពេជ្រមួយឈ្មោះថា គួង ហុង បោកប្រាស់អតិថិជនគ្មានទទួលខុសត្រូវ។ វ៉ាង ស្រីណូ ក៏បានចោទប្រកាន់ថាហាងនេះប្រមូលលុយរត់ចោលស្រុក ខណៈគឺជាជនរងគ្រោះម្នាក់ក្នុងចំណោមជនរងគ្រោះជាច្រើននាក់ទៀត។
នៅថ្ងៃទី២២ សីហា អ្នកនាង វ៉ាង ស្រីណូ បានបង្ហោះវីដេអូមួយដោយបានដាក់ចំណងជើងថា «ហាងពេជ្យ គួងហុង ឈប់ធ្វើបាបខ្មែរគ្នាឯង ហើយឆាប់ចេញមុខមកទទួលខុសត្រូវទិញចូលគ្រឿងពេជ្យដែលខ្ញុំទិញពីអ្នកឯងទៅវិញភ្លាម…»។ នៅក្នុងវីដេអូនេះ វ៉ាង ស្រីណូ បាននិយាយថាហាងពេជ្រនេះគឺបើកនោះទេប៉ុន្តែមិនមានការទិញចូលវិញ ដោយអះអាងថាម្ចាស់ហាងមិននៅចេញទៅក្រៅប្រទេសដូច្នេះមានន័យថាថៅកែគ្មានទំនួលខុសត្រូវប្រមូលរបស់រត់ចោលស្រុក។ .png)
វ៉ាង ស្រីណូ ថានាងគឺជាជនរងគ្រោះម្នាក់ក្នុងចំណោមប្រជាជនខ្មែរជាច្រើននាក់ទៀត ខណៈនាងអស់រាប់សែនដុល្លារជាមួយនឹងហាងពេជ្រ គួងហុង ដោយអីវ៉ាន់មិនទទួលទិញចូលវិញ។ វ៉ាង ស្រីណូ ថានាងមិនដឹងថាយកទៅលក់នៅទីណានោះទេ ព្រោះនៅខ្មែរទិញកន្លែងណាលក់កន្លែងនោះវិញ។ 
ចុងបញ្ចប់នៃវីដេអូ វ៉ាង ស្រីណូ ក៏បានដាក់វីដេអូបន្ថែមទៀតពីជនរងគ្រោះដទៃទៀតដែលត្រូវបានហាងពេជ្រនេះមិនទទួលទិញវិញ។
បន្ទាប់ពី វ៉ាង ស្រីណូ លាតត្រដាងពីហាងពេជ្រគ្មានទំនួលខុសត្រូវលើអតិថិជននេះហើយ វីដេអូរបស់នាងទទួលបានការចាប់អារម្មណ៍យ៉ាងច្រើនពីទស្សនិកជន ខណៈកន្លងមកនេះអ្នកមួយចំនួនក៏បានត្អូញត្អែរត្រូវរងគ្រោះលើរឿងស្រដៀងគ្នានេះដូចគ្នាទៅលើប្រភេទគ្រឿងអលង្ការពេជ្រ៕
