តារាសម្តែង មាន សូនីតា បានពោលទាំងអាក់អន់ចិត្តព្រោះថាអ្នកធ្វើចាំតែខុស បើអង្គុយអេះពោះខម្មិនបែបជាល្អ ខណៈគ្រាន់តែនាងមានចិត្តចង់បង្ហាញថាស្រលាញ់ជាតិ ប៉ុន្តែបែរមានមតិរិះគន់រឿងគ្រវីដងទង់ជាតិ និងមានកាយវិការមិនស្វាហាប់ទៅវិញ។
កាលពីថ្ងៃទី១៦ សីហា កន្លងមកនេះ តារាសម្តែង មាន សូនីតា បានបង្ហោះវីដេអូមួយដោយបានដាក់ចម្រៀង don’t Thai to me ជាមួយនឹងខេបសិនថា ខ្ញុំស្រលាញ់ប្រទេសកម្ពុជា (I Love Cambodia )។ ក្នុងវីដេអូនេះ មាន សូនីតា បានស្លៀកឈុតសហសម័យ ព្រមជាមួយនឹងការគ្រវីដងទង់ជាតិនៃព្រះរាជាណាចក្រកម្ពុជាផងដែរ។ ទោះជាយ៉ាងណាក៏ដោយ វីដេអូមួយនេះ មាន សូនីតា បែរជាទទួលបានមតិរិះគន់ពីអ្នកលេងបណ្តាញសង្គមទៅវិញ។
នៅថ្ងៃទី ១៨ ខែសីហា តារាសម្តែង មាន សូនីតា បានចេញវីដេអូមួយទៀតដោយបានលើកឡើងអំពីមតិរិះគន់ចំពោះនាង។ តារាស្រីរូបនេះបាននិយាយថាអ្នកធ្វើចាំតែខុសអ្នកមិនធ្វើមិនខុសនោះទេហើយអង្គុយអេះពោះខម្មិនប្រហែលជាល្អ ហើយបើនាងមិនធ្វើអីក៏ខុសមានការវែកញែកឥតឈប់ឈរ។ មាន សូនីតា បន្តទៀតថា នាងទទួលបានមតិជាច្រើនប៉ុន្តែនាងចង់ប្រាប់ថារាល់ថ្ងៃនាងមិនបានហាត់ទាហាន ហាត់វៃ ឬល្បុក្កតោ អ្វីដែរ គ្រាន់តែនាងចង់ធ្វើអ្វីតាមដែលអាចធ្វើទៅបាន។
តារាសម្តែងល្បីឈ្មោះក្នុងសង្គមសិល្បៈរូបនេះបន្តទៀតថា នាងគ្រាន់តែចង់បង្ហាញថានាងស្រលាញ់ជាតិ នាងអាចប្រើប្រាស់សំឡេងរបស់ខ្លួនទៅតាមអ្វីដែលអាចធ្វើទៅបាន ហើយក៏មិនបានបំពានឬក៏មើលងាយគេដែរ។ មាន សូនីតា បានចោទសួរទៅកាន់អ្នកខម្មិនរិះគន់ថា «អ្នកខម្មិនបានធ្វើអ្វីខ្លះទៅ?»។
គួរបញ្ជាក់ផងដែរថា មាន សូនីតា ហៅរាជនីក្រមាបានជួយដល់ជនភៀសសឹក និងបានទៅសួរសុខទុក្ខវីរកងទ័ពដែលកំពុងសម្រាកព្យាបាលផងដែរ។ កាលពីកន្លងមកនេះ មាន សូនីតា ក៏បានបង្ហោះសំណេរមួយសូមអង្វរពលរដ្ឋខ្មែរឈប់គាំទ្រតារាថៃនិងផលិតផលថៃតទៅទៀត រហូតល្បីដល់កាសែតថៃយកទៅចុះផ្សាយ៕
