អុកឡុកខ្លាំងពេកស្ទូឌីយោ Zhan Xuan ព្រមានទៅកាន់អ្នកគាំទ្រងប់ងល់បើបំពានបន្តទៀតប្រឈមនឹងផ្លូវច្បាប់

ស្ទូឌីយូរបស់តារាសម្តែង Zhan Xuan បានចេញសេចក្តីប្រកាសនៅលើបណ្តាញសង្គមឱ្យអ្នកគាំទ្ររក្សាសណ្តាប់ធ្នាប់ ខណៈប៉ាប៉ារ៉ាស៊ីបានឡោមព័ទ្ធតារាសម្តែងរូបនេះស្ទើរគ្រប់ទីកន្លែងដែលសកម្មភាពទាំងនេះបានរំខានយ៉ាងធ្ងន់ធ្ងរដល់ការងារ និងជីវភាពប្រចាំថ្ងៃ។ ក្រុមហ៊ុនបានបញ្ជាក់ថាពួកគេរក្សាសិទ្ធិក្នុងការបន្តចំណាត់ការផ្លូវច្បាប់ប្រឆាំងនឹងការបំពានច្បាប់ណាមួយ។

តារាសម្តែង Zhan Xuan កំពុងសាងប្រជាប្រិយភាពកាន់តែខ្លាំងឡើយបន្ទាប់ពីចូលរួមក្នុងគម្រោងភាពយន្តដ៏ល្បី «Revenged Love» ចំណែកឯទស្សនិកជនកម្ពុជាវិញកាន់តែពេញចិត្តតារាប្រុសនេះទ្វេដងបន្ទាប់ពី Zhan Xuan និយាយលះៗច្បាស់ៗមិនខ្លាចផ្ទះលេខ២ខឹងនោះទេហ៊ាននិយាយថាប្រទេសថៃជាកន្លែងគ្រោះថ្នាក់ជាដើម។

បន្ទាប់ពីក្រសោបភាពល្បីល្បាញទាំងក្នុងប្រទេសនិងក្រៅប្រទេសភាពស្មុគស្មាញមួយចំនួនដែលកើតចេញពីអ្នកគាំទ្រក៏កើតឡើងដោយសារតែក្តីស្រលាញ់ងប់ងល់ខ្លាំងពេកមកកាន់តារាសម្តែង Zhan Xuan ។ ជាក់ស្តែងថ្មីៗនេះតារាប្រុសរូបនេះបានអស់ការអត់ធ្មត់ព្រមានទៅកាន់អ្នកគាំទ្រដែលបំពានលើលោកខ្លាំងពេក។

នាល្ងាចថ្ងៃទី២០ សីហា ស្ទូឌីយូរបស់ Zhan Xuan បានចេញសេចក្តីប្រកាសថា៖ ពាក់ព័ន្ធនឹងទង្វើដ៏ហួសចិត្តរបស់ប៉ាប៉ារ៉ាស៊ីនាពេលថ្មីៗនេះ រួមមានការឡោមព័ទ្ធសិល្បករ ដើរចេញពីព្រលានយន្តហោះ និងសណ្ឋាគារ ដើរតាមរថយន្ត ថត និងផ្សព្វផ្សាយវីដេអូខុសច្បាប់ និងការលួចអត្តសញ្ញាណសិល្បករ និងក្រុមរបស់ពួកគេ សកម្មភាពទាំងនេះបានរំខានយ៉ាងធ្ងន់ធ្ងរដល់ការងារ និងជីវភាពប្រចាំថ្ងៃរបស់សិល្បករ និងក្រុមរបស់ពួកគេ ហើយបានបង្កើតហានិភ័យសុវត្ថិភាពសម្រាប់សណ្តាប់ធ្នាប់សាធារណៈ។

ក្រុមហ៊ុន បានបញ្ជាក់និងប្រឆាំងដាច់ខាតរាល់ទង្វើខុសច្បាប់ទាំងការដេញតាមរថយន្ត ប៉ា ការយាយី និងការបិទកន្លែងសាធារណៈ ដែលរំខានដល់សណ្តាប់ធ្នាប់សាធារណៈ និងបង្កគ្រោះថ្នាក់ដល់សុវត្ថិភាពខ្លួនឯង និងអ្នកដទៃ។ ក្រុមហ៊ុន Zhan Xuan ស្នើឱ្យអ្នកគាំទ្ររក្សាបរិយាកាស និងសណ្តាប់ធ្នាប់ដែលមានផាសុកភាព វិជ្ជមាន និងសមស្រប ហើយចូលរួមយ៉ាងសកម្មក្នុងសកម្មភាពដែលនាំមកនូវថាមពលវិជ្ជមានដល់សង្គម។

ស្ទូឌីយូ Zhan Xuan បានជំរុញឱ្យអ្នកគាំទ្រទទួលខុសត្រូវជាចម្បងចំពោះសុវត្ថិភាពផ្ទាល់ខ្លួន ហើយជួបជាមួយ Zhan Xuan នៅពេលវេលា និងទីកន្លែងសមស្រប។ ក្រុមហ៊ុនអះអាងថាពួកគេរក្សាសិទ្ធិក្នុងការបន្តចំណាត់ការផ្លូវច្បាប់ប្រឆាំងនឹងការបំពានច្បាប់ណាមួយ៕